އެމެރިކާގެ ގާނޫނުހަދާ މަޖިލީހުގެ ރައީސާ ނާންސީ ޕެލޯސީ ޓައިވާނަށް ކުރެއްވުމަށް ހަމަޖެހިފައިވާ ދަތުރުފުޅާއި ގުޅިގެން، އަލިފާނާއި ނުކުޅުމަށް ބުނެ ޗައިނާއިން އެމެރިކާއަށް އިންޒާރު ދީފައެވެ.
ދުނިޔޭގެ ގައުމުތަކުގެ މެދުގައި އޮތް ގުޅުންތަކަށް ނުތަނަވަސްކަން އައިސްފައިވާ ދަނޑިވަޅެއްގައި، އެމެރިކާގެ ރައީސް ޖޯ ބައިޑްންއާއި ޗައިނާގެ ރައީސް ޝީ ޖިންގޕިން ފޯނުން ގުޅުއްވާ ދެއްކެވި ވާހަކަފުޅުގައި، ޓައިވާނާ ގުޅުންހުރި ކަންކަމުގައި، "އަލިފާނާ ނުކުޅުމަށް" ބައިޑްގެ އަރިހުގައި ޝީ ވަނީ ވިދާޅުވެފައެވެ.
މިއީ މިއަހަރުގެ ފެބުރުއަރީ މަހަށްފަހު، މިދެގައުމުގެ އެންމެ އިސްވެރިން ފޯނުން ގުޅުއްވާ މަޝްވަރާ ކުރައްވަފައިވާ 5 ވަނަ ފަހަރެވެ.
ދެގައުމުގެ ލީޑަރުންގެ ވާހަކަތަކަށްފަހު، ޗައިނީސް ސްޓޭޓް މީޑިއާއިން ރިޕޯޓު ކޮށްފައިވާ ގޮތުގައި ޔޫއެސްއިން "އެއް ޗައިނާ" ސިޔާސަތައް އެއްބާރުލުން ދޭންޖެހޭނެކަމަށާއި، ޓައިންވާންގެ މިނިވަންކަމަށް ޗައިނާއިން ވަރަށް ވަރުގަދައަށް ދެކޮޅު ހަދާކަން ހާމަކޮށް، ޗައިނާގެ ދާޚިލީ ކަންކަމަށް ނުފޫޒު ނުފޯރުވުމަށް ޝީ އެމެރިކާގެ ރައީސަށް ދަންނަވާފައި ވާކަމުގައެވެ.
މިހާރު ޗައިނާއާއި އެމެރިކާގެ މެދުގައި ނުތަނަވަސްކަން އުފެދިފައިވަނީ، އެމެރިކާގެ ގާނޫނުހަދާ މަޖިލީހުގެ ރައީސާ ނާންސީ ޕެލޯސީ ޓައިވާނަށް ދަތުރުފުޅެއް ކުރެއްވުމަށް ހަމަޖެއްސުމާއި ގުޅިގެންނެވެ. މިދަތުރުފުޅު ޕެލޯސީ ކުރެއްވުމަށް ހަމެޖެހިފައިވަނީ އެމެރިކާގެ ގާނޫނުހަދާ މަޖިލީހުގެ މެމްބަރުންގެ ވަފުދަކާ އެކީއެވެ.
މިދަތުރުފުޅާއި ގުޅިގެން ޗައިނާއިން ބުނެފައިވަނީ، ޕެލޯސީ މިދަތުރުފުޅު ކުރައްވައިފިނަމަ، ބަދަލުގައި ޗައިނާއިން ވަރަށް ވަރުގަދަ ރައްދެއް ދޭނެކަމުގައެވެ. އަދި ޗައިނާއިން ބުނެފައިވަނީ މިފަދަ ދަތުރުފުޅެއް ޗައިނާއިން ދެކޭނީ ޗައިނާ ޓައިވާންގެ މައްސަލަ ގަސްތުގައި ގޯސްކުރުމުގެ މަގުސަދުގައި ކުރައްވާ ދަތުރުފުޅަކަށް ކަމުގައެވެ.
މިނިވަންކަން އިއުލާން ކޮށްފައި ނުވިނަމަވެސް ޓައިވާންއަކީ އަމިއްލަ ވެރިކަމެއް ކުރަމުން އަންނަ، ޗައިނާއިން އެގައުމުގެ ބައެއްގެ ގޮތުގައި ދައުވާ ކުރަމުންދާ ގައުމެކެވެ. އަދި އެމެރިކާއިން ދަނީ ނުރަސްމީ ސިފައެއްގައި އަބަދުވެސް ޓައިވާނަށް އަސްކަރީ އެހީތެރިކަން ފޯރުކޮށްދެމުންނެވެ.
ޗައިނާއިން އަބަދުވެސް ބުނަމުން އަންނަނީ ޓައިވާންއިން އެގައުމުގެ މިނިވަންކަން އިއުލާން ކޮށްފިނަމަ އަސްކަރީ ބާރުގެ ބޭނުން ބޭނުންކޮށްގެ ޓައިވާން ހިފާނެކަމުގައެވެ.
