ބޮލީވުޑްގެ މަޝްހޫރު ލަވަ ކިއުންތެރިޔާ އަދްނާން ސާމީ މީގެ ދުވަސްކޮޅެއް ކުރިން ވަނީ އިންސްޓަގްރާމްގައި ހުރި އޭނާގެ ހުރިހާ ފޮޓޯއެއް ޑިލީޓް ކޮށްލުމަށް ފަހު "އަލްވިދާ" ލިޔެފައިވާ ފޮޓޯއެއް ޕޯސްޓް ކޮށްފައެވެ.
އެއާއެކު މުޅި ސޯޝަލް މީޑީއާ ކެކި އަރައިގަތެވެ. އެއްބަޔަކު ބުނީ އަދްނާން ސާމީ ސޯޝަލް މީޑީއާ އާއި އިންޑަސްޓްރީ ދޫކޮށްލީ ކަމަށެވެ. ނަމަވެސް އެކަމާ ގިނަ މީހުން ދިއައީ ދެކޮޅު ހަދަމުންނެވެ.
އެކަމާއި ދެކޮޅަށް ވާހަކަ ދެއްކި ގިނަ ބަޔަކު އޭރުވެސް ބުނަމުން ދިޔައީ އެއީ އޭނާގެ ކުރިއަށް އޮތް ލަވަ ނެރުމަށް ޖެއްސި ސްޓަންޓެއް ކަމަށެވެ. މީގެ ކުރިން އެތަށް ސެލެބްރިޓީންނެއް މިފަދަ ގޮތްގޮތަށް އެމީހުންގެ ޕްރޮމޯޝަންތައް ވަނީ ކުރިއަށް ގެންގޮސްފައެވެ.
ހަމަ ހީކުރި ގޮތަށް އަދްނާން ސާމީ ވެސް ޖެއްސީ ސްޓަންޓެކެވެ. އޭނާގެ ކުރިއަށް އޮތް ލަވަ ޕްރޮމޯޓް ކުރުމަށް އިންސްޓަގްރާމްގެ ހުރިހާ ފޮޓޯއެއް އޭނާ ޑިލީޓް ކޮށްލީއެވެ.
ނަމަވެސް މިހާރު އަނެއްކާ ވެސް ވަނީ މި ލަވަގެ ކުޑަ ތަންކޮޅަކާއެކު އިތުރު ޕޯސްޓެއް ކޮށްފައެވެ. އަަދި ބުނެފައި ވަނީ އެއީ އޭނާ "އަލްވިދާ" ކިޔާ ގޮތް ކަމަށެވެ.
View this post on Instagram
މިލަވަ ނެރެން ހަމަޖެހިފައި ވަނީ މިއަދު މެންދުރު 12 ޖަހާއިރު ސަރެގަމަ މިއުޒިކް ޔޫޓިއުބް ޗެނަލުންނެވެ.
އަދްނާން ސާމީ ވަނީ ރީތި އެތައް ލަވައެއް ބޮލީވުޑަށް ދޫކޮށްފައެވެ. އޭގެތެރޭގައި "ލިފްޓް ކަރާދޭ"، "ތެރާ ޗެހެރާ" އާއި "ބިގި ބިގި ރާތޯމޭ" ފަދަ ލަވަތައް ފާހަގަ ކުރެވެއެވެ. މި ލަވަތަކަކީ އޭނާ އަމިއްލައަށް ކިޔައި އޭގެ ވީޑިއޯވެސް ކުޅެފައިވާ ލަވަތަކެކެވެ.
