ބޮލީވުޑްގެ ލެޖެންޑަރީ އެކްޓަރ އަމީތާބް ބައްޗަން ގެނެސްދޭ ރިއަލިޓީ ޓީވީ ޝޯ "ކޯން ބަނޭގާ ކަރޯޑްޕަތީ" (ކޭބީސީ) 14 ވަނަ ސީޒަން އަންނަ މަހުގެ 7 ވަނަ ދުވަހު ޕްރިމިއާ ކުރާން ނިންމައިފިއެވެ.
ސޮނީޓީވީން ގެނެސްދޭ މިޝޯ އަކީ 2000 ވަނަ އަހަރުން ފެށިގެން ގެނެސްދެމުން އަންނަ ޝޯ އެކެވެ. މިޝޯ އަކީ މަޝްހޫރު އިނގިރޭސި ޝޯވ "ހޫ ވޯންޓްސް ޓު ބީ އަ މިލިއަނާ" އަސްލަށް ބަލައިގެން ގެނެސްދޭ ކުއިޒް ޝޯއެކެވެ.
ކޭބީސީގެ 13 ވަނަ ސީޒަން ގެނެސްދިނީ މިދިއަ އަހަރުއެވެ. އަދި އެސީޒަނުގައި ވަނީ ޝޯގެ 1000 އެޕިސޯޑްވެސް ހަމަވެފައެވެ.
7 ވަނަ ދުވަހު ޝޯ ޕްރިމިއާ ކުރާއިރު، މި ސީޒަނުގެ ފުރަތަމަ ޝޯ އިންޑިއާގެ މިނިވަން ދުވަހަށް ވަނީ ހާއްސަކޮށްފައެވެ. މި އެޕިސޯޑުގައި ސުޕަރ ސްޓަރ އާމިރު ޚާން ވެސް ފެނިގެން ދާނެއެވެ. އާމިރު މިޝޯ ގައި ބައިވެރިވަނީ އޭނާގެ ކުރިއަށް އޮތް ފިލްމް "ލާލް ސިންގް ޗައްޑާ" ގެ ޕްރޮމޯޝަނަ އަށެވެ.
View this post on Instagram
މި ޝޯގެ ބައިވެރިނަށް ބޮޑެތި ފައިސާގެ އިނާމު ލިބިގެންދެއެވެ. އަދި ހަމަ އެއާއެކު އަމީތާބް މިޝޯ ހުށައަޅައިދޭލެއް ފުރިހަމަ ކަމުން އަދި އޭނާގެ ހިންދީ ބަހުގެ މުއްސަދި ކަމުން މި ޝޯ އަކީ ގިނަ ބައެއްގެ މެދުގައި ވަރަށް މަގުބޫލު ޝޯ އެކެވެ.
