މި ހިނގާ ޖުލައި މަހުކުރި ވިއްސާރައިގެ ސަބަބުން ގެއްލުންލިބުނުކަމަށް ރިޕޯޓްކޮށްފައިވަނީ 9 ރަށަކުން 261 ގެއަށްކަމަށް ނޭޝަނަލް ޑިޒާސްޓަރ މެނޭޖުމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
މި ޖުލައި މަހު މޫސުން ގޯސްވެ، ބޯކޮށް ވާރޭވެހި ފެންބޮޑުވުމާއި، ވައިގަދަވެ، އުދައެރުމުގެ ސަބަބުން ލިބު ގެއްލުން ދެނެގަތުމަށް ހަދާ ޑމޭޖު އެސެސްމަންޓް ހުށައެޅި ރަށްތަކުގެ މައުލޫމާތު އެ އޮތޯރިޓީން މިއަދު ވަނީ އާންމުކޮށްފައެވެ.
ގެއްލުން ލިބުނު ރަށްތަކާއި ގޭބީސީތަކުގެ ޢަދަދު:
1- ސ. މަރަދޫ އިން 8 ގޭގެ ފޯމު
2- ސ. މަރަދޫފޭދޫ 3 20 ގޭގެ ފޯމު
3- ށ. ބިލެއްފަހިން 2 ގޭގެ ފޯމު
4- ގދ. ރަތަފަންދޫ އިން 8 ގޭގެ ފޯމު
5- ތ. މަރަފުށިން 61 ގޭގެ ފޯމު
6- ގދ. މަޑަވެލން 67 ގޭގެ ފޯމު
7- ހދ. ވައިކަރަދޫ އިން 2 ގެ ފޯމު
8- ގދ.ފިޔޯރީ އިން 11 ގޭގެ ފޯމު
9- ގދ. ހޯނޑެއްދޫ އިން 82 ގޭގެ ފޯމް
އެންޑީއެމްއޭއިން ބުނީ މިހާތަނަށް ލިބިފައިވާ ޑެމޭޖު އެސެސްމަންޓް ފޯމުތަކުގެ މައުލޫމާތަށް ބަލާއިރު، ގޯތިގެދޮރާއި ޒަރޫރީ ބޭނުންތަކަށް ބުރޫއަރާފަދަ ގެއްލުންތަކެއް 9 ރަށެއްގެ 96 ގެއަކަށް ލިބިފައިވާކަމަށް ދައްކާކަމަށެވެ. މިއީ ޖުމްލަ ލިބުނު އެސެސްމަންޓް ފޯމްތަކުގެ 40%ކަމަށް އެ އޮތޯރިޓީން ބުންޏެވެ.
މީގެ އިތުރުން މި ހާދިސާގެ ސަބަބުން އެންމެ ބޮޑަށް ގެއްލުން ލިބިފައިވަނީ ދަނޑުވެރިންނަށްކަމަށާއި، އެގޮތުން 4 ރަށަކުން 110 ގޭބީސީއަކުން ބަލަހައްޓާ ދަނޑުބިންތަކަށް ގެއްލުން ލިބިފައިވާކަމަށް އެސެސްމަންޓްތަކުން ދައްކާކަމަށް އެ އޮތޯރިޓީން ބުންޏެވެ. މިއީ ހުށައެޅި ފޯމްތަކުގެ 46%އެވެ. ދަނޑުބިންތަކުގެ ތެރެއިން އާމްދަނީ ހޯދުމަށް ހައްދާ ބާވަތްތައްކަމަށްވާ ފަޅޯ، ބިލެތް، ދޮންކެޔޮ، ބަނބުކެޔޮ، އަނބުގަސް ފަދަ ގަސްތައް މަރުވެފައިވާކަމަށާއި، ދަނޑުތަކަށް ގެއްލުން ލިބިފައިވަނީ ހޯނޑެއްދޫއާއި ފިޔޯރީގެ އިތުރތުން ތިމަރަފުއްޓަށެވެ.
މީގެ އިތުރުން 14% ފީމުގައި ވިޔަފާރީއާއި ސަރުކާރު ޢިމާރާތްތަކާއި އިޖްތިމަޢީ ޢިމާރާތް ފަދަ އެހެން ތަންތަނަށް ގެއްލުން ލިބިފައިވާކަމަށް އެންޑީއެމްއޭއިން ބުންޏެވެ.
އެ އޮތޯރިޓީން ބުނީ މިހާތަނަށް ޑެމޭޖު އެސެސްމަންޓް ފޯމް ފުރިހަމަ ނުކުރާ ރަށްރަށުން އެކަން ފުރިހަމަކުރުމަށް ކައުންސިލްތަކަށް އަންގާފައިވާކަމަށެވެ. އެސެސްމަންޓް ފޯމް ހުށައެޅުމަށް ލަސްވަނީ ބަންދު ދުވަސްތައް ގިނަވުމާއި، ކައުންސިލްއިދާރާގެ މުވައްޒަފުންގެ ދަތިކަމާއި، ލިބު ގެއްލުންތަކުން ރުޖޫޢަވުމަށް މަސައްކަތް ކުރަމުންދާތީކަމަށް ބެލެވޭލަމަށް އެ އޮތޯރިޓީން ބުންޏެވެ.
