މި އަހަރު ހައްޖުގެ އަޅުކަން އަދާކުރި ދިވެހި ހައްޖުވެރިންގެ ދެވަނަ ގުރޫޕު މިއަދު ރާއްޖެ އަތުވެއްޖެއެވެ.
މިއަދު ހެނދުނު 10:28 ގައި ދިވެހި ހައްޖުވެރިންނާއެކު ރާއްޖެއައި ފްލައިޓުން 175 ހައްޖުވެރިން ވަނީ އައިސްފައެވެ. މި ހައްޖުވެރިންނަށް އިސްލާމިކް މިނިސްޓަރ ޑރ. އަޙްމަދު ޒާހިރު ޢަލީ ވަނީ އެއަރޕޯޓުން މަރުހަބާ ދަންނަވާފައެވެ.
ދިވެހި ހައްޖުވެރިންގެ ފުރަތަމަ ގްރޫޕު ރާއްޖެއައިސްފަނީ މިމަހުގެ 20 ވީ ބުދަ ދުވަހު ދުވަހު އެވެ. އެ ދުވަހު 157 ހައްޖުވެރިން ވަނީ ރާއްޖެ އައިސްފައެވެ.
އިސްލާމިކް މިނިސްޓްރީން ބުނީ ރާއްޖެ އައި ހައްޖުވެރިންގެ ފުރަތަމަ ގްރޫޕެކޭ އެއްގޮތަށް ދެވަނަ ގްރޫޕުގެ ހައްޖުވެރިންނާއި އާއިލާގެ ބޭފުޅުންނަށް ހާއްސަކޮށް ހިދުމަތްދިނުމަށްޓަކައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހައްޖުވެރިންނަށް ހާއްސަ ސަރަހައްދެއް ހަމަޖައްސައި އިތުރު މުވައްޒަފުން ހަރަކާތްތެރިވާ ކަމަށެވެ.
ހައްޖާޖީން ބަލާ އެއާޕޯޓަށް އަންނަ ފަރާތްތަކަށް ހާއްސަކޮށްފައިވާ ވެހިކަލްތަކުގެ ދަތުރުތައް ކޮންމެ 15 މިނެޓަކުން އޮންނާނެ ކަމަށް އެ މިނިސްޓްރީން ބުނެ އެވެ. އެހެންނަމަވެސް ބަސްތަކުގައި ގިނަ އަދަދެއްގެ ލަގެޖް އުފުލާނެ ޖާގަ ނެތުމާ ގުޅިގެން ހައްޖުވެރިންގެ ލަގެޖް ގެންދިޔުމުގެ އިންތިޒާމު ހަމަޖައްސަންޖެހޭނީ އެ ބޭފުޅަކު އަމިއްލައަށް ކަމަށް އެ މިނިސްޓްރީން ބުންޏެވެ.
ދިވެހި ހައްޖުވެރިންގެ އެންމެ ފަހު ގްރޫޕް ރާއްޖެ އަންނާނީ މިމަހުގެ 27 ވަނަ ދުވަހުއެވެ.
މިއަހަރު ޖުމްލަ 453 ދިވެހި ހައްޖުވެރިން ހައްޖުގެ އަޅުކަން އަދާކޮށްފައިވެއެވެ.
