އިސްރާއީލުގެ މައިނޯރިޓީ މުސްލިމުން އަންނަ އަހަރުން ފެށިގެން ހައްޖަށާއި އުމްރާއަށް ސައުދީ އަރަބިއާއަށް ދަތުރު ފާށާނޭކަމަށް އުންމީދު ކުރާކަމަށް އިސްރާއީލުގެ އޮފިޝަލުން ހާމަ ކޮށްފިއެވެ. އިސްރާއީލުގެ އޮފިޝަލުން މިހެން ވިދާޅުވެފައިވަނީ، ސައުދީގެ ވައިގެ ސަރަހައްދު އިސްރާއީލުގެ ފްލައިޓްތަކަށް ހުޅުވާލޭނޭކަން ސައުދީ އަރަބިއާއިން ހާމަ ކޮށްފައި ވަނިކޮށެވެ.
މިހަފްތާގެ ހުކުރު ދުވަހު ސައުދީ އަރަބިއާއިން ބުނެފައިވަނީ، އެގައުމުގެ ވައިގެ ސަރަހައްދު ހުރިހާ ގައުމަކަށްވެސް ހުޅުވާލާނޭ ކަމުގައެވެ. ސައުދީ އަރަބިއާގެ މި ސްޓޭޓްމަންޓުގެ މަގްސަދަކީ، އެގައުމުގެ ވައިގެ ސަރަހައްދު އިސްރާއީލުގެ ފްލައިޓްތަކަށް ހުޅުވާލުމަށް ނިންމާފައިވާކަން ނުސީދާކޮށް ހާމަ ކުރުމެވެ.
މީގެ ކުރިން އިސްރާއީލުގެ ފްލައިޓްތަކަށް ސައުދީ އަރަބިއާގެ އެއަރ ކޮރިޑޯއެއް ބޭނުން ކުރެވެނީ ހަމައެކަނި އަރަބި ގައުމުތަކަށް ދަތުރު ކުރުމަށެވެ. އެހެންމަވެސް ސައުދީ އަރަބިއާގެ ވައިގެ ސަރަހައްދު އިސްރާއީލުގެ ފްލައިޓްތަކަށް ހުޅުވާލުމާއެކު، އެގައުމުގެ ފްލަައިޓްތަކަށް އޭޝިއާގެ މަގުންވެސް ދަތުރުކުރުމުގެ ފުރުސަތު ލިބިގެން ދާނެއެވެ.
އިސްރާއީލުގެ ރީޖަނަލް ކޯޕަރޭޝަން މިނިސްޓަރ އިސަވި ފްރެއިޖި ވިދާޅުވި ގޮތުގައި، ސައުދީގެ މި ނިންމުމުން ފެނިގެންދަނީ، އެމެރިކާގެ ބާރު އެޅުމުގެމަތިން، ގައުމުތަކުގެ މެދުގައި އޮތް ގުޅުން އާދައިގެ ހާލަތަކަށް ގެނައުމަށްޓަކާ ކުރެވޭ މަސައްކަތަށް މިހާރު ވަރަށް ބޮޑު ކުރިއެރުމެއް ލިބިގެން ގޮސްފައިވާކަން ކަމުގައެވެ. އަދި އޭނާ ވިދާޅުވި ގޮތުގައި މި ނިންމުމުގެ ސަބަބުން އޭނާފަދަ މުސްލިމުން ދެކެމުން އަންނަ ހުވަފެންތައް ހަގީގަތަކަށް ވެގެން ދާނޭކަމުގައެވެ.
"އަހަރެން އުއްމީދު ކުރަނީ، ކުރިޔަށް އޮތް އަހަރެއްހާ ދުވަހުގެ ތެރޭގައި، އިސްރާއީލުގެ މުސްލިމުން ރައްޔިތުންނަށް ބެން ގުރިއޮންއިން (ޓެލްއަވީވް ކައިރީގައި އޮންނަ އެއަރޕާޓެއް) ޖިއްދާއަށް ސީދާ ދަތުރުކޮށް، ޖިއްދާއިން މައްކާއަށް ފަރުޟު އަޅުކަން އަދާކުރުމަށް ދަތުރު ކުރެވޭނެ ކަމަށް،" ފްރެއިޖީ ވިދާޅުވެފައި ވެއެވެ.
ފާއިތުވެދިޔަ ތަނުގައި އިސްރާއީލުގެ މުސްލިމުންނަށް ސައުދީއަށް ދަތުރު ކުރުމުގެ ހުއްދަ އޮންނަނީ 3 ވަނަ ގައުމެއް މެދުވެރި ވެގެންނެވެ. އޭގެ ނަތީޖާއެއްގެ ގޮތުން އަރަބި ގައުމުތަކުން ސައުދީއަށް ދަތުރު ކުރުމަށް ކުރަންޖެހޭ ޚަރަދުގެ ދެގުނަ ބޮޑުކޮށް އިސްރާއީލުގެ މުސްލިމުން ސައުދީއަށް ދަތުރުކުރުމަށް ޚަރަދު ކުރަން ޖެހެއެވެ.
ސައުދީ އަރަބިއާއިން އަދިވެސް އިސްރާއީލަކީ ދައުލަތެއް ކަމުގައި ގަބޫލު ކޮށްފައެއް ނުވެއެވެ. ސައުދީ އަރަބިއާއިން ބުނެފައިވަނީ، އެގައުމުން އިސްރާއީލަކީ ދައުލަތެއް ކަމުގައި ބަލައިގަންނާނީ ފަލަސްތީނުގެ ދައުލަތް ގާއިމު ކުރެވުމުން ކަމުގައެވެ.
One Response
އަލްޙަމްދުﷲ ސައޫދީގެ ނިންމުމަށް މަރުހަބާ!