އިރުމަތީ އޭޝިއާއަށް މިހާރު ކުރަމުންދާ ޕްރީ-ސީޒަން ޓުއާގައި ކްރިސްޓަލް ޕެލަސްއާ ދެކޮޅަށް ކުޅުނު ރަހުމަތްތެރިކަމުގެ މެޗު ލިވަޕޫލުން ކާމިޔާބުކޮށްފިއެވެ.
ސިންގަޕޫރުގައި ކުޅުނު މިމެޗް ލިވަޕޫލް ކާމިޔާބުކުރީ 2-0 ގެ ނަތީޖާއަކުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީވެސް ލިވަޕޫލެވެ. މިމެޗްގެ ފުރަތަމަ ލަނޑު މެޗްގެ 12 ވަނަ މިނެޓްގައި ޖަހާ ލިވަޕޫލަށް ލީޑު ނަގާދިނީ ކެޕްޓަން ޖޯޑަން ހެންޑަރސަންއެވެ. އަދި އެޓީމްގެ ދެވަނަ ލަނޑު މެޗްގެ 46 ވަނަ މިނެޓްގައި ޖަހާދިނީ މުހަންމަދު ސަލާހްއެވެ.
މިމެޗްގައި ލިވަޕޫލަށް ދިމާވި ހަމައެކަނި މައްސަލައަކީ ފުރަތަމަ ހާފްގައި އެލެކްސް އޮކްސްލޭޑް ޗެމްބަލިންއަށް އަނިޔާވުމެވެ. މިއީ މިފަހަރުގެ ޕްރީ ސީޒަންގައި ލިވަޕޫލް ކުޅުނު ދެވަނަ މެޗެވެ. ފުރަތަމަ މެޗްގައި ލިވަޕޫލް ވަނީ މެންޗެސްޓަރ ޔުނައިޓެޑް އަތުން ފަސޭހަ ކަމާއެކު ބަލިވެފައެވެ.
މިމެޗްގައި ޕެލަސް ޓީމަށް ބަލާލާއިރު މުޅި ޓީމްގައިވެސް ހިމެނިފައިވަނީ ސީނިއަރ 11 ކުޅުންތެރިންނެވެ. މީގެ އެންމެ ބޮޑު ސަބަބަކަށް ވެފައިވީ ސިންގަޕޫރުގެ އެންޓްރީ ރިކުއަމަންޓް ބައެއް ކުޅުންތެރިން ނަށް ފުރިހަމަ ނުކުރެވުމާއި އަދި އަނެއްބައި ކުޅުންތެރިން ފިޓްނަސް ކަންތައް ހުރިގޮތުން މިދަތުރުގައި ބައިވެރިވެފައި ނުވުމެވެ.
ސިންގަޕޫރުގެ ނޭޝަނަލް ސްޓޭޑިއަމްގައި ކުޅުނު މިމެޗް ބަލާލުމަށް 50 ހާސް މީހުން ދަނޑަށް ވަދެފައިވެއެވެ.
