ލިބުން ލަސްވެފައިވާ ޖެޓް ފިއުލް ޝިޕްމަންޓް މިހާރު ލިބިފައިވާކަމަށާއި، ފޯރާފައި ތެލުގެ ދަތިކަން ދެން ކުރިމަތި ނުވާނޭކަމުގައި އެމްއޭސީއެލްއިން ބުނެފިއެވެ.
އެމްއޭސީއެލްއިން ބުނެފައިވަނީ ރާއްޖެއަށް ގެންނަ ޖެޓް ފިއުލް މީގެ ކުރިން ޓެސްޓު ކުރަން ފޮނުވަނީ ދުބާއީއަށް ނަަމަވެސް، ތެޔޮ ޓެސްޓުކުރާ ލެބޯޓަރީއެއް އެސްޓީއޯއިން މިހާރު ގާއިމް ކޮށްފައިވާތީ، މިފަހަރު ގެނައި ޖެޓް ފިއުލް ޝިޕްމަންޓުން ބޯޓުތަކަށް ތެޔޮ ދޫކުރުން ކުރިއަށްވުރެ އަވަސް ވެގެން ދާނެކަމުގައެވެ.
ރާއްޖެއަށް އައުމަށް ހަމަޖެހިފައިވާ ތެޔޮ ޝިޕްމަންޓެއް އައުން ލަސްވުމާއި ގުޅިގެން މީގެ ހަފްތާއެއް ކުރިން އެމްއޭސީއެލްއިން ވަނީ ބޯޓުތަކަށް ތެޔޮއެޅުން ކޮންޓްރޯލް ކޮށްފައެވެ. އަދި އަވައްޓެރި ސްރީލަންކާއިން ތެޔޮ ނުލިބޭތީ ތެޔޮ އެޅުމަށް ރާއްޖެ އަންނަ ބޯޓުފަހަރުތައް ގިނަވުމާއި ގުޅިގެންވެސް އެމްއޭސީއެލްއިން ވިއްކާ ތެލުގެ ޑިމާންޑް މަތިވެފައި ވެއެވެ.
އެމްއޭސީއެލްއިން ގެންދަނީ، ތެޔޮ ރައްކާކުރުމުގެ ކެޕޭސިޓީ އިތުރު ކުރުމަށްޓަކާ ވެލާނާ އިންޓަރނޭޝަނަލް އެއަރޕޯޓުގައި މުޅިން އާ ތެޔޮ ފާމެއް ހައްދަމުންނެވެ. މައުލޫމާތު ލިބިފައިވާ ގޮތުގައި މިތަން ނިމި މިއަހަރު ބޭނުން ކުރަން ފެށޭވަރު ވާނެއެވެ.
