ކާބޯތަކެތި ފިނިކޮށްފައި ބެހެއްޓުމަކީ ގިނަ ދުވަހު ބެހެއްޓުމަށް އަޅުގަނޑުމެން ވަރަށްބޮޑަށް އާދައަކަށް ހަދާފައި ވާކަމެކެވެ. ބައެއް ކާތަކެތި ގިނަ ދުވަހު ހަލާކުނުވެ ބެހެއްޓުމަށް އެންމެ ރަނގަޅު އެއް ގޮތަކީވެސް މިއީއެވެ. ނަމަވެސް ފްރިޖުގައި ބަހައްޓަން ރަނގަޅު ނުވާނެ ބައެއް ބާވަތްތައް ވެސް ހުރެއެވެ.
މީގެ އިތުރުން މާ ބޮޑަށް ފިނިކޮށް ބެހެއްޓުމުގެ ސަބަބުން ބައެއް ކާތަކެތީގެ ރަހަގެއްލި، ބޭނުންކުރަން ރައްކާތެރި ނުވާ ހިސާބަށްވެސް ދެއެވެ.
މިއަދު މި ބަލާލަނީ ފްރިޖަށް ނުލާންވީ ނުވަތަ ވަކި ގޮތަކަށް ފްރިޖަށް ލާންޖެހޭ ބައެއް ތަކެއްޗެވެ.
ޕާން
ޕާނަކީ ވަރަށް އަވަހަށް ބޭނުންކޮށްފައި ހުސްކޮށްލަން ޖެހޭ އެއްޗެކެވެ. އެހެން ނަމަވެސް މިއީ ބައެއް މީހުން ފްރިޖަށް ލައިގެން ބޭނުންކުރާ ބާވަތެކެވެ. އެކަމަކު ޕާން ރައްކާކުރުމަށް ފްރިޖަށް ލައިގެން ވާނެ ފައިދާއެއް ނެތެވެ. އެ ބޭނުންކުރޭވޭ މުއްދަތުވެސް އިތުރު ނުވެއެވެ. ފްރިޖަށް ލުމުން ޕާނުގެ ސްޓްރަކްޗާ އެއްކޮށް ބަދަލުވެ އެވެ. އޭގެ ސަބަބުން ޕާން ހަރުވެ، ފުނޑުފުނޑުވުން އެކަށީގެންވެއެވެ.
ލޮނުމެދު
މާ ގިނައިން ވައިގެ ތެތްކަން ލިބި ފިނިވުމުގެ ސަބަބުން ލޮނުމެދު ވަރަށް އަވަހަށް ހަލާކުވެއެވެ. އެކަމަކު ލޮނުމެދުގެ ތޮށި ފިލުވާފައި، ވަކިކޮށް ތައްޓަކަށް އަޅައި ބަންދުކޮށްފައި ފްރިޖަށް ލައިފި ނަމަ ހަލާކު ނުވެ ގިނަ ދުވަހު ހުންނާނެއެވެ. ލޮނުމެދުގެ ތޮށި ނުފިލުވާ ބަހައްޓާ ނަމަ، އެންމެ ބުއްދިވެރި ގޮތަކީ އަވި ނުދޭ ހިސާބެއްގައި ބަދިގެތެރޭގައި ބެހެއްޓުމެވެ.
އެކި ކަހަލަ ބަދަން
ކެޝޫނަޓް އާއި ޕިސްޓާޝިއޯ ފަދަ ތަފާތު އެކި ކަހަލަ ބަދަނުގެ ވައްތަރުތައް ހަފުތާއެއްގެ ތެރޭގައި ބޭނުންކޮށް ހުސްކޮށްލަން ވިސްނާ ނަމަ، ފްރިޖުގައި ބަހައްޓަން އެންމެ ރަނގަޅެވެ. ނަމަވެސް ގިނަ ދުވަސް ވަންދެއް އެ ތަކެތި ރައްކާތެރިކޮށް ބަހައްޓަން ބޭނުންވާ ނަމަ، ވައި ނުވަންނާނެހެން ފުޅިއެއް ނުވަތަ ދަޅަކަށް އަޅާފައި ބަހައްޓާށެވެ.
މާމުއި
މާމުޔަކީ އަމިއްލަ ޒާތުގައި ގިނަ ދުވަސްވަންދެން ފިނިކޮށް ހުންނަ އެއްޗެކެވެ. އެހެންވީމަ ފްރިޖަށް އެ ފިނިކުރަން ލާންވީ އެއްވެސް ސަބަބެއް ނެތެވެ. ފްރިޖަށް ލުމުން ވަރަށް އަވަހަށް މާމުއި ހަލާކުވެއެވެ. މާމުއި ފްރިޖަށް ލުމުން އޭގައި ހުންނަ ގުދުރަތީ ހަކުރުގެ ބާވަތް ގަނޑުވެ، ކްރިސްޓަލައިޒް ވާން މެދުވެރިވެއެވެ.
ބަޓާނާ
ބަޓާނާ އަކީ ދިވެހިންގެ ތެރޭގައި ވަރަށް މަގުބޫލު އެއްޗެކެވެ. ފްރިޖުގެ ވައިގައި ހުންނަ ތެތްކަމުގެ ސަބަބުން ބަޓާނާ އަކީ ވަރަށް ފަސޭހައިން ހަލާކުވާ އެއްޗެކެވެ. ބަޓާނާ އެއްވެސް ވަރަކަށް ނުފަޅާ ނަމަ، ފްރިޖަށް ނުލާށެވެ. އަދި ފްރިޖަށް ލާން ބޭނުންވާ ނަމަ، އެންމެ ރަނގަޅު ގޮތަކީ ބަޓާނާ ކިޔުބްކޮށް ކޮށާލުމަށް ފަހު، ޒިޕްލޮކް ކޮތަޅަކަށް އަޅައި ބަންދުކޮށްލާފައި ލުމެވެ.
