"ކޮފީ ވިތު ކަރަން"ގެ ނަމުގައި ބޮލީވުޑްގެ ނުފޫޒުގަދަ ޕްރޮޑިއުސަރ އަދި ޑައިރެކްޓަރ ކަރަން ޖޯހަރު ކުރިއަށްގެންދާ ޗެޓް ޝޯގެ 7 ވަނަ ސީޒަން ދައްކަން ފަށާފައި ވަނީ މި ޖުލައި މަހުގެ 7 ވަނަ ދުވަހުއެވެ. އެހެން ސީޒަން ތަކާއި ޚިލާފަށް އޮންލައިން ޕްލެޓްފޯމަކުން ސްޓްރީމް ކުރާ މި ސީޒަންގެ ފުރަތަމަ ޝޯގައި ގެސްޓުންގެ ގެގޮތުގައި ފެނިގެން ދިޔައީ އާލިއާ ބަޓާއި ރަންވީރު ސިންގ އެވެ.
2004 އިން ފެށިގެން "ކޮފީ ވިތު ކަރަން" ގެނެސްދެމުން އައީ ސްޓާ ވޯލްޑް އިންޑިއާ އިންނެވެ. އެކަމަކު މި އަހަރު ޝޯ ގެނެސްދެނީ ޑިޒްނީ ހޮޓް ސްޓާ އިންނެވެ. މި ފަހަރުގެ ސީޒަންގައި ގެންނާނެ ބައެއްތަރިންގެ ނަންތައް ޝޯ ޕްރިމިއަރ ކުރުމުގެ ކުރިން ވަނީ ލީކު ވެފައެވެ.
މި ފަަހަރުގެ ސީޒަންގައި އަކްޝޭ ކުމާރު، ސައުތުގެ ތަރި ސަމަންތާ، ވިޖޭ ދެވަރަކޮންޑާ، އަނަންނިޔާ ޕާންޑޭ، އަނިލް ކަޕޫރު، ވަރުން ދަވަން، ޖާންވީ ކަޕޫރު އަދި ސާރާ އަލީ ޚާން ފަދަ ތަރިން ފެނިގެންދާނެއެވެ.
ނަމަވެސް މި ޝޯއިން ބޮލީވުޑްގެ ރަސްގެފާނުންގެ ގޮތުގައި ނަންކިޔޭ އާމިރު ޚާނާއި ޝާހްރުކް ޚާން ފެނިގެން ދާނެތޯ ފޭނުން އަންނަނީ ސުވާލު އުފައްދަމުންނެވެ. ބޮލީވުޑް ހަންގާމާ އާއި ވާހަކަ ދައްކަމުން ކަރަން މިވަނީ މި ސުވާލުގެ ޖަވާބު ދީފައެވެ. އެގޮތުން މި ފަހަރުގެ ސީޒަންގައި އާމިރު ޚާން ފެނިގެންދާނެ ކަމަށް ކަރަން ވަނީ ބުނެފައެވެ. އެހެން ކަމަވެސް ޝާހްރުކް މިފަހަރުގެ ސީޒަނުން ނުފެންނާނެއެވެ.
މި ޝޯއަކީ ކަރަންއާ ގާތް ބޮލީވުޑްގެ ތަރިންނާއެކު ކުރިއަށް ގެންދާ ޝޯއެކެވެ. މިޝޯއާ މެދު ހިތްހަމަ ނުޖެހި ޝޯ ތެރެއިން ކިތަންމެ ތަރިންނެއް އޭނާއަށް ވައްބަހުންވެސް ޖަހައެވެ.
މީގެ ކުރީގެ ސީޒަން ތަކުގައިވެސް ތަރިންގެ ވަރަށް ޕާސަނަލް ވާހަކަތައް ވަނީ މިޝޯ މެދުވަރިކޮށް ފޭނުންނާ ހިއްސާކޮށްފައެވެ.
