ސަރުކާރު ބަދުނާމު ކުރުމަށް ޕީޕީއެމްއިން ނުކުރާ މަސައްކަތް އެމްޑީޕީ ތެރެއިން ދަނީ ކުރަމުން ކަމުގައި އެމްޑީޕީގެ އަންހެނުންގެ ގޮފީގެ ރައީސާ ރޮޒޭނާ އާދަމް ވިދާޅުވެއްޖެއެވެ.
ވެރިކަމުގެ ދައުރުގެ އަހަރަކާއި ގާތްވެފައިވާއިރު ވެރިކަންކުރާ ކޯލިޝަންގެ މައި ޕާޓީ އެމްޑީޕީއަށް ކުރިއަށް ރިޔާސީ އިންތިޚާބުގައި އޮތް އެންމެ ބޮޑު ގޮންޖެހުމަކީ ޕާޓީ ބައިބައި ވެފައިވުމެވެ. ޚާއްސަކޮށް އެމްޑީޕީގެ ރައީސް މުހައްމަދު ނަޝީދުގެ ފާޅުގައި ރައީސް ޞާލިހަށް ދެވަނަ ދައުރަކަށް ތާއީދު ނުކުރައްވާނެކަން ހާމަކުރި ހިސާބުންނެވެ.
އެމްޑީޕީ ތެރެއިން ސަރުކާރާއި ދެކޮޅަށް ކުރަމުންދާ މަސައްކަތްތަކާއިމެދު ކަންބޮޑުވުން ފާޅު ކުރައްވައި ރޮޒޭނާ ކުރެއްވި ޓުވީޓުގައި ވިދާޅުވީ، މިވަގުތު އެމްޑީޕީއަށް އޮތް އެންމެ ބޮޑު ގޮންޖެހުމަކީ އަމިއްލަ ޕާޓީތެރެއިން ސަރުކާރު ބަދުނާމުކޮށް އަގުވައްޓާލަން ކުރަމުންދާ މަސައްކަތް ކަމުގައެވެ. މިމަސައްކަތް އިދިކޮޅު ޕީޕީއެމްއިން ނުކުރާ ވަރަށް އެމްޑީޕީ ތެރެއިން ކުރަމުންދާކަމީ އޮތް ވަރަށް ބޮޑު ގޮންޖެހުމެއްކަމަށް ރޮޒޭނާ ވިދާޅުވިއެވެ.
މިވަގުތު އެމްޑީޕީއަށް އޮތް އެންމެ ބޮޑު ގޮންޖެހުމަކީ އެމްޑީޕީގައި ތިބެގެން އެމްޑީޕީ ސަރުކާރަށް ލިބެމުންދާ ތާއީދު ނަގާލުމަށް ޕާޓީ ތެރެއިން ބަޔަކު ރެޔާއި ދުވާލު ކުރަމުންދާ މަސައްކަތް. ރައްޔިތުންނަށް އޮޅުވާލާ ފިތުނަ އުފެއްދުމަށް ޕީޕީއެމް އަށް ވުރެއް ބުރަ މަސައްކަތް މިބޭފުޅުން އެބަކުރައްވާ.
– ރޮޒޭނާ ވިދާޅުވިއެވެ.
ދެފެކްޝަނަށް ބައިވެފައިވާ އެމްޑީޕީގެ ރައީސް ނަޝީދަށް ތާއީދުކުރާ މެމްބަރުން ދަނީ ސަރުކާރަށް ވަރަށްބޮޑަށް ފާޑުކިޔަމުންނެވެ. ޚާއްސަކޮށް ރާއްޖޭގެ އިޤްތިޞާދު މިވަގު އޮތް ހާމަލުން އަރައި ގަތުމަށް ސަރުކާރަށް އެކަށީގެންވާ ފިޔަވަޅު ނޭޅި ޖީއެސްޓީއާއި، ޓީޖީއެސްޓީ ބޮޑުކުރަން ނިންމާފައި ނިންމުމަށް ރައީސް ނަޝީދާއި، އެމަނިކުފާނަށް ތާއީދުކުރާ މެމްބަރުން ދަނީ ފާޑު ވިދާޅުވަމުންނެވެ.
މީގެ އިތުރުންވެސް ސަރުކާރުގެ އެކި ސިޔާސަތުތަކާއި، ސަރުކާރުގެ ކުންފުނިތަކަށާއި، ހިންގަމުންދާ މަޝްރޫޢުތަކަށްވެސް ރައީސް ނަޝީދަށް ތާއީދުކުރައްވާ ފަރާތްތަކުން ދަނީ ފާޑުވިދާޅުވަމުންނެވެ. އަދި ކުރިއަށް އޮތް ރިޔާސީ އިންތިޚާބުގައި އެމްޑީޕީއަށް އިންތިޚާބު ކާމިޔާބު ނުވާނެކަމަށްވެސް އެޕާޓީގެ އެންމު ބައެއް މެމްބަރުން ދަނީ ބުނަމުންނެވެ.
އެމްޑީޕީގެ މިހާރުގެ ލީޑަރޝިޕަށް އޮތް އެންމެ ބޮޑު ގޮންޖެހުމަކީ ނިމިދިޔަ އެޕާޓީގެ ޗެއާޕާސަންގެ އިންތިޚާބެވެ. އެއިންތިޚާބަށްފަހު ރައީސް ނަޝީދު ގެންދަވަނީ ވަރަށް ފާޅުގައި ސަރުކާރަށް ފާޑުވިދާޅުވަމުންނެވެ. އަދި ރާއްޖެއަށް އޮތް އެންމެ ރަނަގޅު ގޮތަކީ ރައީސް ޞާލިހު ދެވަނަ ދައުރަކަށް ކުރިމަތި ނުލެއްވުންކަމަށްވެސް ރައީސް ނަޝީދުވަނީ ވިދާޅުވެފައެވެ.
