ޕީޕީއެމްގެ ރައީސް ޔާމީން ޖަލަށް ނުލެވިގެން އުޅެނީ އެޕާޓީގެ ތެރޭގައި އިސްކޮށް ހަރަކާތްތެރިވާ މީހުން ތަކެއްކަމަށާއި، އެކަން ރައީސް ޔާމީނަށްވެސް ވަރަށް ރަނގަޅަށް ސާފުވާނެކަމަށް ޖުމްހޫރީ ޕާޓީން ބުނެފިއެވެ.

ޖުމްހޫރީ ޕާޓީން މިހެން ބުނީ އިދިކޮޅު ޕީޕީއެމް،ޕީއެންސީންނާއި ބައެއް މީޑިއާތަކުން، އެޕާޓީގެ ލީޑަރުގެ އިސްތަށިފުޅުގައި އަޅުވަމުން އަންނަ ތުހުމަތުތަކާއި ގުޅިގެން އިއްޔެ ބޭއްވި ނޫސްވެރިންގެ ބައްދަލުވުމުގައެވެ. އިއްޔެ ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ރައީސް އަބްދުއްރަހީމް (އަދުރޭ) ވިދާޅުވެފައިވަނީ ކުރީގެ ރައީސް ޔާމީން ޖަލަށްލުމަކީ ޖުމްހޫރީ ޕާޓީގެ ލީޑަރު ޤާސިމް އިބްރާހީމް ވެރިކަމަށް ވަޑައިގަތުމަށް ހުޅުވޭ ދޮރެއް ކަމަށް ބައެއް މީހުން ދެކޭ ކަމަށެވެ.

އެވާހަކައަށް ރައްދުދެއްވާ އަދުރޭ ވިދާޅުވީ އެފަދަ ވާހަކަ ތަކަކީ ޤާސިމް އަޑީގައި ހުންނަވައިގެން ފަތުރާ ވާހަކަތަކެއް ކަމަށެވެ. އަދި ރިޔާސީ ރޭހުގައި ރައީސް ޔާމީން އެކަހެރިކޮށް، އެއްލައިލުމަށް އެ ކުރައްވާ މަސައްކަތްތައް ކާބިޔާބުނުވެ، ދާނީ ފަނުފުލުންލައިގެން ކަމަށް ވިދާޅުވިއެވެ.

މިވާހަކަތަކަށް ރައްދު ދެއްވައި ޖޭޕީގެ ލީޑަރުގެ އެޑްވައިޒާ އިލްހާމް އަހުމަދު ވިދާޅުވީ އެ ބޭފުޅުން އަންނަނީ ޔާމީން ޖަލަށް ލުމަށް ޓަކައި އެ ބޭފުޅުންނަށް "ކުރެވުނުހާ މަސައްކަތެއް" ކުރަމުންނެވެ. އަދި މި ކަމުގެ ތަފްސީލް ރައީސް ޔާމީނަށް އެނގިވަޑައިގަންނަވާނެ ކަމަށް ވިދާޅުވިއެވެ.

ރައީސް ޔާމީން ޖަލަށް ލުމަށް ހުކުމެއް އައުމަކީ އެންމެ ބޮޑަށް ޕީޕީއެމްގެ އިސްވެރިން، އުފާކުރައްވާނެ ކަމެއް، ރިޔާސީ ރޭހުގައި ވާދަކުރެއްވުމަށް ޓަކައި ނުވަތަ އޭގެ އުންމީދުގައި ތިބީ ގާތްގަނޑަކަށް ހަތެއް ނުވަތަ އަށް ބޭފުޅުން ޕީޕީއެމްގައި އެބަތިއްބެވި.

– އިލްހާމް އަހުމަދު ވިދާޅުވިއެވެ.

އިލްހާމް ވިދާޅުވީ ރައީސް ޔާމީނަށްވެސް އަދި ދިވެހި އެހެން ރައްޔިތަކުވެސް ނިކަމެތިކޮށް، ދެރަ ގޮތެއް ވުމަށް ޖޭޕީއާއި އެ ޕާޓީގެ ލީޑަރު ގާސިމް އިބްރާހިމް ނޭދޭ ކަމަށެވެ. އަދި ޖުމްހޫރީ ޕާޓީގެ ވެރިކަމެއްގައި ސިޔާސީ މީހުންގެ ފަހަތުން ތާއަބަދު ދުވެ އަނިޔާ ދިނުމަށް އުޅުމަކީ ކުރާނެކަމެއް ނޫންކަމަށެވެ.

ޖޭޕީގެ އަސާސީ ގަވައިދުގައި އޮންނަ ގޮތުން ކައުންސިލުން އިތުރު ގޮތަކަށް ނުނިންމާހާ ހިނދަކު އެ ޕާޓީން ރިޔާސީ ކެންޑިޑޭޓެއް ނިކުންނާނެ ކަމަށާއި އެހެންނަމަވެސް އެއީ ކޮން ކެންޑިޑޭޓެއް ކަމެއް އަދި ކަނޑައަޅާފައި ނުވާ ކަމަށްވެސް އިލްހާމް ވިދާޅުވިއެވެ. ޖޭޕީން ގަބޫލުކުރަނީ ރިޔާސީ އިންތިޚާބު ކާމިޔާބު ކުުރުމަށް ގިނަ ބައެއްގެ އެހީ ބޭނުންވާ ކަމަށެވެ. އެގޮތުން އެޕާޓީން މަސައްކަތް ކުރާނީ ހުރިހާ ސިޔާސީ ޕާޓީއަކާއިވެސް ގުޅިގެން އެއްބައިވަން ކަމާއިއެކު އިންތިޚާބު ކާމިޔާބު ކުރުމަށްކަމަށެވެ.

ޕީޕީއެމްއިން އެޕާޓީއަށް އެކަނި ނިކުމެ އިންތިޚާބު ކާމިޔާބު ކުރެވޭނެ ކަމަށް ދެކުނު ނަމަވެސް ޖުމްހޫރީ ޕާޓީން އެކަން އެގޮތަށް ގަބޫލު ނުކުރާކަމަށް އިލްހާމް ވިދާޅުވިއެވެ. ނަމަވެސް އިންތިޚާބު ކާމިޔާބު ކުރެވޭނީ ގިނަ ރައްޔިތުންގެ ތާއީދާއި ލޯބި ލިބިގެންކަމަށް އޭނާ ވިދާޅުވިއެވެ.