އަންނަ އަހަރު އޮންނަ ރިޔާސީ އިންތިޚާބުގައި އިދިކޮޅު ޕީޕީއެމްގެ ރިޔާސީ ކެނޑިޑޭޓަކީ އެޕާޓީގެ ލީޑަރު އަދި ކުރީގެ ރައީސް ޔާމީންކަމަށާއި، އެއްވެސް ޕާޓީއެއް އަދި އެއްވެސް ލީޑަރެއްގެ ފަހަތަށް އަރާނެ އެއްވެސް ފޯމިއުލާއެއް ނެތްކަމަށް ޕީޕީއެމްއިން ބުނެފިއެވެ.
ޕީޕީއެމްއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް ވިދާޅުވީ ރައީސް ޔާމީން ޖަލަށްލާނެކަމަށްބުނެ، ބައެއް ފަރާތްތަކުން އެކި ވާހަކަ ދައްކައި، ޕީޕީއެމް އިން ޤާސިމާއި ބައިއަތު ހިފާނެކަމަށް ދައްކާ ވާހަކަތަކަކީ އެއްވެސް ހަގީގަތެއް ނެތް ވާހަކަތެއްކަމަށެވެ. ޕީޕީއެމްއިން ރިޔާސީ އިންތިޚާބާއި ކުރިމަތިލަނީ ވަރަށް ޔަގީންކަމާއިއެކު، އިންތިޚާބު ކާމިޔާބު ކުރުމަށް ކަމަށް އަދުރޭ ވިދާޅުވިއެވެ.
އަޅުގަނޑުމެންނަށް އެއްވެސް ޝައްކެއް ނެތް ރައީސް ޔާމީންގެ ނަން ވޯޓު ކަރުދާހުގައި އޮންނާނެ ކަމާއިމެދު. މިޕާޓީގެ ރިޔާސީ ކެނޑިޑޭޓަކީ ރައީސް ޔާމީން. މިޕާޓީން އެހެން ސިޔާސީ ލީޑަރެއްގެ ފަހަތަށް އަރާނެ އެއްވެސް ފޯމިއުލާއެއް ނޯންނާނެ.
– އަދުރޭ ވިދާޅުވިއެވެ.
އަދުރޭ ވިދާޅުވީ ރައީސް ޔާމީން ޖަލަށް ލުމަކީ ސިޔާސީ ގޮތުން ވަރަށް ގިނަ ބަޔަކު ކުރަމުންދާ މަސައްކަތެއްކަމަށެވެ. އެކަމުގައި ކޯޓުތަކަށް ނުފޫޒު ފޯރުވައިގެންވެސް އެމަނިކުފާނު ޖަލަށް ލުމަކީ ސިޔާސީ މީހުން ވަރަށް ބޭނުންވާ ކަމެއްކަމަށެވެ. ނަމަވެސް އިންސާފުވެރި ޝަރީއަތަކުން އަދި މިހާރު ކުރިއަށްދާ ޝަރީއަތު ގޮސްފައިވާ ހިސާބަށް ބަލާއިރުވެސް ރައީސް ޔާމީންގެ މައްޗަށް ހުކުމެއް ނާންނާނެކަމީ ކަށަވަރު ކާމެއްކަމަށް އަދުރޭ ވިދާޅުވިއެވެ.
ރައީސް ޔާމީން ޖަލަށް ލުމަށް ޙައްޤު ނޫން ގޮތުގައި މިހާރުވެސް ޤާސިމް އާއި އަދި ވާދަވެރި ފަރާތްތަކުން އެގެންދަނީ މަސައްކަތް ކުރަމުން، އެކަން ކާމިޔާބެއް ނުވާނެ. ޕީ.ޕީ.އެމް ގެ 2023 ގެ ރިޔާސީ ކެންޑިޑޭޓަކީ ރައީސް ޔާމީން، ރައީސް ޔާމީންގެ ނަންފުޅު ވޯޓު ކަރުދާހުގައި އޮންނާނެ.
– އަދުރޭ ވިދާޅުވިއެވެ.
އަދުރޭ ވިދާޅުވީ ރައީސް ޔާމީން ޖަލަށް ލައިގެން ޖުމްހޫރީ ޕާޓީ އަދި އެހެން ޕާޓިއަކުންވެސް އަދި ލީޑަރަކުވެސް އެމީހުންގެ ފަހަތަށް ޕީ.ޕީ.އެމް ޕީ.އެން.ސީ އިން އަރާފާނެ ކަމަށް ނުވަތަ އެމީހުންގެ ރިޔާސީ ކެންޑިޑޭޓަށް ތާއީދުކޮށް އެކޯލިޝަން ފަހަތަށް ޖެހޭނެކަމަށް ހީކުރުމަކީ ދެކޭ ހުވަފެނެއް ކަމަށެވެ. އިންޑިއާގެ ނުފޫޒުގައި ޖެހި ރާއްޖޭގެ މިނިވަންކަން ނާގާލި އެއްވެސް ޚާއިނެއްގެ ފަހަތަށް ޕީ.ޕީ.އެމް އިން ނާރާނެ ކަމަށް އަދުރޭ ވިދާޅުވިއެވެ.
އޭނާ ވިދާޅުވީ ރައީސް ޔާމީނަށް ވާދަ ނުކުރެވޭނެ ޙަލަތަކަށް އައި ނަމަވެސް، ޕީ.ޕީ،އެމް އިން ކަންކުރާނެ ގޮތް ޕީ.ޕީ.އެމް ގެ އަސާސީ ޤަވާއިދުގައި އޮންނާނެ ކަމަށެވެ. އެއްވެސް ހާލެއްގައި ބަޔަކާއި ކޯލިޝަންހަދައި ބައެއްގެ ފަހަތަށް އެރުމަކީ ޕީޕީއެމްއިން ކުރާނެ ކަމެއްނޫންކަމަށް އަދުރޭ ވިދާޅުވިއެވެ.
