ޖެޓް ފިއުލް ވިއްކުން ކޮންޓްރޯލް ކުރި ނަމަވެސް ފްލައިޓް އޮޕަރޭޝަންތައް އެއްވެސް ހުރަހަކާނުލާ މެނޭޖްކުރެވޭނެ ކަމަށް މޯލްޑިވްސް އެއަރޕޯޓްސް ކޮމްޕެނީން ވިދާޅުވެއްޖެއެވެ.
އެކުންފުނިން މިހެން ވިދާޅުވީ މޯލްޑިވްސް އެއަރޕޯޓްސް ކޮމްޕެނީ އާއި ސްޓޭޓް ޓްރޭޑް އޯގަނައިޒޭޝަން (އެސްޓީއޯ) ގުޅިގެން ބޭއްވި ޖޮއިންޓް ޕްރެސް ކޮންފަރެންސްއެއްގައެވެ. ޖެޓް ފިއުލް ވިއްކުން ކޮންޓްރޯލް ކުރިކަން މިއަދު ހާމަކުރިއިރު، މީގެ ދެ ދުވަހެއްކުރިން މިވާހަކަ ދެއްކުމުން އެމްއޭސީއެލްއިން ވަނީ އެކަން ދޮގުކޮށްފައެވެ.
ޖެޓް ފިއުލް ލިބުމުގައި ހުރި ދަތިތަކާއި ގުޅިގެން އެމްއޭސީއެލްގައި ބޭއްވި މިޕްރެސްކޮންފަރެންސްގައި ވާހަކަދައްކަވަމުން އެމްއޭސީއެލްގެ ޑެޕިއުޓީ މެނޭޖިންގ ޑިރެކްޓަރ އިބްރާހީމް ޠާހާ ވިދާޅުވީ އެކުންފުނީގެ ފިއުލް ކެޕޭސިޓީއަކީ 13 މިލިއަން ލީޓަރުގެ ކެޕޭސިޓީއެއް ކަމަށާއި، މިދުވަސްކޮޅު ފްލައިޓްތައް އިތުރުވެފައިވާތީ އިތުރަށް ތެޔޮ ބޭނުންވާކަމަށެވެ. އެހެންނަމަވެސް ތެލުގެ ޝިޕްމަންޓް ލިބެންދެން މެނޭޖްކުރެވޭނެ ކަމަށް އޭނާ ވިދާޅުވިއެވެ.
In the press briefing MACL has reassured that there will be no disruptions on flight operations due to control sale of Jet A-1. https://t.co/oPQ1Ar7uc9
— Maldives Airports Company Ltd – MACL (@MACLmedia) July 5, 2022
ސްރީލަންކާގެ ކޮލަމްބޯ އެއަރޕޯޓުން މިވަގުތު ޖެޓް ފިއުލް ލިބެން ނެތުމުން ވީއައިއޭއިން ފިއުލް ނަގާ ވަރު ވަރަށް ބޮޑުތަނުން އިތުރުވެފައިވާކަން ފާހަގަކުރައްވާ ޠާހާ ވިދާޅުވީ މިއީ ދިމާވެފައިވާ ވަރަށް ބޮޑު ގޮންޖެހުމެއް ކަމަށެވެ. އެހެންނަމަވެސް ކޮންޓްރޯލްޑް ނިޒާމެއްގެ ތެރެއިން އެހެން އެއަރލައިންތަކަށް އެހީތެރިކަން ފޯރުކޮށްދެމުންދާ ކަމަށް އޭނާ ވިދާޅުވިއެވެ.
މިޕްރެސް ކޮންފަރެންސްގައި ވާހަކަ ދައްކަވަމުން އެސްޓީއޯގެ މެނޭޖިންގ ޑިރެކްޓަރ ހުސެއިން އަމްރު ވިދާޅުވީ ތެޔޮ ލޯޑް ކުރުމަކީވެސް ވަރަށް ގިނަ ވަގުތުތައް އެކަމަށް ހޭދަވާ ކަމެއްކަމަށާއި އެއްމަސް ކުރިން އެކަން ކުރުމަށް އަންގަން ޖެހޭނެކަމަށެވެ. އަދި މިކަމަށް ދިމާވާ ދަތިތަކާއިހުރެ ޑިލޭތަކެއް ހުރި ނަމަވެސް އެއީ މައްސަލައެއް ނޫންކަމަށާއި އަދި އެއީ މީގެ ކުރިންވެސް ދިމާވާ ކަމެއްކަމަށް އަމްރު ވިދާޅުވިއެވެ.
ދުނިޔޭގެ ބާޒާރުގައި ތެލުގެ އަގު އުފުލެމުންދާތީ އެސްޓީއޯއިން ވިއްކާ ތެލުގެ އަގު ބޮޑުކޮށްފައިވާއިރު މިހާރު ޕެޓްރޯލް ލީޓަރެއް ލިބޭނީ 16.55 ރުފިޔާއަށް އަދި ޑީސަލް ލީޓަރެއް ލިބޭނީ 16.77 ރުފިޔާއަށެވެ. މިފަހަރު އަގަށް އައި ބަދަލާއެކު ޕެޓްރޯލް ލީޓަރަކުން 1.95 ރުފިޔާ އަދި ޑީސަލް ލީޓަރަކުން 1.97 ރުފިޔާ ވަނީ ބޮޑުވެފައެވެ.
