އެސްޓިއޯއިން ސަބްސިޑައިންސް ކޮށްގެން އާންމު ރައްޔިތުންނަށް ވިއްކާ ތެޔޮ އަގުހެޔޮކޮށް ގަނެގެން، ރިސޯޓުތަކަށް ތެޔޮ ވިއްކަމުންދާކަން ހާމަ ވުމާއި ގުޅިގެން، މިހާރު އުފެދިފައިވާ ތެލުގެ ކަޅު ބާޒާރު ހުއްޓުވުމަކަށް ގެނައުމުގެ ގޮތުން، އެސްޓިއޯއިން ޔެތޮ ވިއްކުން ކޮންޓްރޯލް ކޮށްފިއެވެ.
އިސްޓިއޯއިން ހާމަ ކޮށްފައިވާ ގޮތުގައި، ފިއުލް ސަޕްލައި މޯލްޑިވްސް (އެފްއެސްއެމް) އިން ސަބްސިޑައިސް ކޮށްފައި ހުންނަ ތެޔޮ ގަތުމަށްފަހު، އަގު ބޮޑުކޮށް ރިސޯޓުތަކަށް ތެޔޮ ވިއްކަމުން އަންނަކަން ފާހަގަ ވުމާއެކު އެކަން ހުއްޓުވުމަށްޓަކާ އެކުންފުނިން މިހާރު ފިޔަވަޅުތައް އަޅަމުން އަންނަ ކަމުގައެވެ.
އެސްޓީއޯގެ އެމްޑީ ހުސެއިިން އަމްރު ވިދާޅުވެފައި ވާގޮތުގައި، ދުނިޔޭގެ ބާޒާރުގައި ތެލުގެ އަގު އާދަޔާ ޚިލާފަށް އުފުލިގެން ގޮސްފައި ވުމާއެކު، އާންމު ރައްޔިތުންނަށް އުފުލާންޖެހޭ ބުރަ ކުޑަ ކުރުމުގެ ގޮތުން އެފްއެސްއެމްގެ ފިއުލް ޝެޑްތަކުންނާއި، މަސްވެރިންނަށާއި، ރަށްރަށުގައި ތެޔޮ ވިއްކަމުންދާ ފަރާތްތަކަށް އެކުންފުނިން ތެޔޮ ވިއްކަމުންދަނީ ސަބްސިޑައިސް (ހެޔޮ) އަގެއްގައި ކަމުގައެވެ. އެހެންނަމަވެސް އެކުންފުނިން އަދިވެސް ރިސޯޓުތަކަށް ތެޔޮ ވިއްކަމުންދަނީ ހަމަ އަގުގައެވެ.
އެސްޓިއޯއިން އާންމުނަށް ތެޔޮ ވިއްކާ އަގު ހެޔޮ ކުރުމާއެކު، އާންމު ބައެއް ފަރާތްތަކުން މި ތެޔޮ ގަނެގެން ރިސޯޓުތަކަށް ވިއްކަން ފަށާފައި ވާކަން ފާހަގަވުމާއެކު މިކަން ހުއްޓުވާ ރައްޔިތުންނަށް ހެޔޮ އަގުގައި ދެމެހެއްޓެވިނި ގޮތެއްގައި ތެޔޮ ފޯރުކޮށް ދިނުމުގެ ގޮތުން ރަށްރަށުގައި ތެޔޮ ވިއްކާ ފަރާތްތަކަށް އާންމުކޮށް ބޭނުންވާ ވަރަށްވުރެ އިތުރަށް ތެޔޮ ދޫ ނުކުރާނެ ވާހަކަ އަންގާފައި ވާނޭކަމަށްވެސް ކުންފުނީގެ އެމްޑީ އަދި ސީއީސޯ އަމްރު ވިދާޅުވެފައި ވެއެވެ.
ރަޝިއާއިން ޔޫކުރެއިން އަށް ދޭންފަށާފައިވާ އުދުވާނީ ހަމަލާތަކާއި ގުޅިގެން ދުނިޔޭގެ ބާޒާރުގައި ތެލުގެ އަގުވަނީ އިންތިހާއަށް އުފުލިގެން ގޮސްފައެވެ.
