ސްޓެލްކޯއަކީ ރައްޔިތުންގެ ކުރިމަތީގައި މަގުބޫލު، ރައްޔިތުން ގަބޫލު ކުރާ ޚިދުމަތެއް ދޭ ކުންފުންޏަކަށް ހަދާނެ ކަމަށް އެކުންފުނީގެ މެނޭޖިން ޑިރެކްޓަރ އަހުމަދު ޝަރީފް ވިދާޅުވެއްޖެއެވެ.
ޝަރީފް މިހެން ވިދާޅުވީ ސްޓެލްކޯގެ މުވައްޒަފުންނަށް ޚާއްސަކޮށްގެން ކުރިއަށްގެންދާ ކަސްޓަމަރ ސާވިސް އެކްސެލެންސް ޓްރެއިނިންގ ޕްރޮގްރާމް ފެށުމުގެ ރަސްމިއްޔާތުގައި ވާހަކަދައްކަވަމުންނެވެ.
ސްޓެލްކޯގެ ފަރާތުން ކުރިއަށްގެންދާ ޓްރެއިނިން ވޯކްޝޮޕް އިފްތިތާހުކުރުމުގެ ރަސްމިއްޔާތުގައި ވާހަކަދައްކަވަމުން މެނޭޖިން ޑިރެކްޓަރ އަހުމަދު ޝަރީފް ވިދާޅުވީ ސްޓެލްކޯގެ ޚިދުމަތުގެ ފެންވަރު މަތިކޮށް ޚިދުމަތުގެ ވައްޓަފާޅި ބަދަލުކުރަން ޖެހިފައިވާކަމަށެވެ. އެގޮތުން އެންމެ މިނިޓަކަށް ކަރަންޓު ކެޑުނު ނަމަވެސް ސްޓެލްކޯ ހިންގޭކަމަށް ނުވާނެކަމަށާއި، ކަރަންޓު ބިލް ކަސްޓަމަރުން އަތައް ލިބޭ ކޮންމެ ފަހަރަކު އެ ބިލް ބޮޑުވާނަމަ ސްޓެލްކޯއަކީ ހިންގުތެރި ތަނަކަށްވެސް ނުވާނެކަން ޝަރީފް ފާހަގަ ކުރެއްވިއެވެ. އަދި ރައްޔިތުންނަށް ގަބޫލު ނުކުރެވޭ ވަރަށް ކަރަންޓް ބިލް ބޮޑުވާނަމަ ކުންފުނީގައި ތިބި މީހުންނަކީ ކަމަށް ޤާބިލް ބަޔެއް ނޫންކަމަށް ބުނެ ނޭދެވޭ ވާހަކަތައް އަމާޒުވެގެންދާނެކަމަށްވެސް ޝަރީފް ވިދާޅުވިއެވެ.
ކުންފުނިން މިކަމާއިމެދު ވިސްނާ ފިކުރުކޮށް އަދި މި ސަގާފަތް ބަދަލު ވާނެ ގޮތެއް ހޯދަން އެބަ ޖެހޭ. އަޅުގަނޑުގެ ނަޒަރުގަ މިއީ ނުވާނެ އުދަގޫކަމެއް ނޫން. މިކަން ހާސިލްކުރުމަށްޓަކައި ފުރަތަމަ ބޭނުންވަނީ ހެޔޮ ނިޔަތެއްގަ އެންމެން ގުޅިގެން މިމަސައްކަތް ކުރުން.
– ސްޓެލްކޯގެ މެނޭޖިންގ ޑިރެކްޓަރ ވިދާޅުވިއެވެ.
ސްޓެލްކޯގެ 70 އެތައް އަހަރެއްވީ ދިގު ތާރީޚުގައި އޮތް ސަގާފަތް ބަދަލުކުރަންޖެހޭކަމަށާއި ޚިދުމަތް ލިބޭ ފަރާތްތަކުން ބޭނުންވާ ގޮތަށް ޚިދުމަތްދޭ އުސޫލު ބަދަލުކުރަން ޖެހޭކަމަށް ޝަރީފް ވަނީ ވިދާޅުވެފައެވެ. އަދި ސްޓެލްކޯއިން މިހާރުވެސް ރައްޔިތުން އެދޭފަދަ ޚިދުމަތްދޭ ކުންފުންޏަކަށް ހެދުމަށްޓަކައި ކުންފުނީގެ މުވައްޒަފުންނާއެކު ގިނަ މަސައްކަތްތަކެއް ކުރަމުން އަންނަކަމަށް ޝަރީފް ވިދާޅުވިއެވެ.
ސްޓެލްކޯއިން ކުރިއަށްގެންދާ ކަސްޓަމަރ ސާވިސް އެކްސެލެންސް ޓްރެއިނިންގ ޕްރޮގްރާމަކީ ކުންފުންޏާ ކަސްޓަމަރުންނާއި ދެމެދު އޮންނަ ގުޅުން އިތުރަށް ބަދަހިކޮށް ކަސްޓަމަރުން އިތުބާރު ކުރާ ފަދަ ކުންފުންޏަކަށް ހެދުމަށްޓަކައި ކުރިއަށްގެންދާ ޕްރޮގްރާމެކެވެ. މި ޕްރޮގްރާމްގައި ކުންފުނީގެ 239 މުވައްޒަފަކަށް ޓްރެއިނިންގ ދިނުމަށްވަނީ ހަމަޖެހިފައެވެ.
