ރަސޫލާއަށް ފުރައްސާރަކުރި، އިންޑިއާގެ ވެރިކަންކުރާ ހިންދޫންގެ ހައްދު ފަހަނައަޅާފައިވާ ބީޖޭޕީގެ ކުރީގެ އިސްތަރުޖަމާން ނުޕުރު ޝަރުމާއަށް އިންޑިއާގެ ސުޕްރީމް ކޯޓުގެ ބޮޑެތި ފާޑު ކިޔުންތަކެއް އަމާޒު ވެއްޖެއެވެ.
އިންޑިއާގެ ސުޕްރިމް ކޯޓުން ބުނެފައިވަނީ "އޭނާގެ ވިހަ ދުލުން މުޅި އިންޑިއާގައި ވަނީ ހުޅު ރޯކޮށްފައި" ކަމުގައެވެ.
އިންޑިއާގެ ސުޕްރިމް ކޯޓުން ވަރަށް މަދުން ނޫނީ ފާޑު ނުކިޔާ މޭރުމަކުން ނުޕުރު ޝަރުމާއަށް ފާޑު ކިޔަމުން ކޯޓުން ބުނެފައިވަނީ އޭނާ އިންޑިއާގެ ކިބައިން މާފަށް އެދެން ޖެހޭނެ ކަމުގައެވެ.
"އޭނާ މުޅި ގައުމުގެ އިހުސާސްތަކުގައި ހުޅު ރޯކޮށްފައި ވާގޮތުން، މިހާރު ގައުމުގައި ހިގަމުންދާ ހުރިހާ ކަމެއްގެ ޒިންމާ އުފަލާންޖެހޭ ހަމައެކަނި މި އަންހެނާ،" ސުޕްރީމް ކޯޓުގެ ފަނޑިޔާރުން ވިދާޅުވެފައި ވެއެވެ.
ޕީޖޭޕީގެ އިސް ތަރުޖަމާން ރަސޫލާއަށް ފުރައްސާރަ ކުރުމާއި ގުޅިގެން އިންޑިއާއާއި އަރަބި އިސްލާމީ ގައުމުތަކާ ދެމެދު އޮންނަ ގުޅުންތަކަށް ވަރަށް ބޮޑަށް ބުރޫ އަރާ، އިސްލާމީ ބޮޑެތި ބައެއް ގައުމުތައް ކަމަށްވާ، ސައުދީ އަރަބިއާއާއި، އިރާންއާއި، ގަތަރާއި ކުވައިތުންވަނީ އިންޑިއާގެ ވެރިކަންކުރާ ޕާޓީގެ އިސް އޮފިޝަލުގެ މިއަމަލު ކޮށްވެރިކޮށް ބަޔާންތައްވެސް ނެރެފައެވެ. އަދި ބައެއް ގައުމުތަކުން ވަނީ އެގައުމުތަކުގައި ތިއްބަވާ އިންޑިއާގެ ސަފީރުން ފޮރިންގ މިނިސްޓްރީއަށް ހާޒިރު ކޮށްފައެވެ.
މި ހަފްތާގެ އަންގާރަ ދުވަހު، މުސްލިމުންގެ ދެމީހަކު، ރަސޫލާއަށް ފުރައްސާރަ ކުރި ހިންދޫންގެ މީހަކު މަރާލުމާއި ގުޅިގެން އިންޑިއާގައި ވަނީ ބޮޑެތި ހަމަނުޖެހުންތަކެއް އުފެދިފައެވެ. އަދި ސޯޝަލް މީޑިއާގައި ދައުރުވަމުންދާ، މިމީހާ މަރާލި ހާދިސާގެ ވީޑިއޯ ދައުރުވުން ހުއްޓުވުމަށްޓަކާ ސަރުކާރުގެ މުވައްސަސާތަކުން ވަނީ އިންޑިއާގެ ބައެއް ސިޓީތަކުގައި މިހަފްތާގައި އިންޓަރނެޓްގެ ޚިދުމަތް މެދު ކަނޑާލާފައެވެ.
"އޭނާގެ ވިހަ ދުލުން ވަނީ ހުރިހާ ބާވަތެއްގެ ޒިންމާދާރުކަމެއް ނެތް ވާހަކަ ޓީވީގައި ދައްކާ، މުޅި ގައުމުގައި ހުޅު ރޯކޮށްފަ. އެހެންނަމަވެސް އޭނާ އަދިވެސް ދައުވާ ކުރަމުންދަނީ އޭނާއަކީ 10 އަހަރުގެ ތަޖުރިބާހުރި ގާނޫނީ ވަކީލެއް ކަމުގަ. އޭނާ ދައްކާފައިވާ ވާހަކައަށް މުޅި އިންޑިއާގެ ކިބައިން އޭނާ މިހާރުން މިހާރަށް މާފަށް އެދެން ޖެހޭނެ،" ނުޕުރު ޝަރުމާ އިންޑިއާގެ ސުޕްރިމް ކޯޓަށް ހުށަހެޅި ޕެޓިޝަން ގަބޫލު ނުކުރުމަށް ނިންމަމުން އިންޑިއާގެ ސުޕްރިމް ކޯޓުގެ ފަނޑިޔާރުން ވިދާޅުވެފައި ވެއެވެ.
