ކިންގް ސަލްމާން މިސްކިތުގެ މިމްބަރަށް އަރައި އަޑުގަދަ ކުރިމީހަކު ހައްޔަރުކޮށްފިއެވެ.
ފުލުހުން ބުނެފައިވަނީ މިއަދު ހުކުރު ގަޑީގައި ސަލްމާން މިސްކިތުގެ މިމްބަރަށް އަރައި އަޑުގަދަ ކުރި މީހަކު ހައްޔަރުކޮށްފައިވާކަމަށެވެ. އަޑުގަދަކޮށްފައިވަނީ އުމުރުން 43 އަހަރުގެ ދިވެހި ފިރިހެނެއްކަމަށް ފުލުހުން ވަނީ ބުނެފައެވެ. އޭނާ ހައްޔަރުކުރިއިރު ހުކުރަށް ގޮސް ގިނަ އަދަދެއްގެ ބަޔަކު މިސްކިތުގައި ތިއްބެވެ.
މިމީހާ މިސްކިތަށް އަރީ އައިއެސްއައިސްގެ ލޯގޯ ޖެހި ޖުއްބާއެއް ލައިގެންކަމަށް މަންޒަރުދުށް މީހުން ވަނީ ބުނެފައެވެ. އޭނާ މިމްބަރަށް އެރިއިރު ހަތިމެއްވެސް އޮތްކަމަށެވެ. މިމްބަރަށް އަރައި ފާތިޚާ ކިޔެވުމަށްފަހު އޭނާ ވާހަކަދައްކަން ފެށިތާ ގިނަ އިރުނުވަނީވެސް ފުލުހުން ވަނީ އޭނާ ހައްޔަރުކޮށްފައެވެ.
މިސްކިތްތަކުގައި ނަމާދުކޮށް، ޚުތުބާދީ ދީނީ ވައުޟު ބުނެވޭނީ އިސްލާމިކް މިނިސްޓްރީން ހުއްދަ ދޫކުރާ ފަރާތްތަކަށެވެ. މިމީހާ އަކީ މިފަދަ އެއްވެސް ހުއްދައެއް އޮތްމީހެއް ނޫންކަމަށް ފުލުހުން ވަނީ ބުނެފައެވެ.
މިމައްސަލަ ފުލުހުން ތަހުގީގް ކުރަމުންދާކަމަށް ވަނީ ބުނެފައެވެ.
