އިނގިރޭސި ޕްރިމިއަރ ލީގުގެ ލިވަޕޫލަށް ކުޅެމުންދިޔަ ޖަޕާންގެ ފޯވާޑް ޓަކޫމީ މިނަމީނޯ ފްރާންސްގެ މޮނާކޯއަށް ބަދަލުވިކަން އެ ކުލަބުން ހާމަކޮށްފިއެވެ.
މޮނާކޯއިން މިނަމީނޯ ގެންގޮސްފައިވަނީ ހަތަރު އަހަރު ދުވަހުގެ އެއްބަސްވުމެއްގެ ދަށުން 15.5 މިލިއަން ޕައުންޑަށް ކަމަށް މައުލޫމާތުލިބެއެވެ.
2020 ވަނަ އަހަރު އޮސްޓްރިއާގެ ރެޑްބުލް ސާލްސްބާގް އިން ލިވަޕޫލަށް 7.25 މިލިއަން ޕައުންޑަށް ބަދަލުވި މިނަމީނޯ ގެންދިއުމަށް ގިނަ ކްލަބްތަކަކުން މީގެކުރިން ޝައުގުވެރިކަން ފާޅުކޮށްފައިވެއެވެ. މޮނާކޯއަށް ބަދަލުވުމަށް ފަހު މިނަމީނޯ ބުނީ އެ ކުލަބުގެ ދުރުރާސްތާ ޕްލޭނުގެ ބަޔަކަށް ވެވުމުން ވަރަށް ހިތްހަމަ ޖެހޭކަމަށެވެ.
ލިވަޕޫލުގައި ހޭދަކުރި މުއްދަތުގައި އޭނާވަނީ ކުޅުނު 55 މެޗްގައި 14 ލަނޑު ޖަހާދީފައެވެ. ލިވަޕޫލްގެ ކޯޗް ޔާގެން ކްލޮޕް ބުނީ މިނަމީނޯ ދިއުމުން ދެރަވާކަމަށާއި ނަމަވެސް އެއީ އޭނާއަށް ވަރަށް ރަނގަޅު ބަދަލެއް ކަމަށެވެ. އަދި މިއީ އޭނާއަށް ހައްގު ބަދަލެއް ކަމަށްވެސް ކްލޮޕް ބުންޏެވެ. މިނަމީނޯއަކީ މި ސީޒަންގައި ލިވަޕޫލްގެ ފޯވަޑް ލައިނުން އެހެން ޓީމްތަކަށް ބަދަލުވި ތިންވަނަ ކުޅުންތެރިޔާއެވެ. މީގެކުރިންވަނީ ސާޑިއޯ މާނޭ އާއި ޑިވޮކް އޮރީގީ އެހެން ޓީމްތަކަށް ބަދަލުވެފައެވެ.
