ރައްޔިތުންގެ މަޖިލިސް ހިންގަމުންދަނީ މަޖިލިސް ހިންގުމަށް އޮތް ހަމަޔާއި އުސޫލުން ބޭރުން ކަމަށް ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ޤާސިމް އިބްރާހިމް ވިދާޅުވެއްޖެއެވެ.

ދޮޅު އަހަރުގެ ތެރޭގައި މަޖިލީހުގެ ޖަލްސާތަކަށާއި، ކޮމެޓީތަކަށް ވަޑައިނުގެން ހުންނެވުމަށްފަހު ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ޤާސިމް އިބްރާހިމް މަޖިލީހުގެ ޖަލްސާއަކަށް ވަޑައިގެންނެވީ މިދިޔަ އަހަރުގެ އޮގަސްޓް މަހުގެ ތެރޭގައެވެ. އޭގެ ފަހުން ޤާސިމް މަޖިލީހަށް ވަޑައިނުގަންނަވައެވެ. ޤާސިމް މަޖިލީހަށް ހާޒިނުވާ ސަބަބާއި ގުޅޭގޮތުން މީގެ ކުރިން ވިދާޅުވީ މަޖިލީހަށް ވަޑައިނުގަންނަވަނީ ކޯވިޑްގެ ހައިރިސްކު ބޭފުޅަކަށް ވުމުންކަމަށެވެ.

މަޖިލީހަށް ހާޒިނުވާ ސަބަބާއި ގުޅޭގޮތުން ރޭ ޖުމްހޫރީ ޕާޓީން ބޭއްވި ޖަލްސާގައި ވާހަކަ ދައްކަވަމުން ޤާސިމް ވިދާޅުވީ މަޖިލީހުގައި ކަންކަން ހިނގަމުންދަނީ އޮންނަ ހަމަޔާއި އުސޫލުގެ ބޭރުންކަމަށެވެ. މަޖިލިސް ހިންގުމަށް ގަވާއިދާއި އުސޫލެއް އޮތްނަމަވެސް މަޖިލިސް ހިންގަނީ އެޔަކަށް ނުބަލައިކަމަށް ޤާސިމް ވިދާޅުވިއެވެ. އޭނާ ވިދާޅުވީ މަޖިލީހަށް ދިޔަޔަސް އަދި ނުދިޔަޔަސް އެތަނުން ކުރެވޭނެ އެއްވެސް ކަމެއް ނެތްކަމަށެވެ.

ކަންކަން ހަމައިން، އިންސާފުން ނެއްޓުނީމާ އަޅުގަނޑަށް ވަރަށް އުދަނގޫވޭ. އެއުދަނގޫވާތީ އަޅުގަނޑަށް އެތަނަށް މަޖިލީހުގައި ނީދެވެނީވެސް މިހާރު. މަޖިލީހަށް ނުދެވެނީވެސް. އެތަނުގައި ގަވާއިދެއް އޮތަސް އެއަށް ހުރުމަތްތެރިކޮށް ހިތިގެން ކަންތައްތައް ދާމަންޒަރެއް އަޅުގަނޑުމެންނަކަށް ނުފެނޭ. ދެން އެތާގައި ވާހަކަދައްކައި، ގެރިޖައްސަން ތިބި މީހުންގެ ހާލު އަޅުގަނޑުމެންނަށް އެބަފެނޭ. ހަމައިގަ ތިބެނީ ކިތައްމީހުންތޯ އެތަނަށް އައިސް.

– ޤާސިމް ވިދާޅުވިއެވެ.

ޤާސިމް ވިދާޅުވީ މިހާރު އޮތް މަޖިލީހަށް މެމްބަރުން އިންތިޚާބުކުރިއިރުވެސް އެއްޕާޓީއަކަށް ބޮޑު އައުލަބިއްޔަތެއް ދީފިނަމަ ކަންކަން ވާނެގޮތް ވިދާޅުވިކަމަށެވެ. ނަމަވެސް އެކަން ގަބޫލުނުކޮށް ގިނަ ގޮޑިތަކެއް އެއްޕާޓީއަކަށް ދިނުމުން މިހާރު އޭގެ ނަތީޖާ ފެންނަމުންދާކަމަށް ޤާސިމް ވިދާޅުވިއެވެ.

ރައްޔިތުންގެ މަޖިލީހުގެ މެމްބަރުން ހޮވިއިރު އަޅުގަނޑު ބުނިން މިހާގިނަ މެމްބަރުން އެއްޕާޓީއަކަށް ޢައުލަބިއްޔަތު ލިބިއްޖިއްޔާ ދެން ވާނީ ކިހިނެއްކަން. އޭރުގެ ރެކޯޑިން އަޑުއައްސަވާލެއްވީމަ އެނގޭނެ. އަޅުގަނޑު ރައްޔިތުންނަށް ދެންނެވިން ވަރަށް އިހުލާސްތެރިކަމާއި އެކީގައި. ދެން މިއަދު އަޅުގަނޑުމެން އެކި ގޮތްގޮތަށް އަޅުގަނޑުމެންގެ މިނިވަންކަމޭ، އިސްތިގުލާލޭ ކިޔަސް، އަދި އެނޫން އެހެން އެއްޗެކޭ ކިޔަސް ކިޔާނެ އެއްޗެއް ކިޔަންވީ ދައްކާނެ ވާހަކައެއް ދައްކަންވީ. އަޅުގަނޑު ހަމަ ގައިމުވެސް އަޅުގަނޑަށް އެގޭމިންވަރަކުން ހައްގުބަސް ބުނަން.

– ޤާސިމް ވިދާޅުވިއެވެ.

ރައްޔިތުންގެ މަޖިލީހުގެ ޖަލްސާތައް މަޖިލިސް ރައީސް މުހައްމަދު ނަޝީދު ގެންދަވާ ގޮތާއިމެދު މަޖިލީހުގެ ބައެއް މެމްބަރުން ހިންތަމަ ނުޖެހެއެވެ. ޚާއްސަކޮށް މަޖިލީހުގެ މެމްބަރުން ކުރައްވާ ބަހުސްގެ ތެރެއަށް މަޖިލިސް ރައީސް ވެންނެވުމާއި، ބައެއް މައްސަލަތައް މަޖިލިސް ރައީސް ބޭނުންވެއްޖެނަމަ އެޖެންޑާ ނުކުރުންފަދަ ކަންކަން އުސޫލުން ބޭރުން ހިންގާކަމުގެ ކަންބޮޑުވުން މެމްބަރުން ވަނީ މިފަހުންވެސް ފާޅުކޮށްފައެވެ.

މަޖިލީހުގެ ސާފު އައުލަބިއްޔަތު 65 މެމްބަރުންނާއިއެކު އެމްޑީޕީއަށް އޮތް ނަމަވެސް އެމްޑީޕީގެ މެމްބަރުން ވަނީ ރައީސް ޞާލިހަށާއި، ރައީސް ނަޝީދަށް ބެހިފައެވެ. މީގެ ތެރެއިން ރައީސް ނަޝީދަށް ތާއީދު ކުރާ މެމްބަރުންދަނީ ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.