އެެމެރިކާގެ ރައީސް ޖޯ ބައިޑްންގެ އަނބކަނބަލުން ޖިލް ބައިޑްންއާއި ދަރިކަނބަލުން އޭޝްލީ ރަޝިއާއަށް ވަނުން އެގައުމުން މަނާ ކޮށްފިއެވެ.
ރަޝިއާއިން މީގެ ކުރިންވަނީ، އެމެރިކާގެ ރައީސް ޖޯ ބައިޑްންގެ އާއި އެގައުމުގެ ސެކެޓްރީ އޮފް ސްޓޭޓް އެންތަނީ ބްލިކަންގެ އިތުރުން އެމެރިކާގެ ގާނޫނުހަދާ މަޖިލުހުގެ އެތައް ސަތޭކަ މެމްބަރުންނެއްވެސް ރަޝިއާއަށް ވަނުން މަނާ ކޮށްފައެވެ.
ރަޝިއާގެ ފޮރިންގ މިނިސްޓްރީން ހާމަ ކޮށްފައިވާ ގޮތުގައި، މިފަހަރު އެގައުމުންވަނީ އެމެރިކާގެ އިތުރު 25 އޮފިޝަލަކު ރަޝިއާއަށް ވަނުން މަނާ ކޮށްފައެވެ.
ރަޝިއާއަށް ވަނުން މަނާ ލިސްޓުގައި އަލަށް ހިމަނާފައިވާ އެމެރިކާގެ 4 ސެނެޓަރުންގެ ތެރޭގައި، ރިޕަބްލިކަން ޕާޓީގެ މިކް މެކާނެލްއާއި، ސޫޒަން ކޮލިންސްގެ އިތުރުން ބެން ސައްސޭއާއި ޑިމޮކްރަޓީއަށް ނިސްބަތްވާ ކްރިސްޓައިން ގިލިބްރޭންޑްވެސް ހިމެނެއެވެ.
ފާއިތުވި ފެބްރުއަރީމަހުގެ 24ވަނަ ދުވަހު ރަޝިއާއިން ޔޫކުރެއިންއަށް އުދުވާނީ ހަމަލާ ދޭން ފެށުމާއި ގުޅިގެން އެމެރިކާއިންވެސް ވަނީ ރަޝިއާއާއި ދެކޮޅަށް އިގްތިސާދީ ގޮތުންނާއި ޑިޕްލޮމެޓިކް ގޮތުން ދަތި ކުރުމުގެ ފިޔަވަޅު އަޅާފައެވެ. މީގެ ތެރޭގައި ރަޝިއާގެ ރައީސް ޕުޓިންގެ އިތުރުން އެގައުމުގެ ފޮރިންގ މިނިސްޓަރާއި ގާނޫނުހަދާ މަޖިލިހުގެ ގިނަ އަދަދެއްގެ މެމްބަރުންވެސް ހިމެނެއެވެ.
އެމެރިކާގެ އިތުރުން، ޔޫރަޕްގެ ގިނަ ގައުމުތަކުންވެސް ވަނީ ރަޝިއާއި ދެކޮޅަށް ހަރުކަށި ގިނަ ފިޔަވަޅުތަކެއް އަޅާފައެވެ.
