ޔޯގާ ހަރަކާތާއި ދެކޮޅަށް ހިންގި ހަމަނުޖެހުންތަކުގައި ބޭނުންކުރި ދިދަތައް ނެރުނީ ޕީޕީއެމް އޮފީހުންކަމަށް ފެންނަ ފޮޓޯތަކެއް ޢާންމުވެއްޖެއެވެ.
ގަލޮޅު ރަސްމީ ދަނޑުގައި މިއަދު ހެނދުނު ކުރިއަށްދިޔަ ޔޯގާ ހަރަކާތް ހުއްޓުވުމަށް ބަޔަކު ވަނީ ގަލޮޅު ދަނޑު ކައިރިއަށް ދިދަތަކާއެކު އެއްވެސް އެ ހަރަކާތަށް ހުރަސް އަޅާފައެވެ. މިގޮތުން ދަނޑުތެރެއަށް ވަދެ ބައެއް ތަކެއްޗަށްވެސް ގެއްލުންދީފައިވެއެވެ. މި ހަރަކާތް ހުއްޓުވުމަށް ހިންގި ހަމަނުޖެހުންތަކަކީ ސިޔާސީ މަޤްޞަދެއްގައި ހިންގި ކަމެއްކަމަށް ތުހުމަތުކުރެވެމުން ދަނިކޮށް، ސޯޝަލް މީޑިއާގައި ދައުރުވާން ފެށީ އެ ހަރަކާތުގައި ބޭނުންކުރި ދިދަތަށް ޕީޕީއެމް އޮފީހުން ނެރެމުންދާ މަންޒަރު ފެންނަ ފޮޓޯތަކެކެވެ.
ފަތިހު 5 ޖަހާ އެހާކަން ހާއިރު، ޕީޕީއެމް އޮފީހުން އެ ދިދަތަށް ނެރުމަށް، ޕީޕީއެމްއިން ހިންގާ ސިޔާސީ ހަރަކާތްތަކުގައި އިސްކޮށް އުޅޭ ބައެއް މީހުން އެ ފޮޓޯތަކުން ފެނެއެވެ. ޔޯގާ ހަރަކާތް ހުއްޓުވުމަށް ބޭނުންކުރި ދިދަތަކަކީ ރަސޫލާގެ ދިފާއުގައި މާލޭގައި ބޭއްވި އެއްވުމަށްފަހު، ޕީޕީއެމްއިން ކާނިވާ ސަރަހައްދުގައި ބޭއްވި ޖަލްސާގައިވެސް ބޭނުންކުރި ދިދަތަކެކެވެ.
ޔޯގާ ހަރަކާތާއި ދެކޮޅަށް ބަޔަކު ނިކުމެ އެ ހަރަކާތް ހުއްޓުވާފައި ވީނަމަވެސް، ބައިނަލްއަޤްވާމީ ޔޯގާ ދުވަހަކީ ކޮންމެ އަހަރެއްގެ ޖޫންމަހުގެ 21 ވަނަ ދުވަސްކަމށް އދ.އިން ކަނޑައެޅުމާއެކު ރާއްޖޭގައިވެސް ކޮންމެ އަހަރަކު އެ ހަރަކާތް އަންނަނީ ބާއްވަމުންނެވެ. ނަމަވެސް އެ ހަރަކާތް ކޯވިޑާއި ގުޅިގެން ފާއިތުވި ދެ އަހަރު ރާއްޖޭގައި ބާއްވާފައެއް ނުވެއެވެ.
ޔޯގާ ހަރަކާތް ހުއްޓުވައި ހަމަނުޖެހުން ހިންގި މައްސަލާގައި 6 މީހަކު ފުލުހުން ވަނީ ހައްޔަރުކޮށްފައެވެ.
ޔޫތު މިނިސްޓްރީއާއި ރާއްޖޭގައި ހުންނަ އިންޑިއާ ހައިކޮމިޝަން ގުޅިގެން ހިންގި ޔޯގާ ހަރަކާތަށް ހުރަސް އެޅީ ސަލަފް ޖަމްޢިއްޔާއާއި ޕީޕީއެމް އިންކަމަށް ސަރުކާރުން ތުހުމަތުކުރެއެވެ.
