ސްކޮޓްލަންޑުގެ އެބަޑީންއަށް ކުޅެމުން އައި ކެލްވިން ރަމްސީގެ ސޮއި ލިވަޕޫލުން ހޯދައިފިއެވެ.
މައުލޫމާތު ލިބިފައިވާ ގޮތުގައި ސްކޮޓްލަންޑަށް ނިސްބަތްވާ ރަމްސީ ލިވަޕޫލަށް ސޮއިކޮށްފައިވަނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އަދި އުމުރުން 18 އަހަރުގެ އެ ކުޅުންތެރިޔާގެ ޓްރާންސްފާ ފީ ހަތަރެއް ޕޮއިންޓް ދެއަކަށް އަރާނެކަމަށް ރިޕޯޓުތައް ބުނެއެވެ.
ލިވަޕޫލުން ހާމަކުރިގޮތުގައި އެ ޓީމުން ރަމްސީ ލޯނެއްގެ ދަށުން ދޫކޮށްލަން ބޭނުންނުވާ ކަމަށާއި އެހެންކަމުން އޭނާ ކުރިއަށް އޮތް ޕްރީ ސީޒަންގައި ފުރަތަމަ ޓީމާއެކު ފަރިތަކުރުންތައް ފަށާނެ ކަމަށެވެ.
ލިވަޕޫލަށް ސޮއިކުރުމަށްފަހު ރަމްސީ ވަނީ މިއީ ހުވަފެނެއް ހަގީގަތަކަށް ވުން ކަމަށް ބުނެފައެވެ. އަދި އެބަޑީންގައި ކުޅުންވެސް އެއީ ހުވަފެނެއް ކަމަށާއި، އެއަށްފަހު ދުނިޔޭގައި އެންމެ ބޮޑު އެއް ކުލަބު ނުވަތަ އެންމެ ބޮޑު ކުލަބަށް ކުޅުމުގެ ފުރުސަތު ލިބިގެން ދިއުމަކީ އޭނާއަށް ހޯދުނު ވަރަށް ބޮޑު ކާމިޔާބީއެއް ކަމަށްވެސް ބުންޏެވެ. އަދި އޭނާކުޅުން ލިވަޕޫލްގެ ސަޕޯޓަރުންނަށް ދައްކާލަން ކެތް މަދުވެފައިވާކަމަށްވެސް ވަނީ ބުނެފައެވެ.
މިދިޔަ ސީޒަންގައި ރަމްސީ ވަނީ އެބާޑީންއަށް 33 މެޗު ކުޅެދީ، އެއް ލަނޑު ޖެހުމުގެ އިތުރުން ނުވަ އެސިސްޓް ކޮށްފައެވެ.
