އެމްޑީޕީގެ މިރުކާރުން ދިވެހިން ދަރަނިވެރިކުރުވާ ދަރަނީގެ ބޮޑު ކަސްތޮޅެއްގައި އަޅުވަމުންދަނީ ސިޔާސީ އިތުރު ދައުރެއްގެ ދަހިވެތިކަމުގައިކަމަށް މިސަރުކާރުގެ ފުރަތަމަ ޓެކްނޮލޮޖީ މިނިސްޓަރ މުޙައްމަދު މަލީހު ޖަމާލު ވިދާޅުވެއްޖެއެވެ. އޭނާ މިހެން ވިދާޅުވީ ރާއްޖޭގެ ދަރަނި ބޮޑުވެ ނުދެއްކޭނެކަމުގެ ބިރުވެރިކަން އޮތްކަމަށް ދެކެވޭ ވާހަކަތަކާއި ގުޅިގެންނެވެ.

މަލީހު ވިދާޅުވީ، ކުފޫ ހަމަނުވާ ވެރިޔަކު ދެވަނަ ދައުރެއްގެ ވާހަކަ ދައްކަން ލަދުގަންނަން ޖެހޭކަމަށެވެ. އަދި ފެންނަނީ ފޮށި ތަންމަތި ބަންނަ މަންޒަރުކަމަށްވެސް މަލީހު ވިދާޅުވިއެވެ.

އެމްޑީޕީގެ މިގަމާރު ސަރުކާރުން ދިވެހިން ދަރަނިވެރިކުރުވާ ދަރަނީގެ ބޮޑު ކަސްތޮޅެއްގައި އަޅުވަމުން އެދަނީ ސިޔާސީ އިތުރު ދައުރެއްގެ ދަހިވެތިކަމުގައި. ކުފޫ ހަމަނުވާ ވެރިޔަކު ދެވަނަ ދައުރެއްގެ ވާހަކަ ދައްކަން ލަދުގަންނަންޖެހޭ. ފެންނަމުންދަނީ ފޮށި ތަންމަތި ބަންނަ މަންޒަރު.

— Mohamed Maleeh Jamal (@maleehjamal) June 18, 2022

ފާއިތުވެދިޔަ ތަނުގައި ދައުލަތުގެ ދަރަނި އިންތިހާއަށް މަތިވެ، އަދި ވޭތުވެދޔަ ސަރުކާރުން ނަގާފައިވާ ޗައިނާގެ ދަރަންޏަކީ ރާއްޖެއަށް އޮތް ދަރަނީގެ ބޮޑު ދަންތުރައެއްގެ ގޮތުގައި މިސަރުކާރުގެ ސިޔާސީ އިސް ބައެއް ފަރާތްތަކުން މިހާތަނަށް ދައްކަވަމުން ގެންދެވިނަމަވެސް ދާދި ފަހުން ސަރުކާރުގެ ބައެއް ވަޒީރުން ވަނީ އެއީ ދަރަނީގެ ދަންތުރެއް ނޫންކަމަށް ސިފަވާގޮތަށް ވާހަކަ ދައްކާފައެވެ.

ނަމަވެސް ބައިނަލްއަޤްވާމީ މާލީ ބައެއް އިދާރާތަކުން ވަނީ ރާއްޖޭގެ ދަރަނި އިންތިހާއަށް އިތުރުވެ ދަރަނި ނުދެއްކޭނެކަމުގެ އިންޒާރު ދެއްވާފައެވެ. ނަމަވެސް ރައީސް އިބްރާހީމް މުޙައްމަދު ޞާލިޙާއި ފައިނޭންސް މިނިސްތަރ އިބްރާހީމް އަމީރު ވިދާޅުވަމުން ގެންދަވަނީ، ރާއްޖޭގެ އިޤްތިޞާދު ރަނގަޅުކަމަށާއި، މިސްރާބުވެސް ހުރީ ރަނގަޅަށްކަމަށެވެ. އަދި ދަރަނި ނުދެއްކޭނެ ހާލަތަކަށް ނުދާނެކަމުގެ ޔަޤީންކަން ވަނީ ދެއްވާފައެވެ.

ސަރުކާރުން ބުނާގޮތުގައި އެންމެ ބޮޑު ދަރަންޏެއް ރާއްޖެއިން ދައްކަން ޖެހޭނީ 2026ވަނަ އަހަރުއެވެ.