އިނގިރޭސި ބޮޑުވަޒީރު މަގާމުން ދުރުކުރުމަށް ގާނޫނުހަދާ މަޖިލިހުގައި ނެގި ވޯޓުން ސަލާމަތް ވެވަޑައިގެންފިއެވެ.
އިނގިރޭސިވިލާތުގައި ވެރިކަން ކުރަމުންދާ ކޮންޒަރވޭޓިވް ޕާޓިގެ އެތެރޭގައި ބޮޑުވަޒީރު ޖޯންސަންއާއި ދެކޮޅަށް އުފެދިފައިވާ ދެކޮޅުވެރިކަމާ އެކުވެސް، މި ވޯޓުގައި އޭނާއާއި އެއްކޮޅަށް 211 މެމްބަރަކު ވޯޓު ދެއްވާފައި ވާއިރު، އޭނާއާއި ދެކޮޅަށް ވޯޓު ދެއްވާފައިވަނީ 148 މެމްބަރުންނެވެ.
ބޮރިސް ޖޯންސަން މި ވޯޓު ކާމިޔާބު ކުރުމާއި ގުޅިގެން ކުރިޔަށްއޮތް އެއް އަހަރު ދުވަހު އޭނާ ބޮޑުވަޒީރުކަމުގައި ހުންނަވާނޭކަމުގެ ޔަގީންކަން މިހާރުވަނީ ލިބިވަޑައިގެންފައެވެ. އެހެންނަމަވެސް، އޭނާގެ ކޮންޒަވޭޓިވް ޕާޓީގެ ފަރާތުން ގާނޫނުހަދާ މަޖިލިހުގައި ތިއްބަވާ 359 މެމްބަރުންގެ ތެރެއިން 148 މެމްބަރަކު އޭނާއާއި ދެކޮޅަށް ވޯޓު ދެއްވާފައިވާ ވުން ގިނަ ބަޔަކު ސިފަކުރަނީ، ކުރިޔަށް އޮތް ތަނުގައިވެސް ވެރިކަން ކުރެއްވުމުގައި އޭނާއަށް ކުރިމަތިވެ ވަޑައިގަންނަވާނޭ ބޮޑު ގޮންޖެހުމެއްގެ ގޮތުގައެވެ.
ގާނޫނުހަދާ މަޖިލިހުގައި ނެގިގެންދިޔަ މި ވޯޓު ޖޯންސަން ކާމިޔާބު ކުރުރެއްވުމަށްފަހު އޭނާ ވިދާޅުވެފައިވަނީ، މިއީ އޭނާއަށް ލިބިގެންދިޔަ ވަރަށް ބޮޑު އިތުބާރެއް ކަމަށާއި އަދި ކާމިޔާބީއެއް ކަމުގައެވެ. އަދި ވިދާޅުވެފައިވަނީ، މިއީ ގައުމާއިގެން އަނެއްކާވެސް ކުރިޔަށް ވަޑައިގަންނަވަންވީ ވަގުތު ކަމުގައެވެ.
"އަހަރެން ގަބޫލުކުރަނީ މިނަތީޖާއިން އުފައްދާދިން އިތުބާރާއި އަދި ލިބިގެންދިޔަ މި ކާމިޔާބީއާއެކު، އަނެއްކާވެސް މިއޮތީ އަހަހަރެމެން އެންމެންނަށްވެސް މުހިންމު ކަންކަމާއިގެން ސަރުކާރު ކުރިޔަށް ދާންވީ ވަގުތުގައި އައިސްފައި ކަމަށް،" ޖޯންސަން ވިދާޅުވެފައި ވެއެވެ.
ބޮރިސް ޖޯންސަންގެ އިތުބާރު އޮތްތޯ ބެލުމަށް ގާނޫނުހަދާ މަޖިލިހުގައި ވޯޓަށް އަހާފައިވަނީ، ކޮންޒަވޭޓިވް ޕާޓީގެ އޮފިޝަލެއް ކަމުގައިވާ ގްރަހަމް ބްރޭޑީ، އިތުބާރު އޮތްތޯ ބެލުމަށް ބޭނުންވާވަރަށް، ކޮންޒަރވޭޓިވް ޕާޓީގެ 54 މެމްބަރުންގެ ސިޓީ އޭނާއަށް ލިބިވަޑައިގެންފައި ވާކަމަށް ވިދާޅުވުމާއި ގުޅިގެންނެވެ.
ޕާޓީގެ އުސޫލުތައް ބުނާގޮތުން މިއަދަދަކީ ބޮޑުވަޒީރުގެ އިތުބާރު އޮތްތޯ ބެލުމަށް ވޯޓަށް އެހިދާނެ އަދަދެކެވެ.
ބޮޑުވަޒީރުކަމުގައި ދެމި ހުރުމަށްޓަކާ ބޮރިސް ޖޯންސަންއަށް ހޯއްދަވަން ޖެހިވަޑައިގެންފައިވަނީ، ގާނޫނުގަދާ މަޖިލިހުގައި ތިއްބަވާ އޭނާގެ ޕާޓީގެ 359 މެމްބަރުންގެ ސިމްޕަލް މެޖޯރިޓީގެ ތާއީދެވެ. މި ތާޢީދު އޭނާއަށް ނުހޯއްދެވުނު ނަމަ، ޕާޓީއަށް ޖެހޭނީ ޕާޓީގެ ތެރެއިން އާ ބޮޑުވަޒީރަކުން އައްޔަން ކުރުމަށެވެ.
