ޑްރަގު މައްސަލަ ތަކުގައި މުއައްސަސާތައް ދުވަހެއް ދުވަހަކަށް ފައިލް ވަމުން އަންނަތަން ފެންނުމަކީ ކަންބޮޑުވުމެއް ކަމުގައި ދީނީ އިލްމުވެރިޔާ ޝައިޚު އަލީ ޒައިދު ވިދާޅުވެއްޖެއެވެ.

ޝައިޚު ޒައިދު މިހެން ވިދާޅުވީ މިފަހުން ރާއްޖޭގައި އަތުލައިގަނެވޭ މަސްތުވާތަކެތީގެ ގިނަ މައްސަލަތަކުގައި ހައްޔަރު ކުރެވޭ މީހުން ދޫކޮށްލައި ދައުވާ ނުކުރަން ނިންމާތީ ގިނަ ބަޔަކު އެކަމުގެ ކަންބޮޑުވުން ފާޅު ކުރަމުންދާ ދަނޑިވަޅެއްގައެވެ.

މިމައްސަލާގައި ކަންބޮޑުވުން ފާޅު ކުރަމުން ޒައިދު ވިދާޅުވީ، ޑްރަގުގެ މައްސަލަތަކުގައި ދައުލަތުގެ ކަމާއި ގުޅުންހުރި އެންމެހައި އިދާރާތައް ދުވަހެއް ދުވަހަށް ފެއިލްވަމުންދާތަން ފެނުމަކީ މުޅި ޤައުމާއި ރައްޔިތުންގެ ކަންބޮޑުވުން އިންތިހާއަށް އޮތް މައްސަލައެއް ކަމަށެވެ. ޑްރަގު ޓްރެފިކާސްއަށް ހިމާޔަތްދީ، ބޮޑެތި ބާގަނޑުތަކުން އެމީހުން ފުރޭނި، އަދި ފުރާނުވާ ބަޔަކު ތިބިނަމަ، އެބައެއްގެ މައްސަލަ ވަކިން ބަލައި އަވަސް ހައްލެއް ގެނައުމަކީ މުޅި މުޖުތަމައު މިކަމުން ސަލާމަތް ކުރުމަށް ކޮންމެހެން ކުރަންޖެހޭ ކަމެއްކަމަށް ޒައިދު ވިދާޅުވިއެވެ.

ޑްރަގު މައްސަލަ ތަކުގައި މުއައްސަސާތައް ދުވަހެއް ދުވަހަކަށް ފައިލް ވަމުން އަންނަތަން ފެންނުމަކީ ކަންބޮޑުވުމެއް! ޑްރަގު ޓްރެފިކާސްއަށް ހިމާޔަތްދީ، ބޮޑެތި ބާގަނޑުތަކުން އެމީހުން ފުރޭނި، އަދި ފުރާނުވާ ބަޔަކު ތިބިނަމަ، އެބައެއްގެ މައްސަލަ ވަކިން ބަލައި އަވަސް ހައްލެއް މިކަމަށް ގެންނަންޖެހޭ. އަލީ ޒައިދު ވިދާޅުވިއެވެ.

ޒައިދު މިހެން ވިދާޅުވެފައިވާއިރު މާލޭގެ ގެއެއްގައި ވަޅުލާފައި ހުއްޓާ އަތުލައިގަތް މަސްތުވާތަކެތީގެ މައްސަލައިގައި ހައްޔަރު ކުރި ދެމީހުން ދޫކޮށްލައި، މިމައްސަލައިގައި ދައުވާ ނުކުރުމަށް ވަނީ ނިންމާފައެވެ. ޕީޖީ އޮފީހުން މިމައްސަލާގައި ދައުވާ ނުކުރަން ނިންމި ސަބުތަކުގެ ތެރޭގައި ފުލުހުންގެ ގިނަ އިހުމާލުތަކެއް ވަނީ ފާހަގަކޮށްފައެވެ.

މި މައްސަލަ 241 ކޮމެޓީއަށް ހުށައަޅަން ނިިންމީ ޕީޖީ އޮފީހުން ތުހުމަތުކުރާ ކަންކަން ބެލުމަށްކަމަށް ފާހަގަކޮށްފައިވާ ކަންކަން ބެލުމަށްކަމަށް އުޝާމް ވިދާޅުވިއެވެ. މިމައްސަލާގައި ދައުވާ ނުކުރުމަށް ނިންމި ސަބަބުތަކުގެ ތެރޭގައި ޕީޖީ އޮފީހުން ވިދާޅުވީ މ.ލަވްނެސްޓްގެ ބަލައި ފާސްކުރުމަށް ކޯޓު އަމުރަކަށް އެދި ހުށަހެޅުމުގެ އެކަށީގެންވާ ވަގުތާއި ފުރުޞަތު ލިބި އެގެ ބަލައިފާސްކޮށްފައިވަނީ ކޯޓު އަމުރަކާ ނުލައި ކަމަށެވެ.

ގޭގެ ވެރިފަރާތަކީ ކާކުކަން އެނގެން އޮތްއިރު އެގެ ބަލައިފާސްކުރުމުގެ ހުއްދަ އެހެން މީހަކު އަތުން ހޯދާފައިވާތީ މަސްތުވާތަކެތި ފެނުނު ސީން ކަމުގައިވާ މ.ލަވްނެސްޓަށް ފުލުހުން ވަދެ ބަލައި ފާސްކޮށްފައިވަނީ ޤާނޫނުއަސާސީގެ 47 ވަނަ މާއްދާގެ (ށ) އާއި، މަސްތުވާތަކެއްޗާބެހޭ ޤާނޫނުގެ 149 ވަނަ މާއްދާއާ ޚިލާފަށް ކަމަށް ޕީޖީ އޮފީހުން ވިދާޅުވިއެވެ. މި މައްސަލައިގެ ސީންގައި ކަންވީގޮތާމެދު ސުވާލު އުފެދޭ ގިނަ ކަންތައްތަކެއް ހުރިކަން ފާހަގަވެފައިވާކަމަށް ޕީޖީ އޮފީހުން ވިދާޅުވިއެވެ. މީގެ އިތުރުން މި މައްސަލައިގައި ތުހުމަތުކުރެވޭ މީހުންނާ ގުޅުންހުރި ތަންތަން ބަލައިފާސްކުރިއިރު އެ ތަންތަނުގައި ހުރި ހެކީގެ ގޮތުގައި ބޭނުން ކުރެވިދާނެކަމަށް ފެންނަ ބައެއް ތަކެތި ތަޙުޤީގަށް ނަގައި ތަޙުލީލު ކޮށްފައިވާކަން ހުށަހެޅި ލިޔުންތަކުން އެނގެން ނެތްކަންވެސް ވަނީ ފާހަގަކޮށްފައެވެ.

އަދި މައްސަލައިގައި ހޯދިދާނެކަމަށް ފެންނަ މުހިންމު ހެކިތަކެއް ހޯދިފައި ނުވާތީ، މި މައްސަލައިގައި ތުހުމަތުކުރެވޭ މީހުންނާ، ފެނުނު މަސްތުވާތަކެއްޗާ ގުޅުވައިދެވޭ މިންވަރަށް ހެކި ޤަރީނާ ހޯދިފައި ނުވާކަމަށްވެސް ޕީޖީ އޮފީހުން ވަނީ ވިދާޅުވެފައެވެ.