އިނގިރޭސީ ރާނީގެ ރަނިކަމަށް 70 އަހަރު ފުރުމާއި ގުޅިގެން، މި މުނާސަބަތުގެ ކުލަގަދަ އިހުތިފާލްތައް ބެލުމަށް ވެރިރަށް ލަންޑަނަށް އެތައްހާސް ބަޔަލު އެއްވެއްޖެއެވެ.
އިނގިރޭސި ރާނީ އެގައުމުގެ ރަނިކަމަށް އިސްވެވަޑައިގަތީ މީގެ 70 އަހަރު ކުރިންނެވެ. އަދި އެކަމަނާ ވެވަޑައިގެންފައިވަނީ އިނގިރޭސި ތާޖު ތުރުކުރެއްވުމުގައި އެންމެ ދިގު މުއްދަތަކަށް ދުނިޔޭގައި ހުންނެވި ރާނީ ކަމުގައިވެސް މެއެވެ.
މިއަދުގެ އިހުތިފާލްތަކުގައި ބައިވެރިވެ ވަޑައިގަތުމުގެ ގޮތުން، ރާނީގެ އިތުރުން ޝާހީ އާއިލާގެ އިސް މެމްބަރުންވަނީ ޝާހީ ގަނޑުވަރު، ބަކިމްހަމް ޕެލަސްގެ މަޝްހޫރު ބެލްކަންޏަށް ނިކުމެވަޑައިގެން، އިންގިރޭސީ ރޯޔަލް އެއަރ ފޯރސް RAFގެ އުދުހުމުގެ މަންޒަރުތައް ބައްލަވާލައްވާފައެވެ.
ބަކިމްހަމް ޕެލަސްގެ ބެލްކަނީގައި ރާނީ ނުހަނު އުފަލުން ހުންނެވިއިރު، އެކަމަނާގެ މުނިމާމަ ދަރިކަލުން ކަމުގައިވާ، 3 އަހަރުގެ ޕްރިންސް ލުއިސް ފެނިގެން ދިޔައީ މަތީގައި އުދުހެމުން ދިޔަ ރޯޔަލް އެއަރފޯސްގެ ބޯޓުތަކުގެ އަޑަށް ކަންފަތުގައި އަތް އަޅައިގެން އަދި ލޯވެސް މަރާލާއިގެން ހުއްޓައެވެ.
ރާނީގެ ރަނިކަމަށް 70 އަަހަރު ފުރޭ ޕްލެޓިނަމް ޖުބުލީގެ އިހުތިފާލްތައް އިނގިރޭސިވިލާތުގައި 4 ދުވަހަށް ކުރިޔަށް ދާނެއެވެ. އަދި މި އިހުތިފާލްތައް މިއަދު ފެށިގެން ދިޔައީ ކުލައިން ޖަރީ ކޮށްފައިވާ، ސިފައިންގެ ލަޝްކަރުތަކުގެ އެއްވުމަކުންނެވެ.
ކުލައިން ޖަރީވެފައިވާ ފައުޖުތައް ޕެރޭޑް ކުރަމުން ދިޔައިރު، ފައުޖުތަކުން ސެލިއުޓު އަރުވާފައިވަނީ ރާނީގެ ފަރާތުން ހުއްޓި ހުންނެވި، ޕްރިންސް ޗާރލްސްއަށެވެ.
އެއްވެތިބި މީހުން ތަރުހީބު ދެމުންދިޔައިރު، ޑަޗެސް އޮފް ކޭމްބްރިޖްއާއި، އެކަމަނާގެ ތިން ދަރިންގެ އިތުރުން ޑަޗެސް އޮފް ކްރޯންވެލްވަނި ހިންގަފާއި ވަޑައިގެންފައެވެ.
ޕްރިންސް ހެންރީއާއި އަނބިކަނބަލުން މިއަދުގެ ޕެރޭޑްތައް ބެއްލެވިނަމަވެސް، ބަކިމްހަމް ޕެލްސްގެ ބެލްކަނީގައި ބައިވެރިވެ ވަޑައިގެންފައެއް ނުވެއެވެ.
ރާނީގެ ޕްލެޓިނަމް ޖުބިލީގެ މުނާސަބަތުގައި، މިރޭގެ ވަގުތުތަކުގައި، އިނގިރޭސިވިލާތުގެ އެކި ހިސާބުތަކުގައައާއި އަދި ކޮމަންވެލްތު ގައުމުތަކުގެ ވެރި ރަށްތަކުގައި، އުސް ބައްތިތައް ދިއްލުމަށްވެސް ވަނީ ހަމަޖެހިފައެވެ.
އިނގިރޭސި ރާނީ ދުނިޔޭގެއަލިކަން ދެކެވަޑައިގަތީ 1926ވަނަ އަހަރުއެވެ. އެހެންނަމަވެސް އެމަނާ އުފަންވެ ވަޑައިގަތީ ޝާހީ ގަނޑުވަރެއްގައެއް ނޫނެވެ. އެކަމަނާ އުފަންވެ ވަޑައިގަތީ ލަންޑަނުގެ ބްރުޓަން ސްޓްރީޓްގެ ޓައުންހައުސްއެއްގައެވެ. އެންމެ ފުރަތަމަ ރާނީ މިގޭގައި ދުރިއުޅުއްވާފައިވަނީ، ބައްޕާފުޅާއި މަންމާފުޅާ އެކުއެވެ. ފަހުން ރާނީގެ ބައްޕާފުޅު ވެވަޑައިގަތީ ކިންގ ޖޯޖު ފިލިޕް VI އަށެވެ. މަންމާފުޅު ވެވަޑަގަތީ ކުއީން އެލިޒަބަތުއަށެވެ.
ފާއިތުވި އެޕްރިލްމަހުގެ 21ވަނަ ދުވަހު ރާނީގެ 96ވަނަ އުފަންދުވަސް ފާހަގަ ކޮށްފައި ވާއިރު، އިނގިރޭސި ތަޚުތުގައި އިންނަވާ، ޕްލެޓިނަމް ޔޫބީލް ފާހަގަކުރައްވާ ފުރަތަމަ ކަމަނާކަމުގައި އެކަނާ ވަނީ ވެވަޑައިގެންފައެވެ. ރާނީ އިނގިރޭސި ތަޚުތައް އިސްވެވަޑައިގަތީ މީގެ 70 އަހަރު ކުރިންނެވެ. ރާނީ ފިޔަވާ ދެން އެންމެ ދިގު މުއްދަކަށް އިނގިރޭސި ތަޚުތުގައި އިންނަވާފައިވަނީ ކުއީން ވިކްޓޯރިއަރް އާއި ޖޯޖް III، އުމުރުން 81ވަނަ އަހަރާއި ހަމައަށެވެ. އަދި ރާނީގެ އިތުރުން، ތަޚުތުގައި ތިއްބަވައިގެން، 80ގެ އަހަރުތަކާހައަށް ދުނިޔޭގެ ތިއްބަވާފައިވާ ބޭފުޅުންނަކީވެސް މި ބޭފުޅުންނެވެ.
އިގިރޭސިވިލާތުގެ ނޭޝަނަލް ސްޓެޓިސްޓިކްސް އޮފީހުން އާންމު ކޮށްފައިވާ މައުލޫމާތުތަކަށް ބަލާއިރު، އުމުރުން 95 އަހަރާއި 99 އަހަރާއި ދެމެދުގެ، އިނގިރޭސިވިލާތުގައި މިހާރު ތިބީ 124,000 މީހުންނެވެ. މީގެ ތެރެއިން ހަތަރުބައި ކޮށްފަ ތިން ބައިގެ މީހުންނަކީ އަންހެނުންނެވެ.
