ދުނިޔޭގެ އިޤްތިޞާދަށް ކުރިމަތިވަމުންދާ ކަންތައްތަކާއި، ދިމާވާ އެކި ހާދިސާތަކުގެ ސަބަބުން އިޤްތިޞާދީ ގޮތުން ރާއްޖެއަށް ގޮންޖެހުންތަކެއް ހުރިކަމަށާއި، ނަމަވެސް ރާއްޖޭގެ އިޤްތިޞާދީ ދުވެލި ހުރީ ރަނގަޅު މިސްރާބަކަށް ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ދެދުވަހުގެ ނިޔަލަށް އުކުޅަހުގައި ބޭއްވި ވިއަވަތި ރާއްޖެ ކޮންފަރެންސް ނިންމުމަށް ބޭއްވި ޚާއްސަ ހަފްލާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ދުނިޔެއަށް ދިމާވާ ކޮންމެ ހާދިސާއެއްގެ ގެއްލުން އަބަދުވެސް އެންމެ ބޮޑަށް ކުރާ ޤައުމަކީ ރާއްޖެކަމަށެވެ. މިދިޔަ ދެ އަހަރެއްގެ ތެރޭގައި ރާއްޖެ ތަހައްމަލު ކުރީ ވަރަށް އުދަގޫ އަދި ގޮންޖެހުން ބޮޑު ދުވަސްތަކެއް ކަމަށް ރައީސުލްޖުމްހޫރިއްޔާ ވިދާޅުވިއެވެ.
ކޯވިޑް-19ގެ ސަބަބުން މުޅި ރާއްޖެ ބަންދުކޮށް، އިޤްތިޞާދީ ހުރިހާ ހަރަކާތެއް ހުއްޓި ދިމާވި ގޮންޖެހުންތަކުން އަރައި ނުގަނެވިގެން އުޅެނިކޮށް ދުނިޔޭގެ އިޤްތިޞާދީ ބޮޑު ބާރަކުން ހަނގުރާމައެއް ފެށުމަކީ މުޅި ދުނިޔެއަށް އެކަމުގެ ނޭދެވޭ އަސަރު އިންތިއަށް ކުރަމުންދާ ކަމެއްކަމަށެވެ. ރަޝިއާ-ޔޫކްރައިން ހަނގުރާމައިގެ އަސަރު އިންތިހާއަށް ރާއްޖެއަށް ކުރަމުންދާއިރު، ކުރިއަށް އޮތް ތަނުގައި ސަރުކާރުން ހުރި ދަތިތަކަށް ބަލައި ބައެއް ތަރައްޤީގެ މަސައްކަތްތަކަށް ބަދަލު ގެންނަވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.
ދުނިޔޭގެ ބާޒާރުގައި ތަކެތީގެ އަގު އިންތިއާއަށް އުފުލުމާއި، ޤައުމުތަކުގެ މާލީ ހާލަތަށް ދިމާވާ ކަންކަމުގެ އަސަރު ރާއްޖެއަށް ކުރާނެކަމީ ގަބޫލުކުރަންޖެހޭ ހަގީގަތެއްކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ، އިޤްތިޞާދީ ދަތިކަން ވީހާވެސް ކުޑަކުރުމަށްޓަކައި މިހާރުން މިހާރަށް އަޅަންޖެހޭ ފިޔަވަޅު އަޅައި، ބައެއް މަޝްރޫޢުތަކަށް ގެންނަން ޖެހޭ ބަދަލު ގެނެސް ރަނގަޅު މިސްރާބަށް އަމާޒު ހިފާނެކަމަށް ރައީސުލްޖުމްހޫރިއްޔާ ވިދާޅުވިއެވެ.
ކޮވިޑަކީ އަޅުގަނޑުމެންނައި ބެހޭ އެއްޗެއްނޫން. އެހެން ނަމަވެސް މުޅި ޤައުމު އެއްކޮށް ބަންދުކޮށްގެން ތިބެންޖެހިއްޖެ. ކޮމިޑާއި ގުޅިގެން ދަތުރު ފަތުރު ހުއްޓި ރާއްޖޭގެ އިޤްތިޞާދަށް ބޮޑެތި ގެއްލުންތަކެއްވި. މާލީ އެތައް ބުރައެއް އުފުލަން ޖެހުނު. މިއަދު ޔުކްރެެއިންގައި ހިނގަމުން އެދާ ހަނގުރާމައިގެ އަސަރު އިންތިހައަށް އެބަކުރޭ. ގޮދަނާއި ކާބޯތަކެތި އެންމެ ގިނައިން އުފައްދާ ދެޤައުމުގެ ތެރޭގައި ހިމެނޭ ދެޤައުމު. އެދެޤައުމުން އެއްޗިއްސެއް ބޭރެއް ނުކުރެވޭ. މުދަލުގެ އަގު އިންތިހާއަށް ބޮޑުވެއްޖެ. އަޅުގަނޑުމެން ބަޖެޓްކޮށްފައި ހުރި މިންވަރުގެ އެތައް ގުނައެއް ޚަރަދު ކުރަން އެބަޖެހޭ.
– ރައީސް ޞާލިހު ވިދާޅުވިއެވެ.
އިޤްތިޞާދީ ގޮންޖެހުންތަކުގެ އިތުރުން ތިމާވެށިގެ ގޮތުންވެސް ދުނިޔެއަށް ކުރިމަތިވާ ކޮންމެ ނޭދެވޭ އަސަރެއް އެންމެ ބޮޑަށް ތަހައްމަލު ކުރަންޖެހިފައިވާ އެއް ޤައުމަކީ ރާއްޖެކަމަށް ރައީސުލްޖުމްހޫރިއްޔާ ވިދާޅުވިއެވެ. އެމަނިކުފާނު ވިދާޅުވީ ދުނިޔެއަށް ވިހަ ގޭސް ދޫކުރާ 20 ޤައުމުގެ ތެރޭގައި ރާއްޖެ ނުހިމެނުނު ކަމުގައި ވީނަމަވެސް ރާއްޖެއަކީ މިކަމުގެ ނޭދެވޭ އަސަރު އެންމެ ބޮޑަށް ކުރާ އެއް ޤައުމުކަމަށެވެ.
މިކޮންފަރެންސުގައި ސަލާމަތީ ބާރުތަކުން ފާހަގަކުރެއްވި ގޭންގު ކޮށްތަކާއި، ޑްރަގުގެ ވަބާއަކީ ސަލާމަތީ ބާރުތަކާއި ކައުންސިލްތަކުގެ ދަރުރު ބޮޑު ކަމަކަށްވާއިރު، ކުށްތައް މަދު ކުރުމަށް ކައުންސިލްތަކުން މިހާރަށްވުރެ ފުޅާ ދާއިރާއެއްގައި މަސައްކަތް ކުރެއްވުމަށް އެމަނިކުފާނު ވަނީ ރާއްޖޭގެ ހުރިހާ ކައުންސިލްތަކުގެ ކިބައިން އެދިވަޑައިގަންނަވާފައެވެ.
