ރިބާ ކާމިހާގެ އަމަލަކީ ހުތުރު އަމަލެއް ކަމަށާއި، ރިބާ ކާ މީހަކީ މީސްތަކުންގެ މައްޗަށް އެއްވެސް ރަހުމެއް އޯގާވެރިކަމެއް ހުރި މީހެއް ނޫން ކަމުގައި މިއަދުގެ ހުކުރު ޚުތުބާގައި ވިދާޅުވެއްޖެއެވެ. ޚުތުބާގައި އަދި މާތް ﷲ އެފަދަ މީހާ ސިފަ ކުރައްވާފައިވަނީ ދެފައި މައްޗަށް ތެދުވެ ހުރުމުގެ ބާރު ލިބިފައި ނުވާ މީހެއްގެ ގޮތުގައި ކަމަށް ޚުތުބާގައި ވިދާޅުވެފައި ވެއެވެ.
ހުކުރު ޚުތުބާގައި ވިދާޅުވެފައިވަނީ މުދަލުން ކުރާ މުއާމަލާތުތަކަކީ، ވަރަށް ޚުޠޫރަތްތެރި މުއާމަލާތުތަކެއް ކަމުގައެވެ. މި މުއާމަލާތުތަކުގައި މަކަރު ހެދުމާއި، އޮޅުވައިލުމަކީ މާތް ﷲ ނަހީ ކުރައްވާފައިވާ ކަންކަން ކަމުގައިވެސް ބަޔާން ކުރައްވާފައި ވެއެވެ. ޚުތުބާގައި ގޮވާލައްވާފައިވަނީ މުއާމަލާތުތަކުގައި މަކާރާއި، ޙީލަތް ނުހެދުމަށާއި އޮޅުވައި ނުލުމަށެވެ.
އަދި ޚުތުބާގައި ބަޔާން ކޮށްފައިވާ ގޮތުން އަމިއްލަ މަސައްކަތުން މުދާ ހޯދައިގެން ކައިބޮއި އުޅުމަށާއި، ދިރިއުޅުން ތަނަވަސް ކުރުމަށް އިސްލާމްދީނުގައި ވަނީ ވަރަށް ބޮޑަށް ބާރު އަޅުއްވާފައެވެ. ހަމަ އެއާއެކު ފަގީރުންނާއި މުހުތާދުވެރިން ނިކަމެތި ކޮށްގެން ދިރިއުޅޭ މީހަކަށް ނުވުމަށްވެސް ޚުތުބާގައިވަނީ އިރުޝާދު ދީފައެވެ.
މިއަދުގެ ޚުތުބާގައި ހާމަ ކުރައްވާފައިވާ ގޮތުގައި ތަރައްގީގެ މިޒަމާނުގައި ރިބާގެ ބާވަތްތައް ވަރަށް ގިނައެވެ. އަދި މިއަދު އެއީ ގަވާއިދުތަކާއި އުސޫލުތަކުގެ މަތިން ކުރެވޭ މުއާމަލާތެއް ކަމުގައިވެސް ހުތުބާގައި ބާޔާން ކޮށްފައި ވެއެވެ. ޚުތުބާގައި ފާހަގަ ކޮށްފައިވާ ގޮތުގައި އޭގެ ސަބަބުން މިއަދު ގިނަ ބަޔަކުވަނީ އޭގެ ދަލުގައި ޖެހިގެން ގޮސްފައެވެ.
ޚުތުބާގައިވަނީ ރިބާގެ ނުބައިކަމާއި، އަދި އޭގެ ސަލާމަތްވުމަށް އެންމެހާ މީސްތަކުންނަށް ގޮވާ ލައްވާފައެވެ.
