ދިރިއުޅުމުގައި ތިމާގެ ބައިވެރިޔާގެ އިހުސާސްތައް ދެނެގަނެގެން އަމަލުކުރުމަކީ ވަރަށް މުހިއްމު ކަމެކެވެ. އަދި ބައިވެރިޔާއާ ދޭތެރޭގައި ތިމާގެ އިހުސާސްތައް ދުލުން ބުނުމަކީ ވެސް އެހާމެ މުހިއްމުކަމެކެވެ.
ކޮންމެ ދުވަހަކު ނުބުނި ނަމަވެސް އެކަމަކަށް ހާއްސަ ވަގުތެއްގައި ހާއްސަ ދުވަސްތަކުގައި ތިރީގައި އެވާ ޖުމްލަތަކުން ބައިވެރިޔާގެ ހިތް އުފާކޮށްދޭށެވެ. އެފަދަ ލަފްޒުތަކަކީ ގިނަ ދުވަސްތަކަށް ހަނދާނުގައި ހުންނާނެ ބަސްތަކަކަށް ވާނެއެވެ.
- ކޯޗެއް ބޭނުންވަނީ؟
ކެއުން ތައްޔާރުކުރުމުގެ ކުރިން މިއަދު ކާން ހަނދާނީ ކޯޗެއްތޯ ސުވާލުކޮއްލުން ނޫނި ބާޒާރަށް ދާނަމަ ތިބާ ބޭނުންވަނީ ކޯޗެއްތޯ ސުވާލުކުރުމަކީ ބައިވެރިޔާއާ ދޭތެރޭގައި ވިސްނާކަން ބައިވެރިޔާއަށް އިހުސާސްކުރެވޭނެ ކަމެކެވެ. ހާއްސަކޮށް ބަލިވެ އުޅޭނަމަ ކާން ބޭނުންވާ އެއްޗަކާ ބެހޭގޮތުން އަދި އެހާލަތުގައި ބައިވެރިޔާއަށް އެހީވުމަށް ކޮށްދޭންވީ ކޮންކަމެއްތޯ ސުވާލުކޮށްލުމުން ހިތްހަމަޖެހުން އިހުސާސްކުރެވޭނެއެވެ.
- އަހަރެންގެ ދިރިއުޅުމަށް ތިބާ އަޔަތީ އަހަރެން ފަހުރުވެރިވަމެވެ.
މި ޖުމްލަ އަކީ އާދަޔާ ހިލާފަށް އުފާވެރިކަމެއް ހިތަށް ގެނުވައި، ދިރިއުޅުމުގައި ތިމާއަކީ ހާއްސަ އަދި އެހާމެ މުހިންމު މީހެއްކަން އިހުސާސްކޮށްދޭނެ ޖުމްލައެކެވެ. ތިބާއަށް ދިމާވާ ބޮޑުކަމެއްގައި އެހީތެރިވާ ހިނދު މިފަދަ މާނައެއް ދޭހަވާ ޖުމްލައަކުން ބައިވެރިޔާގެ ހިތް އުފާކޮށްދީ ޝުކުރުވެރިވާށެވެ.
- ބޭރުފުށާއި އެތެރެފުށުންވެސް ތިއީ ރީތި މީހެކެވެ.
ވަރަށް ގިނަ ފަހަރަށް ބައިވެރިޔާ އަޅާ ހެދުމާއި ރީތިވެލާފައި ހުންނަ އިރު މޫނުމަތީގެ ރީތިކަމަށް ތައުރީފުކުރެވެއެވެ. މިފަދަ ވަގުތުތަކުގައި އެތެރެފުށުގެ ރީތިކަމުގެ ވާހަކަ ދައްކަން ހަނދާން ނައްތާނުލާށެވެ.
- ތިކޮށްދޭ ހުރިހާ ކަމަކަށް ޝުކުރުވެރިވަމެވެ.
ދިރިއުޅުމުގައި އާންމުކޮށް ކޮށްއުޅޭ ކަންތައްތަކަށް ޝުކުރުވެރިވުމަކީ އަހަރެމެން ވަރަށް ގިނަ ފަހަރަށް ހަނދާން ނެތޭ ކަމެކެވެ. އެކަމަކުވެސް އެއިން އެއްވެސް ކަމަކާ ނުލައި ދިރިއުޅުން ފުރިހަމަ ނުވާނަމަ އެންމެ ޝުކުރުވެރިވުން އައުލާކަން ބޮޑީ އެކަންކަމަށެވެ. އާއިލާ ބެލެހެއްޓުމަށް ފައިސާ ހޯދުމާއި ދަރިން ބެލުމާއި، ކެއްކުމާއި، އާއިލާއަށް ވަގުތުދިނުންފަދަ ހުރިހާ ކަމަކަށް ބައެއް ފަހަރަށް ހާއްސަ ޝުކުރެއް އަދާކުރުމަކީ ކޮއްދޭ ކަންކަން ބައިވެރިޔާ ބަލައިގަންނަ ކަމުގެ އިހުސާސް ކުރެވޭނެ ކަމެކެވެ.
- އަހަރެން ވަރަށް ލޯބިވެއެވެ.
ލޯބިވާކަން ބުނުމަކާ ނުލައި ހާމަކޮށްދިނަސް، އެ ލަފްޒުތައް ބުނުމުން އެލިބޭ ހިތްހަމަ ޖެހުން ތަފާތެވެ. ގިނަގިނައިން ބައިވެރިޔާދެކެ ވަރަށް ލޯބިވާ ވާހަކަ ބުނުމުން ލޯބި އާލާކޮށްދޭކަން ބައެއް ދިރާސާތަކުންވެސް ދައްކައެވެ.
- އަބަދުވެސް ތިބާއަށްޓަކައި ތިބާއާއެކު ހުންނާނަމެވެ.
ކޮއްދޭ ގިނަ ކަންތައްތަކުން އެކަކު އަނެއްކަކަށްޓަކައި އަބަދުވެސް ހުންނަކަން ފަހަރުގައި އިހުސާސްވެސް ވެދާނެއެވެ. އެކަމަކުވެސް ހިތްވަރުއެލި ބޮޑެތި ކަންކަމާ ކުރިމަތިލާ ވަގުތުތަކުގައި މިފަދަ މާނައެއް ދޭހަވާގޮތަށް ދައްކާފައި ހުންނަ ވާހަކަތަކުން ހިތްވަރު ލިބިގަންނަން ފަސޭހަވެއެވެ.
ކޮންމެ މީހަކުވެސް ބައިވެރިޔާ އަބަދު ހިނިތުންވެފައި ހުންނަތަން ދެކެން ބޭނުންވެއެވެ. މިއިން ކޮންމެ ޖުމްލައަކީ ބައިވެރިޔާގެ މޫނުމަތިން ހިނިތުންވުން ގެނައުމަށް ބާރުގަދަ ހަތިޔާރެކެވެ.
