މިދިޔަ އޮކްޓޯބަރު މަހުގެ 19ވަނަ ދުވަހު މަރާލާފައިވާ، އައިޖީއެމްއެޗުގެ ނަރުސް، މޭރީ ގްރޭސްގެ މަރުގެ މައްސަލައިގައި ދައުލަތުން ދައުވާކޮށްފައިވާ ޅ. ހިންނަވަރު، މާފިނި، ހަލީމަތު ލަމްހާ އަބްދުއްރަހްމާނާއި ދެކޮޅަށް ދައުލަތުން 100 އަށްވުރެ ގިނަ ހެކި ހުށަހަޅައި މައްސަލަ މަދަނީ މިންގަނޑުން ކުރިޔަށް ގެންދިއުމަށް ޝަރީއަތުން ނިންމައިފިއެވެ.
ލަމްހާގެ މައްޗަށް ދައުވާ ކުރަނީ އައިޖީއެމްއެޗްގައި މަސައްކަތް ކުރަމުންދިޔަ ނަރުހެއް ކަމަށްވާ މޭރީ މިދިޔަ އަހަރުގެ އޮކްޓޫބަރު މަހު މަރާލުމުގައި އޭނާ ފިރިމީހާ މާވިންއާ ގުޅިގެން މޭރީ ބައިވެރިވި ކަމަށް ބުނެއެވެ.
މި މައްސަލައިގާ މިއަދު ކްރިމިނަލް ކޯޓުގައި ކުރިޔަށްދިޔަ ޝަރީއަތުގެ އަޑުއެހުމުގައި ކުރިޔަށް ގެންގޮސްފައިވަނީ ހެކި ހުށަހެޅުމެވެ. އެގޮތުން ދައުލަތުގެ ފަރާތުން ލަމްހާގެ މައްޗަށް ކުރާ ދައުވާތަކަށް ދެ ފަރާތުން ވަނީ ހެކި ހުށަހަޅާފައެވެ. އެގޮތުން އެނގިހުރެ މީހަކު މެރުމުގައި ބައިވެރިވުމުގެ ދައުވާ ސާބިތުކުރުމަށް 110 ހެކި ދައުލަތުން ވަނީ ހުށަހަޅައިފައެވެ. އޭގެ ތެރެއިން 74 ހެކިންނަނީ ޝަފަހީ ހެކިން ކަމަށް ވެސް ވަނީ ބުނެފައެވެ. އަނެއް ދެ ދައުވާ ސާބިތުކުރުމަށް 18 ހެކިން ހުށަހަޅާފައިވާއިރު އޭގެތެރޭގައި 11 ޝަފަހީ ހެކިން ހިމެނެއެވެ. ދައުލަތުން ލިޔުމުން ތަފްސީލީ ގޮތެއްގައި ހެކިތައް ހުށަހަޅާ ސަބަބު ބަޔާންކޮށްފައިވާތީ އަޑުއެހުމުގައި ކިޔައިދީފައެއް ނުވެއެވެ.
މިއަދުގެ އަޑުއެހުމުގައި ލަމްހާ ވެސް ވަނީ 11 ދިފާއީ ހެއްކެއް ހުށަހަޅައިފައެވެ. އެގޮތުން މޭރީއާ މާވިންގެ ދަރިފުޅު އަބަދުވެސް ގެއަށް ގެނެސްގެން ބަލައިދޭކަން ސާބިތުކުރަން އޭނާގެ ގޭގައި ދިރިއުޅޭ ދެމީހެއްގެ ނަން ހުށަހަޅާފައިވާއިރު ފުލުސް އޮފިސަރުންނާއި އައިޖީއެމްއެޗްގެ މުވައްޒަފުންގެ އިތުރުން މޭރީގެ އޮޓޮޕްސީ ރިޕޯޓު ހެދި ދެ ޑޮކްޓަރުން ވެސް ލަމްހާގެ ދިފާއުގައި ވަނީ ހުށަހަޅައިފައެވެ.
ލަމްހާ ސާބިތުކޮށްދޭން ބޭނުންވަނީ ލަމްހާގެ ގެއިން ފެނުނު ބޭސްތަކަކީ ހަމައެކަނި އައިޖީއެމްއެޗްގައި ބޭނުންކުރާ އެއްޗެހި ނޫން ކަމަށާއި އެއީ ހަމައެކަނި އެސްޓީއޯއިން އެތެރެކުރާ ބޭސްތަނެއް ނޫންކަމެވެ. ފުލުހުން މެދުވެރިކޮށް ލަމްހާ ދިރިއުޅޭ ގެ ބަލައި ފާސްކުރި ކުރި ގޮތާއި ހޯދި ތަކެތި ސީލް ކުރި ގޮތް ސާފުކުރަން ބޭނުންވާ ކަމަށް ވަނީ ބުނެފައެވެ.
ދިފާއީ ވަކީލް ޝާއިރު ވިދާޅުވެފައި ވަނީ ލަމްހާގެ ގެއިން ފެނުނު ބޭސްތަކަކީ ހަމައެކަނި އެސްޓީއޯއިން އެތެރެކުރާ ބޭސްތަކެއް ނޫންކަން ސާބިތުކުރުމަށް ކަސްޓަމްސްގެ ރިކޯޑުތަކެއް ހޯދަން އެދިފައިވާނެ ކަމަށެވެ. އަދި އެއް ބެޗް ނަންބަރުތަކެއްގެ ބޭސްތަކެއް އޭޑީކޭއާއި އަމިއްލަ ކްލިނިކްތަކުގައި ވެސް ހުރިކަން ސާބިތުކުރަން އެމީހުން މެދުވެރިކޮށް ވެސް މައުލޫމާތު ހޯދަން އެދިފައިވާ ކަމަށެވެ.
ދައުލަތުން ބުނީ ޑޮކްޓަރުންގެ ލަފައާ ގުޅިގެން ލަމްހާގެ ބޭސްފަރުވާގެ ކަންކަން ޖަލުގައި ހަމަޖައްސައިދީފައިވާ ކަމަށެވެ. އެގޮތުން، ބަރު އެއްޗެހި ނުއުފުލަން ލަފާ ދީފައިވާތީ ފެން ބާލިދީ އުފުލަން ނުޖެހޭ ގޮތަށް އިސްކުރުގައި ހަރުކުރާނެ ހޮޅިއެއް ފޯރުކޮށްދީފައިވާ ކަމަށެވެ.
ލަމްހާ ގޭ ބަންދަށް ބަދަލުކުރަން އޭނާގެ ފަރާތުން އެދިފައިވާތީ ދައުލަތުން ބުނިގޮތުގައި ލަމްހާގެ ސިއްހީ މައްސަލަތަކާ ގުޅިގެން ހުޅުމާލޭ ހޮސްޕިޓަލާއި އޭޑީކޭ ހޮސްޕިޓަލަށް ދެއްކުމުން ދެ ތަނުން ދިން ލަފާގައި މާ ބޮޑު ތަފާތެއް ނެތް ކަމަށް ދައުލަތުން ބުންޏެވެ. އެގޮތުން ފިޒިއޮތޮރަޕީ އާއި ކަސްރަތު ކުރަން ލަފާ ދީފައިވާތީ ޖަލުގައި އެ އިންތިޒާމްތައް ހަމަޖައްސާފައިވާ ކަމަށް ދައުލަތުން ބުންޏެވެ.
މިވާހަތަކާއި ގުޅިގެން ލަމްހާ ބުނީ އަދިވެސް އޭނާ ބާލިދީގައި ފެން އުފުލަން ޖެހޭ ކަމަށެވެ. އެތަނުގެ ފާހާނާގައި ފްލެޝް ޓޭންކެއް ނީންނާތީ ޖެހެނީ ބާލިދީއިން ފެން އަޅަން ކަމަށާއި ހޮޅިން އެކަން ނުވާ ކަމަށް އޭނާ ބުންޏެވެ. ދިފާއުން ފާހަގަކުރީ ލަމްހާއަށް އަދިވެސް ބެޑްރެސްޓް ނުލިބޭ ކަމަށެވެ. ޑޮކްޓަރު ދީފައިވާ ލަފާގައި ވަނީ ގޭގައި ބެޑްރެސްޓް ކުރުން ކަމަށް ވެސް ފާހަގަކުރިއެވެ. އެކަމަކު ދައުލަތުން ބުނީ އެކަން މާނަކުރާނީ އެމީހަކު އެވަގުތަކު ހުރި ތަނެއްކަމަށެވެ.
ލަމްހާގެ ބަންދާ ގުޅޭގޮތުން ދައުލަތުން އިތުރަށް ޖަވާބުދާރީވާން ބޭނުންވާތީ އޭނާގެ ބަންދު މުރާޖާއާ މެދު މިއަދު ވެސް ފަހުގެ ނިންމުމެއް ނުނިންމަ އެވެ. އެ މައްސަލަ ބައްލަވާ ގާޒީ ހުސައިން ފާއިޒް ރަޝާދު ނިންމެވީ ދެން އޮންނަ އަޑުއެހުމެއްގައި އެ ބައި ކުރިއަށް ގެންދިއުމަށެވެ.
