އެންމެ ފުރަތަމަ ޝައުގުވެރިކަން ބާއްވާންވީ 2023ގެ ރިޔާސީ އިންތިހާބުގެ ބަދަލުގައި އިންޑިއާ ސިފައިން ރާއްޖޭން ބޭރުކުރުމަށްކަމަށް އިދިކޮޅު ލީޑަރު ރައީސް ޔާމީން ވިދާޅުވެއްޖެއެވެ.

އޮންލައިން ނޫސް "އަދަދު"އަށް ދެއްވި ވީޑިއޯ އިންތަރވިއުއްގައި ރައީސް ޔާމީން ވިދާޅުވެފައިވަނީ 2023ގެ އިންތިޚަބަށްވުރެ ކުރިން ޝަޢުގުވެރިކަމާއެކު އިސްކަންދެއްވާ އިތުރު ކަންކަން އެބަހުރިކަމަށެވެ. ޔާމީން ވިދާޅުވީ، އިންތިހާބާ ހަމައަށް ދެވޭނީ އެހާއިރަށް ވެސް ރާއްޖޭގެ މިނިވަންކަމާއި ސިޔާދަތު ބީވެނުދީ ހިފަހައްޓަން ޖިހާދުކޮށްގެންކަމަށާއި، އެންމެ ފުރަތަމަ ޝައުގުވެރިކަން ބާއްވާންވީ އިންތިހާބުގެ ބަދަލުގައި އިންޑިއާ ސިފައިން ރާއްޖޭން ބޭރުކުރުމަށްކަމަށެވެ.

ރައީސް ޔާމީން ޖަލުހުކުން ސަލާމަތްވެވަޑައިގެން މިވަގުތު އެންމެ އިސްކަމެއް ދެއްވައިގެން އިންޑިއާ އައުތްގެ ނަމުގައި ރާއްޖޭގައި ތިބި އިންޑިއާ ސިފައިން ބޭރުމަށް ގޮވާލާ ގެންދަވަނީ ޤައުމީ ހަރަކާތެއް ހިންގަމުންނެވެ. ނަމަވެސް އެ ހަރަކާތް ރައިސުލްޖުމްހޫރިއްޔާގެ ރިޔާސީ ޤަރާރަކުން ވަނީ ކަމާ ގުލުންހުރި އިދާރާތަކަށް ހުއްޓުވުމަށް އަންގަވާފައެވެ. ނަމަވެސް ރައީސް ޔާމީން ހުންނެވީ އެ ހަރަކާތަށް ދޫދެއްވާ ގޮތަކަށް ނޫންނެވެ. ރައީސް ޔާމީން ވަނީ 2023 މިހާރު މި އޮތް ހާލަތު އޮވެގެން ،ނޫނީ މިއަށްވުރެ ވަރުގަދައަށް ދިވެހިރާއްޖޭގެ ކަންކަން އިންޑިއާގެ ނުވަތަ އިންޑިއާގެ އަސްކަރިއްޔާގެ އަތްދަށުގައި އޮވެގެން ދިވެހިރާއްޖެއަށް ކޮން މުސްތަގުބަލެއްތޯ ސުވާލުކުރައްވާފައެވެ.

ރައީސް ޔާމީން ވިދާލުވީ، އިންޑިއާއަކީ އަވަށްޓެރި ގައުމަކަށްވާތީ އެ ގައުމާ ދެކޮޅަށް ކެމްޕެއިން ކުރުމުން އެކަމުގެ ސަބަބުން ދަތިވެދާނެތީ, އިންޑިއާ ސިފައިން ތިއްބަސް ވަރިހަމަކޮށްލައިގެން ތިބޭ ތިބުން ކަންބޮޑުވާކަމަށެވެ. ގުދުރަތީ މި ހުރިހާ މުއްސަނދިކަމާއި ރައްޔިތުންނާއެކު ރާއްޖެ, އިންޑިއާގެ ސަހަރަކަށް ވެއްޖެނަމަ, އެކަމާ ދިވެހިން މާދެރަވާނެކަން ކަށަވަރުވާ ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، އިންޑިއާގެ ސިފައިން ރާއްޖޭގެ އެކި ހިސާބުތަކުގައި ތިބޭ ތިބުމާ ދެކޮޅަށް އަޑުއުފުލައި އެކަމުގައި އުޅެންޖެހުމަކީ ހަަމައެކަނި ޕީޕީއެމްގެ ޒިންމާއެކޭ ބައެއް މީހުންނަށް ހީވެފައިވާކަމަށެވެ. ނަމަވެސް, ރާއްޖޭގެ މިނިވަންކަމަށް ކުޑަ ވެސް އަސަރެއްނުކޮށް ބޭއްވުމުގެ ބޮޑު ޒިންމާ އޮތީ މުޅި ރައްޔިތުންނަށް ނޫންތޯ އެމަނިކުފާނު ސުވާލުކުރެއްވިއެވެ.

ރައީސް ޔާމީން ވިދާޅުވި ގޮތުގައި, ހިޔާލުފާޅުކުރުމުގެ މިނިވަންކަމަކީ ގާނޫނުއަސާސީން ކަށަވަރުވާ ހައްގަކަށްވާއިރު އިންޑިއާއެކު އޮތް ހާރިޖީ ގުޅުމަށް ފާޑުނުކިޔެންވީ އެއްވެސް ސަބަބެއް ނެތެވެ. ސަރުކާރުތަކުން ގެންގުޅޭ ހާރިޖީ ސިޔާސަތުތަކަކީ އެއަށް ހުރިހާ ރައްޔިތުން އެއްބަސްވާނެ ކަންކަމެއް ނޫން ކަމާއި ބައެއް ގައުމުތަކުގައި އެހެން ގައުމުތަކުގެ ދިދަ އަންދާލާ ހިސާބަށް ވެސް ރައްޔިތުން ނުކުމެ ހިޔާލުފާޅުކުރާކަން ޔާމީން ވިދާޅުވިއެވެ.

"އިންޑިއާ އައުޓް"އަކީ ވެސް ދިވެހި ރައްޔިތުންތަކެއް ހިޔާލުފާޅުކުރުމަކަށްވާއިރު, އެ ހައްގު ރައީސް އިބްރާހިމް މުހައްމަދު ޞަލިޙް ނެރުއްވައި ގަރާރަކުން ނުހިފެހެއްޓޭނެކަމަށް ރައީސް ޔާމީން ވިދާޅުވިއެވެ. އަސާސީ ހައްގެއް ހަނިކުރެވޭ ހާލަތެއްގައި ވެސް އެކަން ކުރެވޭނީ މަޖިލީހުގެ ގާނޫނަކުންކަމަށް ވިދާލުވެ ރައީސް ޔާމީން ވަނީ މަޖިލީހުން ކުރަން ޖެހޭ ކޮންމެ ކަމެއް ރައީސްގެ ރިޔާސީ ގަރަރާކުން ނުކުރެވޭނެކަމަށް ވިދާޅުވެފައެވެ.

އެ ރިޔާސީ ގަރާރަކީ ޣައިރު ގާނޫނީ ގަރާރެއް ކަމާއި އެ ގަރާރުގެ ދަށުން ފިޔަވަޅެއް އަޅައި, ތަހުގީގަކާ ކުރިމަތިލާން ޖެހުނަސް އެ ވާހަކަ އެ ގޮތުގައި ދައްކަވާނެކަމަށްވެސް ރައީސް ޔާމީން ވިދާޅުވިއެވެ.