އިދިކޮޅު ޕްރޮގްރެސިވް ކޯލިޝަންގެ ވިލިމާލެ ދާއިރާގެ ކައުންސިލަރު ނަހްލާ އަލީގެ ސުލޫކީ މައްސަލަތަކެއް އަނެއްކާވެސް ބަލަން ފަށައިފިއެވެ.
ޕީޕީއެމްއިން ނަހުލާ ވަކިކޮށްފިކަމަށް ރޭ ވަނީ ޚަބަރު ފެތުރިފައެވެ. ނަމަވެސް ޚަބަރު އޮންލައިނަށް މައުލޫމާތު ދެއްވަމުން ޕީޕީއެމްގެ ތަރުޖަމާނު ވިދާޅުވީ، ނަހުލާ ޕާޓީން ވަކިކުރުމަށް ފަތުރާ ވާހަކައަކީ ކަނޑައެޅިގެން ދޮގު ވާހަކައެއް ކަމަށެވެ. ނަމަވެސް ނަހުލާއާއި ގުޅޭ ގޮތުން ސުލޫކީ މައްސަލަތަކެއް އެޕާޓީން ބަލަމުންދާކަމަށެވެ. ނަހުލާއާއި ގުޅޭގޮތުން ބަލަމުންދާ މައްސަލަތަކުގެ ތަފްސީލެއް ހީނާ ދެއްވާފައި ނުވެއެވެ.
ނަހުލާއަށް މިދިޔަ އަހަރުވަނީ ޕީޕީއެމްގެ އެތެރޭގެ އިންތިހާބުތަކުގައި ވާދަނުކުރެވޭ ގޮތަށް ފިޔަވަޅު އަޅާފައެވެ. ނަމަވެސް ރައީސް ޔާމީން ޖަލުން މިނިވަންވުމާއިއެކު މާގިނަ ދުވަހެއް ނުވަނީސް ނަހުލާއަށް އަޅާފައިވާ ފިޔަވަޅު ވަނީ ބާތިލްކޮށްފައެވެ.
ނަހުލާ އޭރު ސަސްޕެންޑް ކުރީ އެތެރޭގެ އިންތިހާބުތަކުގައި ވާދަނުކުރެވޭ ގޮތުގެ އިތުރަށް ޖަލްސާތަކުގައި ވާހަކަ ވެސް ނުދެކެވޭ ގޮތަށެވެ. އެނގިފައިވާ ގޮތުގައި ނަހުލާއާ މެދު ސުލޫކީ ކޮމިޓީން ފިޔަވަޅު އެޅީ ސިޓީ ކައުންސިލްގެ ޑެޕިއުޓީ މޭޔަރު ހޮވުމަށް ބޭއްވި އެތެރޭގެ އިންތިހާބުގައި ޕާޓީގެ ނިންމުމާ ދެކޮޅަށް މަސައްކަތްކުރެއްވުމުންނެވެ.
ނަހުލާ ވަނީ 2014 ވަނަ އަހަރާއި 2019 ވަނަ އަހަރު ރައްޔިތުންގެ މަޖިލިސް އިންތިހާބުގައި ވާދަކޮށްފައެވެ.
