ޔޫއެފާ ޗެމްޕިއަންސް ލީގުގެ ފައިނަލުގެ ޖާގަ ކަށަވަރުކޮށް އިނގިރޭސި ފުޓްބޯޅައިގެ ބޮޑު ރެކޯޑެއް ލިވަޕޫލުން ހަދައިފިއެވެ.
ލިވަޕޫލް ވެފައި ވަނީ އިނގިރޭސި ފުޓްބޯޅައިގެ ތާރީހުގައި އެއް ސީޒަނެއްގައި، ޔޫރަޕްގެ ފައިނަލެއްގެ އިތުރުން ޑޮމެސްޓިކް ދެ މުބާރާތް ކަމަށްވާ އެފްއޭ ކަޕާއި ލީގު ކަޕްގެ ފައިނަލަށް ވެސް ދަތުރު ކުރި އިނގިރޭސި ފުރަތަމަ ޓީމަށެވެ. މިއީ ލިވަޕޫލް ގޮވައިގެން ކޯޗު ޔާގަން ކްލޮޕް، ދަތުރު ކުރި ޔޫރަޕްގެ ހަތަރުވަނަ ފައިނަލެވެ.
މި ސީޒަނުގައި ހަތަރު ތަށި ކާމިޔާބު ކުރުމުގެ ފުރުސަތު އޮތް ލިވަޕޫލުން ވަނީ ފެބްރުއަރީ މަހު ޕެނަލްޓީ ޖަހައިގެން ޗެލްސީ ބަލިކޮށް ލީގު ކަޕް ކާމިޔާބު ކޮށްފަ އެވެ. މި މަހު 14 ވަނަ ދުވަހު އެފްއޭ ކަޕް ފައިނަލުގައި ޗެލްސީއާ ދެކޮޅަށް ލިވަޕޫލުން ކުޅޭނެއެވެ. އިނގިރޭސި ޕްރިމިއާ ލީގުގެ ދެ ވަނައިގައި ލިވަޕޫލް އޮތީ އެއް ވަނައިގައި އޮތް މެންޗެސްޓާ ސިޓީ އަށް ވުރެ އެއް ޕޮއިންޓް ފަހަތުގައެވެ. އަދި މި މަހު 28 ގައި ލިވަޕޫލުން ޗެމްޕިއަންސް ލީގުގެ ފައިނަލުގައި ވާދަކުރާނެއެވެ.
ކޯޗުކަމާ 2015 ވަނަ އަހަރު އޮކްޓޫބަރު މަހު ހަވާލުވި ޔާގެން ކްލޮޕްގެ ކޯޗުކަމުގައި އެ ޓީމުން މި ވަނީ ތިން ވަނަ ޗެމްޕިއަންސް ލީގު ފައިނަލުން ފުރުސަތު ހޯދައިފައެވެ. ކްލޮޕްގެ ކޯޗުކަމުގައި ލިވަޕޫލް 2018 ވަނަ އަހަރުގެ ފައިނަލުގައި ރެއާލް މެޑްރިޑް އަތުން ބަލިވި ނަމަވެސް 2019 ވަަނަ އަހަރު ޓޮޓެންހަމް ހޮޓްސްޕާސް ބަލިކޮށް ހަ ވަނަ ފަހަރަށް ޗެމްޕިއަންސް ލީގު ކާމިޔާބު ކުރިއެވެ.
ޕެރިހުގައި ކުޅޭ ފައިނަލުގައި ލިވަޕޫލް ނުކުންނަން ޖެހޭނީ ދެ ވަނަ ސެމީގައި ރެއާލް މެޑްރިޑާއި މެންޗެސްޓާ ސިޓީ ކުޅެގެން މޮޅުވާ ޓީމަކާ ދެކޮޅަށެވެ. ފުރަތަމަ ސެމީގައި ސިޓީން ވަނީ އަމިއްލަ ދަނޑުގައި 4-3 އިން ރެއާލް ބަލިކޮށްފައެވެ.
