އިނގިރޭސި ޕްރިމިއާ ލީގުގައި ލީޑްސް ޔުނައިޓެޑް ބަލިކޮށް އެން މެފަހުގެ ޗެމްޕިއަން އަދި ތާވަލުގެ އެއްވަނައިގައި އުޅޭ މެންޗެސްޓާ ސިޓީން އެއް ޕޮއިންޓުގެ ލީޑު ދަމަހައްޓައިފިއެވެ.
ލީޑްސްގެ ދަނޑުގައި ކުޅުނު މިމެޗް ސިޓީން ކާމިޔާބުކުރީ ހީކުރި ވަރަށް ވުރެ ފަސޭހަކަމާއެކު 4-0 ގެ ނަތީޖާއަކުންނެވެ. މިމެޗްގެ ފުރަތަމަ ލަނޑު ސިޓީއަށް ކާމިޔާބުކޮށްދިނީ މެޗްގެ 13 ވަނަ މިނެޓްގައި ލިބުނު ހިލޭ ޖެހުމަކުން ރޮޑްރީއެވެ. އަދި ދެވަނަ ލަނޑު މެޗްގެ 54 ވަނަ މިނެޓްގައި ޖަހާދިނީ ނޭތަން އައިކަރއެވެ.
މި މެޗުގައި ސިޓީއިން ކާމިޔާބުކުރި ތިންވަނަ ލަނޑު މެޗްގެ 78 ވަނަ މިނެޓްގައި ޖަހާދިނީ ގެބްރިއަލް ޖޭސުސްއެވެ. އަދި ފަހު ލަނޑު މެޗްގެ އިތުރު ވަގުތުގައި ޖަހާދިނީ ބަދަލު ކުޅުންތެރިޔާ ފެނާންޑީނިއޯއެވެ. މިމެޗްގައި މީގެއިތުރުންވެސް ލަނޑު ޖަހާނެ ގިނަ ފުރުސަތުތަކެއް ސިޓީއަށް ލިބިގެންދިޔައިރު ލީޑްސްއިންވެސް ވަނީ ލަނޑު ޖަހާނެ ރަނގަޅު ފުރުސަތު ތަކެއް ތަނަވަސްކޮށްފައެވެ. އަދި ލިޑްސްއަށް މިމެޗްގައި ލަނދެއް ކާމިޔާބު ނުކުރެވުނީ ސިޓީގެ ކީޕަރު އެޑަސަންގެ ހުށިޔާރު ކަމުންނާއި ނަސީބު އެހީނުވުމުންނެވެ.
މިކާމިޔާބީއާއެކު ސިޓީއަށް މިހާރު ބާކީ ހަތަރު މެޗް އޮތް އިރު 34 މެޗުން ލިބިފައިވަނީ 83 ޕޮއިންޓެވެ. އަދި ދެވަނައިގާ އުޅޭ ލިވަޕުލަށް ލިބިފައިވަނީ 82 ޕޮއިންޓެވެ. އެހެންކަމުން ސިޓީއިން ބާކީ އޮތް ހަތަރު މެޗް ކާމިޔާބު ކުރެވިއްޖެނަމަ ޕެޕް ގާދިއޯލާގެ ދައުރުގައި ދެވަނަ ފަހަރަށް ޕްރިމިއަރ ލީގުގެ ތަށި ދިފާއު ކުރެވިގެންދާނެއެވެ.
މީގެ އިތުރުން މިމެޗުން ބަލިވުމުން ލިޑްސް މިހާރު އުޅެނީ 34 މެޗުން ލިބިފައިވާ 34 ޕޮއިންޓާއެކު ތާވަލްގެ 17 ވަނައިގައެވެ. ނަމަވެސް 18 ވަނައިގާ އުޅޭ އެވަޓަންއަށް ވުރެ ދެ މެޗް އިތުރަށް ލީޑްސްއިން ކުޅެފައިވުމުން އެވަޓަންއިން އެދެމެޗް ކާމިޔާބުކޮށްފި ކަމަށްވާނަމަ ލީޑްސް 18 ވަނައަށް ވެއްޓުމުގެ ބިރު އެބައޮތެވެ.
