ރޯދަމަހު އަންނަ އެންމެ މާތް ރޭ ކަމުގައިވާ، ލައިލަތުލް ޤަދުރި ވިލޭރޭގެ އަޅުކަމަށް، ފަލަސްތީނުގެ އަލް މަސްޖިދުލް އަޤްސާއަށް 250،000 މުސްލިމުން ޖަމާވެފައި ވާކަމަށް، ޖެރޫސެލަމްގެ އޮތޯރިޓީތަކުން ހާމަ ކޮށްފިއެވެ.
މުސްލިމުން މިމާތް ރޭގެ އަޅުކަމަށް، "ޑޯމް އޮފް ރޮކް" ހިމެނޭ ސަރަހައްދަށް ޖަމާވާން ފަށާފައިވަނީ ބުދަ ދުވަހުގެ އިރު އޮއްސުނު ވަގުތުން ފެށިގެންނެވެ. މިއީ، މުސްލިމުން ގަބޫލުކުރާ ގޮތުގައި، ރަސޫލާ އިސްރާޢްއާއި މިޢުރާޖަށް އަރާވައިޑައިގެން ތަނެވެ.
ލައިލަތުލް ގަދުރި ވިލޭރެއަކީ، އެރެއެއްގައި ކީރި ޤުރުއާން ބާވައިލެއްވި ރެއެވެ. އަދި އޭރެއަކީ ފަހު ދިހައިގެ އޮނަހިރި ރޭތަކުގެ ތެރެއިން ރެއެއްކަމުގައި ވާރިދުވެގެން ވެއެވެ.
މިއަހަރުގެ ރޯދަމަހުގެ ލައިލަތުލް ޤަދުރި ވިލޭރެއަށް ގިނަ އަދަދެއްގެ މުސްލިމުން އަލް އަޤްސާ މިސްކިތަށް ޖަމާވެފައި މިވަނީ، އިސްރާއީލު ސިފައިންނާއި މިސްކިތަށް އަޅުކަން ކުރުމަށް ޒިޔާރަތްކުރާ ފަލަސްތީނު ރައްޔިތުންނާ ދެމެދު ބޮޑެތި ހަމަނުޖެހުންތައް ހިނގާ ނުތަނަވަސްކަން އިތުރުވެފައިވާ ދަނޑިވަޅެއްގައެވެ. އަދި މި ހަމަނުޖެހުންތަކުގައި އިސްރާއީލު ސިފައިންވަނީ، އަލް އަޤްސާ މިސްކިތް އެތެރެއަށް ވަދެ، އަޅުކަން ކުރަން ތިބި ފަލަސްތީނުގެ ރައްޔިތުންނަށް ހަމާލާ ދީފައެވެ.
ލައިލަތުން ޤަދުރި ވިލޭރެއަށް މުސްލިމުން އަޤްސާ މިސްކިތަށް ޖަމާވެފައި ވަނިކޮށްވެސް ކުރިމަތިލުންތައް ހިގާފައިވާ ކަމަށް ބައެއް މީޑިއާތަކުން ވަނީ ރިޕޯޓު ކޮށްފައެވެ.
އަލް އަޤްސާ މިސްކިތް ހިމެނޭ ސަރަހައްދަކީ، ޓެމްޕްލް މައުންޓުގެ ގޮތުގައި، ޔަހޫދީންވެސް މުގައްދަސް ތަނެއްގެ ގޮތުގައި ފާހަގަ ކުރާ ބިނާއެކެވެ. ޔަހޫދީން އަޅުކަން ކުރަނީ، މުސްލިމުން ބުރާޤް ފާރުގެ ގޮތުގައި މުޚާތަބުކުރާ ފާރު ކައިރީގައި ތިބެގެންނެވެ.
