ސަރުކާރުން ހިންގާ 5،000 މިލިޔަން ރުފިޔާގެ ޕްރޮޖެކްޓްގެ ލޯކަލް އެޖެންޑަކީ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސްގެ އާއިލީ ކުންފުނި ކަމުގައި ރައްޔިތުންގެ މަޖިލީހުގެ ހެންވޭރު ދެކުނު ދާއިރާ ހުސެއިން ޝަހީމް (އަނދުން ހުސެއިން) ވިދާޅުވެއްޖެއެވެ.
ހުސެއިން މިހެން ވިދާޅުވީ މިސަރުކަރުން ހިންގާ މަސައްކަތްތަކުގައި އިކޮނޮމިކް މިނިސްޓަރ ފައްޔާޟުގެ ނުފޫޒާއި، ބާރު އޮންނަކަމަށް އިލްޔާސް ދައްކަވަމުންދާ ވާހަތަކާއި ގުޅިގެންނެވެ. އަދި ސަރުކާރު ތެރެއިން ކުރާ ކަންކަމުގައި ފައްޔާޟަކީ "ބްރޯ" ކަމަށް ވިދާޅުވެ އިންތިގެ ޓީމުން ދައްކާ ވާހަތަކާއި ގުޅިގެންނެވެ.
ހެސެއިން ވިދާޅުވީ ނުފޫޒާއި، ބާރުގެ ވާހަކަ ދައްކައި، "ބްރޯ" އޭ ކިޔާއިރު މިސަރުކާރުން ހިންގާ 5،000 މިލިޔަނެއްހާ ރުފިޔާގެ ޕްރޮޖެކްޓް ހިންގާ އެފްކޯން ކޮމްޕެނީގެ ލޯކަލް އެޖެންޓަކީ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސްގެ އާއިލީ ކުންފުނިކަމަށެވެ. މަޖިލީހުގެ އެސްއީ ކޮމެޓީއައި ހަވާލުވެ އިންނަވައި، ކުންފުނިތަކުގެ ތެރެއަށާއި، ބޮޑެތި ޕްރޮޖެކްޓްތަކުގައި ނުފޫޒު އިންތިހާއަށް އޮތް ބޭފުޅަކު މިފަދަ ވާހަކަ ދައްކަވަމުން ލަދު ގަންނަންޖެހޭކަމަށް ހުސެއިން ވިދާޅުވިއެވެ.
މިސަރުކާރުން ހިންގާ 5،000 މިލިޔަނެއްހާ ރުފިޔާގެ ޕްރޮޖެކްޓް މިހިންގާ އެފްކޯން ކޮމްޕެނީގެ ލޯކަލް އެޖެންޓަކީ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސްގެ އާއިލީ ކުންފުނި. އެބޭފުޅާ މިއިންނަވަނީ 19 ވަނަ ރައްޔިތުންގެ މަޖިލީހުން މުޅިން އަލަށް އުފެއްދި ކުންފުނިތަކާއި ބެހޭ އެސްއޯއީގެ މުޤައްރިރަކަށް. އެކޮމެޓީގެ ޗެއާއެއީ. އެހެންވީމަ އަޅުގަނޑުމެން ނަޒާހާތް ތެރިކަމާއި، ބްރޯ ހެދުމާއި، ބާރުގެ ބޭނުން ކުރުމާއި ކަންކަން ދަމައި ގަތުމާއި، އަދި އަމިއްލަ ޖީބަށް ފައިދާވާ ގޮތަށް ކަންކަން ކުރުމުގެ ވާހަކަ އަޅުގަނޑުމެން ދައްކާއިރު އަޅުގަނޑުމެންނަށް ހުރެެވޭތަން އަޅުގަނޑުމެން އަމިއްލަ އަށް ގަބޫލު ކުރަންޖެހޭ.
– ހުސެއިން ވިދާޅުވިއެވެ.
ރައްޔިތުންގެ މަޖިލީހުގެ އެސްއޯއީ ކޮމެޓީއަކީ ސަރުކާރުގެ ކުންފުނިތަކުގެ މަސައްކަތްތައް ހިނގާ ނުހިނގާގޮތް މިނިވަންކަމާއިއެކު ބަލަން އޮތް ކޮމެޓީއަށްވާއިރު، ކޮމެޓީގެ މުޤައްރިރަކަށް އިންނަވާ ބޭފުޅާގެ މަސްލަހަތު ސަރުކާރުން ހިންގާ ޕްރޮޖެކްޓްތަކުގައި އެހާ ބޮޑުވުމުން އިންސާފު ވެރިކަމާއިއެކު ކަންކަން ބެލޭނެ މިންވަރާއިމެދު ސުވާލު އުފެދޭކަމަށް ހުސެއިން ޝަހީމް ވިދާޅުވިއެވެ.
އެފަދަ ބާރުގަދަ ކޮމެޓީއެއްގެ މުޤައްރިރަކަށް ލިބުމަކީ ރާއްޖެއަށް ބޭރުން އަންނަ ހުރިހާ ކުންފުނިތަކެއްގެ ލޯކަލް އެޖެންޓްކަން ނެގުމެއްނޫން. އެއާއި ދުރުގައި ހުރެގެން އެކަންކަން ބަލަންޖެހޭނީ. އަޅުގަނޑުމެން އެބަ އަޑުއަހަން މިތަނުގެ މަސް ފެކްޓްރީ، އެއީ އިންޑިއާގެ ހިލޭ އެހީގެ ދަށުން އަޅާ 3 މަސް ޕްލާންޓް. ކޮން ބައެއްތޯ މިތަނުގެ ކަންކަމާއި ހަވާލުވެފައިތިބީ.
– ހުސެއިން ވިދާޅުވިއެވެ.
އިލްޔާސް ވަނީ ކެމްޕެއިންފައި އައްޑޫގައި ވާހަކަ ދައްކަވަމުން ސަރުކާރަށާއި، މިނިސްޓަރ ފައްޔާޟަށް ވަރަށް ބޮޑަށް ފާޑު ވިދާޅުވެފައެވެ. އައްޑޫ ސިޓީ ރައީސް ނަޝީދުގެ އޮފީސް ކުރިމަތީގައި ބޭއްވި ތަރީހުގައި އައްޑޫ ރައްޔިތުންނާއި ވާހަކަ ދައްކަވަމުން އިލްޔާސްވަނީ އައްޑޫ ރައްޔިތުންނަށް މިސަރުކާރުން ވެފައިޥާ ވައުދުތަކާއި، ކުރަންބުނި އެއްވެސް ކަމެއް މިހާތަނަށް ކުރެވިފައި ނުވާކަން ފާހަގަކޮށްފައެވެ. އައްޑޫގައި ފަތުރުވެރިކަން ކުރުމަށް އޮތް ދޮރުތައް ބަންދުކޮށް ހުޅިފައި އޮތް ދެރިސޯޓް ބަންދު ކުރިތާ އެތައް އަހަރެއްވާއިރުވެސް މިއަދާއި ހަމައަށްވެސް ހުޅުވިފައި ނުވާކަން އޭނާ ފާހަގަ ކުރެއްވިއެވެ.
