ވިކިލީކްސްގެ ބާނީ، ޖޫލިއާން އަސާންޖު އެމެރިކާއާއި ހަވާލުކުރުމުގެ ރަސްމީ ނޯޓިސް، ބުދަ ދުވަހު ނެރެފިއެވެ. އަސާންޖު އެގައުމާއި ހަވާލުކުރުމަށް އެކެރިކާއިން ޑިމާންޑް ކުރަމުންދަނީ، އިރާގާއި އަފްއާނިސްތާނުގައި އެމެރިކާއިން ކުރި ހަނގުރާމައިގެ ސިއްރު ލިޔުންތަކެއް އޭނާ އުފައްދާފައިވާ ވިކިލީކްސްއިން އާންމުކުރުމާއި ދެކޮޅަށް އޭނާގެ މައްޗަށް އެގައުމުން ކޮށްފައިވާ ދައުވާތަކާއި ކުރިމަތި ލުމަށެވެ.
އަސާންޖު އެމެރިކާއާއި ހަވާލު ކުރުމާއި ގުޅޭގޮތުން އެންމެ ފަހުގެ ނިންމުން ދެން ނިންމާނީ އިނގިރޭސިވިލަތުގެ އިންޓީރިއަރ މިނިސްޓަރ ޕްރިޓީ ޕެޓަލްއެވެ. އެހެންނަމަވެސް، އިންޓީރިއަރ މިނިސްޓަރުގެ ނިންމުންވެސް 14 ދުވަހުގެ ތެރޭގައި އިސްތިއުނާފް ކުރުމުގެ ފުރުސަތު އަސާންޖަށް ލިބިގެން ދާނެއެެވެ.
އިންގިރޭސިވިލާތުގެ ސެންޓްރަލް ލަންޑަންގެ މެޖިސްޓްރޭޓް ކޯޓަކުން މިއަދު މި ނިންމި ނިންމުން ވެގެންދާނީ، އަސާންޖު އެމެރިކާއާއި ހަވާލު ކުރުމާއި ގުޅޭގޮތުން، އިނގިރޭސި ކޯޓުތަކުގައި ކުރިޔަށްދިޔަ ގާނޫނީ އެންމެ ފަހުގެ މަރުހަލާއާއި ހަމައަށް ދަތުރުކުރި ކުރުމެއްގެ ގޮތުގައެވެ.
އަސާންޖުގެ ގާނޫނީ ވަކީލުންވަނީ، އިންޓީރިއަރ މިނިސްޓަރ ޕްރިޓީ ޕެޓަލްއަށް މައްސަލަ ހުށަހަޅުއްވާނެ ކަމަށް ވިދާޅުވެ، އަދި އޭގެ އިތުރުން ކޯޓުން ނިންމި ނިންމުގައި ފާހަގަ ކޮށްފައިހުރި ނުކުތާތައް އިސްތިއުނާފް ކުރާނެކަމަށްވެސް ވިދާޅުވެފައެވެ.
"އަސާންޖު ކުރިން ފާހަގަ ކޮށްފައިހުރި މުހިންމު ނުކުތާތަކާ ގުޅޭގޮތުން ހައި ކޯޓުގައި އަދި އިސްތިއުނާފް ކޮށްފައި ނުވާނެ،" އަސާންޖުގެ ގާނޫނީ ވަކީލު ބާރންބާގް ޕިއާރސް ސޮލިސިޓަރސްގެ ފަރާތުން އާންމު ކޮށްފައިވާ ބަޔާނުގައި ބުނެފައި ވެއެވެ.
"އިސްތިއުނާފްގެ އިތުރު މަރުހަލާތައް އަދިވަނީ ފަށަންވެފަ."
އިނގިރޭސި ސުޕްރީމް ކޯޓުން ފާއިތުވެދިޔަމަހު ވަނީ، އަސާންޖު އެމެރިކާއާއި ހަވާލުކުރުމުގެ މައްސަލައިގެ އިސްތިއުނާފް އެކޯޓުން ބަލައިގަތުމަށް ދެކޮޅު ހަދާފައެވެ. އެމެރިކާއާއި އަސާންޖު ހަވާލު ކޮށްފިނަމަ، އޭނާގެ މައްޗަށް އުމުރު ދުވަހުގެ ޖަލު ހުކުމެއް އައުމުގެ ފުރުސަތު އެބަ އޮތެވެ.
އެމެރިކާއިން މަސައްކަތް ކުރަމުންދަނީ، އެގައުމުން އިރާގާއި އަފްއާނިސްތާނުގައި ކުރި ހަނގުރާމައާއި ގުޅުންހުރި 500،000 ސިއްރު އަސްކަރީ ލިޔުމެއް އޭނާ ލީކު ކޮށްލި މައްސަލާގައި އޭނާގެ މައްޗަށް އެގައުމުގައި ދަައުވާ ކުރުމަށެވެ.
އަސާންޖު އެމެރިކާގެ ސިކިއުރިޓީ އެންމެ ވަރުގަދަ ޖަލެއްގައި ބަންދު ކޮށްފައި ބަހައްޓައިފިނަމަ، އޭނާ އަމިއްލައަށް ދަންޖެހި މަރުވުމުގެ ފުރުސަތު އޮތްކަމަށް ބަލާ، ފާއިތުވެދިޔަ އަހަރުގެ ޖެނުއަރީމަހު އޭނާވަނީ، އެމެރިކާއާއި އޭނާ ހަވާލުކުރުމާއި ދެކޮޅަށް ކޯޓުގައި މައްސަލަ ކާމިޔާބުވެސް ކޮށްފައެވެ. އެހެނަމަވެސް އޭގެ ފަހުން އެމެރިކާއިންވަނީ، ފާއިތުވެދިޔަ އަހަރުގެ އޮކްޓޯބަރުމަހު މައްސަލަ އިސްތިއުނާފް ކޮށްފައެވެ. އެމެރިކާގެ ގާނޫނީ ވަކީލުން މައްސަލަ އިސްތިއުނާފް ކޮށްފައިވަނީ، ފެޑެރަލް ސުޕަރމެސް ޕްރިޒްން (ސަލާމަތީ ފިޔަވަޅު އެންމެ ވަރުގަދަ ޖަލުތައް)ގައި އޭނާ ބަންދު ކޮށްފައި ނުބަހައްޓާނެ ކަމަށް ވިދާޅުވެއެވެ. އަދި ވިދާޅުވެފައިވަނީ އަސާންޖަށް އެކަށިގެންވާ އެހީތެރިކަން ލިބޭނެ ކަމުގައެވެ.
އަސާންޖުވަނީ ކޯޓުން އެމެރިކާއާއި އެއްކޮޅަށް ނިންމި ނިންމު މިއަހަރުގެ ޖެނުއަރީމަހު އިސްތިއުނާފް ކޮށްފައެވެ. އަދި ކޯޓުގެ ދެ ފަނޑިޔާރުންވަނީ، "އާންމު މަސްލަހަތުގެ ގާނޫނުގެ ނުކުތާތަކަށް" ރިއާޔަތްކޮށް، އެންމެ މަތީ ކޯޓުގައި މައްސަލަ އިސްތިއުނާފް ކުރުމުގެ ފުރުސަތު އޮތްކަމަށް ނިންމާފައެވެ.
އެހެންނަމަވެސް، ސުޕްރީމް ކޯޓުން މައްސަލަ ބަލައިނުގަތުމަށް ނިންމާފައިވަނީ، އެޕްލިކޭޝަންގައި، "ގާނޫނީގޮތުން ބަހުސް ކުރެވިދާނެ ނުކުރާތައް ހުރިކަމަށް" އެކޯޓަށް ނުފެންނަކަމަށް ބުނެއެވެ.
