އިނގިރޭސި ޕްރިމިއަރ ލީގުގައި ބްރިޓަން އަތުން އާސެނަލް ބަލިވިއިރު، ގިނަ ލަނޑުތަކެއް ޖަހާ ޗެލްސީއިން ސައުތެމްޕްޓަން ބަލިކޮށްފިއެވެ.
ސައުތެމްޕްޓަންގެ ދަނޑުގައި ޗެލްސީ އާއި ވާދަކުރި މެޗު ޗެލްސީއިން ކާމިޔާބުކުރީ 6-0 ގެ ތަފާތު ބޮޑު ނަތީޖާއަކުންނެވެ. ފުރަތަމަ ހާފުގެ އަށްވަނަ މިނެޓުގައި ޗެލްސީއަށް ލީޑު ނަގައިދިނީ މާކޯސް އަލޯންސޯއެވެ. މި މެޗުގައި ޗެލްސީގެ މޭސަން މައުންޓް ދެލަނޑު ޖެހިއިރު، ޓީމޯ ވާނާވެސް ވަނީ ދެލަނޑު ކާމިޔާބު ކޮށްދީފައެވެ. މެޗުގައި ދެން ލަނޑު ޖެހީ ކައި ހަވާޓްޒްއެވެ.
މި ނަތީޖާއާއެކު ދެވަނަގައި އޮތް ލިވަޕޫލް އާއި 10 ޕޮއިންޓުގެ ފަރަގަކާއެކު ޗެލްސީ އޮތީ ތާވަލުގެ ތިންވަނައިގައެވެ. މެޗުން މޮޅުވެގެން ލިބުނު ތިން ޕޮއިންޓާއެކު ޗެލްސީ ވަނީ މުބާރާތުގައި ޖުމްލަ 62 ޕޮއިންޓު ހޯދާފައެވެ. ތާވަލުގެ އެއްވަނައިގައި މެންޗެސްޓަރ ސިޓީ އޮތީ 73 ޕޮއިންޓު ހޯދައިގެންނެވެ.
އެންމެ ފަހުން ލީގުގައި އަމިއްލަ ދަނޑުގައި ބްރެންޓްފޯޑް އަތުން ބޮޑު ބައްޔަކާ ކުރިމަތިވެ، ޖެހިގެން އައި ޗެމްޕިއަންސް ލީގު މެޗުގައި ވެސް އަމިއްލަ ދަނޑުގައި ރެއާލް މެޑްރިޑް އަތުން ޗެލްސީ ވަނީ ބަލިވެފައެވެ. އަދި ރޭގެ މެޗަށް ފަހު، ޗެލްސީ އަށް ދެން އޮންނާނީ މި ހަފްތާގައި ޗެމްޕިއަންސް ލީގުގައި ރެއާލް މެޑްރިޑާ ދެކޮޅަށް ރަށުން ބޭރުގައި ކުޅޭ ކުއާޓާ ފައިނަލުގެ ދެވަނަ ލެގުގެ މެޗެވެ.
