ބަތަލާ ސޯނަމް ކަޕުރާއި އޭނާގެ ފިރިމީހާ، ވިޔަފާރި ވެރިޔާ އާނަންދު އަހޫޖާގެ ގެއިން އަގުބޮޑު ގަހަނާތަކެއް ވަގަށް ނަގައިފިއެވެ.
ދިއްލީގައި މި ދެމަފިރިން އުޅެމުން އަންނަ ގެއިން ވައްކަން ކޮށްފައިވަނީ ފެބްރުވަރީ މަސްތެރޭގައި ނަަމަވެސް އެކަން މީޑިއާގައި ރިޕޯޓް ކޮށްފައިވަނީ އިއްޔެއެވެ.
ފުލުހުންނަށް މިމައްސަލަ އެންމެ ފުރަތަމަ ރިޕޯޓް ކޮށްފައިވަނީ އާނަންދުގެ މާމައެވެ. ނަމަވެސް ފަހުން އާނަންދުގެ މަންމަވެސް ވަނީ މި މައްސަލަ ފުލުހުންނަށް ހުށައަޅާފައެވެ.
އެމީހުން އެ އެއްޗެހި ހުރިތޯ ޗެކް ކޮށްފައިވަނީ މީގެ ދެއަހަރު ކުރިން ކަމަށާއި އޭގެ ފަހުން ފެބްރުވަރީ މަހު ބެލި އިރު ނެތް ކަމަށް ފުލުހުންނަށް ރިޕޯޓްކޮށްފައި ވާކަމަށް ޚަބަރުތައް ބުނެއެވެ.
ވަގަށް ނަގައިފައިވާ ސާމާނުގެ އަގު 1.4 ކްރޯޑް އިންޑިއަން ރުފީސްއަށް އަރާ ކަމަށް ވެސް ޚަބަރުތައް ބުނެއެވެ. އެ އާއިލާއިން ގެންގުޅޭ 25 މުވައްޒަފަކާއި އަދި އެ ގޭގައި މަސައްކަތްކުރާ 9 މީހަކާ އެކަމާ ގުޅޭ ގޮތުން ފުލުހުން މިހާތަނަށް ވަނީ ސުވާލު ކޮށްފައެވެ.
ސޯނަމް އާއި އާނަންދު ކައިވެންޏަށް ފަހު ގިނައިން ދިރިއުޅެނީ ލަންޑަންގައެވެ. އެމީހުން އިންޑިއާއަށް އަންނަނީ ވަރަށް މަދުންނެވެ.
