މުސްތަފާބޭއެވެ. ރޯދަމަހަކީ މާތް މައްސަރެއްކަން އަހުރެންނެކޭ އެއްފަދައިން މުސްތަފާބޭވެސް އެކަން ދަންނާނޭކަމުގައި އަހުރެން މިހުންނަނީ ޔަގީން ކޮށްގެންނެވެ. އެހެންވެގެން، މިފަދަ މާތް މައްސަރެއްގައި އަހުރެން މިހުންނަނީ މުސްތަފާބޭއަށް ނިސްބަތްކޮށް އެއްޗެކޭ ބުނެވިދާނެތީ، ނޫހެއްހާ މިންވަރުވެސް ކިޔާ ނުލައެވެ. ގޭގެ ޓީވީވެސް ހުޅުވައެއް ނުލަމެވެ. ރޯދަވެސް ވީއްލާ މިލަނީވެސް، ގޭގެ އެހެންމީހަކު އައިސް ބަންގިގޮވައިފިއޭ ބުނީމައެވެ.
މިހާ ރަގަޅަށް އަމަލުތައް ބަހައްޓައިގެން އުޅެއުޅެ ހުއްޓާވެސް މުސްތަފާބޭގެ ޢަމަލުތައް ބަހައްޓާގޮތުން، އެއްޗެކޭ ބުނެނުލާ ހުންނަން ޒަމީރު ތަނެއް ނުދިނެވެ. އަހުރެންގެ އަމިއްލަ ނަފްސުގެ މައްޗަށް މުސްތަފާބޭ ކޮންމެ ފަހަރަކުވެސް ގަދަވެ ގަންނަނީއެވެ. ބޮޑަށް ބެލެވެނީ، އަހުރެންގެ އަނގަ ގޮއްވުމަކީ މުސްތަފާބޭއަށް އެއިން ކޮންމެވެސް ބާވަތެއްގެ އުފަލެއް ހާސިލްކުރެވޭ ކަމަކަށް ވީމާ، މާބޮޑަށްވެސް މުސްތަފާބޭ އެގޮތް ބޭނުންވަނީ ހެންނެވެ.
މުސްތަފާބޭއެވެ. މި މާތް ރަމަޟާން މަސް އަހުރެމެން އެންމެންނާ ބައްދަލުކުރިއިރު، މި ސައްތައިން ސައްތަ އިސްލާމީ ޤައުމުގައި، މިސްކިތްތައް މަރާމާތު ކުރަން، އިސްލާމިކް މިނިސްޓްރީއިން ފަންޑު ފޮށި ހުޅުވާ ހިސާބަށް ކަންތައް ދިޔައީމާ މިއީ ބޮޑު ޖޯކެއް ނޫންތޯއެވެ. މިސްކިތްތައް މަރާމާތު ކުރުމަށް ފަންޑު ފޮށި ބަހައްޓާ، އޭޓީއެމް ކައިރީގައި ޒުވާން ފުރައިގެ ކުދިން ސަލާންޖަހަން ތިބޭގޮތަށް، އިސްލާމިކް މިނިސްޓަރު ސަލާން ޖަހާއިރު، ޔޫތު މިނިސްޓަރު ކުޅިވަރު ހަފްލާއަކަށް މިލިއަނުން ރުފިޔާ ޚަރަދު ކުރެވޭ ސަރުކާރުގެ ބަޖެޓެއް އޮތުން މިއީ ކިހާ ލަދުވެތި ކަމެއްތޯއެވެ.
ނާޗަރަންގީއަށް މިލިއަނުން ޚަރަދު ކުރެވޭއިރު، ދީނީ ކަންކަމަށް ލިބޭ ބަޖެޓް، އައިވީ ފުޅިއަކުން ޖަހާ ތިއްކެއްގެ މިސާލުގައި އަންނަ ކަމަށްވާނަމަ، އަހުރެމެން ކަހަލަ، އަނގަގަދަ މިތުރުން، "ކަނޑަވާނެކަން" މުސްތަފާބޭއަށް ނުވިސްނުނުކަން ހާދަހާވާ ދެރައެވެ. ހުރި ހިތާމައެއްގެ ބޮޑު ކަމާއެވެ.
މުސްތަފާބޭއެވެ. ކޯލިޝަނުގައި ތިޔަތިބި ބައެއް ޕާޓީތަކުގައި، ހުކުރު ހަމަވާ ވަރަށްވެސް މެމްބަރުން ނެތްކަން މުސްތަފާބޭއަށް ހަމަ ރަނގަޅަށް އެނގޭނެއެވެ. އެހަލަ ޕާޓީއަކުން ރައީސް އޮފީހުގައި ބަހައްޓާފައި ހުންނަ ސޮރަށްވެސް، އަމިއްލަ ޓުވިޓާ އެކައުންޓުން ޓްވީޓް ކުރެވޭއިރުވެސް މިތިބެވެނީ ވާނުވާގައެެވެ. އެކަން ފާހަގަ ކޮށްލާއިރު މި ބުނަނީ ހެކް ކުރީ ކަމުގައެވެ. މިބާވަތުގެ މީހުން އަމިއްލަ ފަޓުލޫނު ފޯކޮށްލާފައިވެސް ބުނާނީ ލީކްވީ ކަމުގައެވެ.
ދެން އެޕާޓީއަށް ނިސްބަތްވާ ވަޒީރުވެސް އެއުޅުއްވަނީ މަގުމައްޗަށްވެސް ނުކުންނާން ނުކެރިގެންނެވެ. މާކުރީގައި ޕާޓީ ތެރޭގައި ކުރެވުނު ކަމެއްގެ ވާހަކަ މާ ސަރީޙަ އިބާރާތުން ކިޔައިދޭ ވީޑިއޯއެއް ޔޫޓިއުބުގައި އޮތްވާހަކަވެސް ރައްޓެއްސަކު އަހުރެންގެ ގާތު ބުންޏެވެ. އަދި ވަޒީރުކަމުގައި ދާއިމަށް ހުރުމަށް ކިޔަވާފަހުރި ކޮންމެވެސް ކިޔެވެއްޔެއްގެ ވީޑިއޯވެސް އެބައޮތޭ މީހުން އެބަ ކިޔައެވެ. މިއީ ކިހާ ހެއްވާ ކަމެއްތޯއެވެ.
މުސްތަފާބޭމެން އުޅޭގޮތުން ލަދުން ބޯހަލާކުވެގެން، ސޯޝަލް މީޑިއާއި ދުރަށް ދާންވެގެން އަހުރެން މިހާރު މިގެންގުޅެނީވެސް ބައްތި ފޯނެކެވެ. އެހެންވެގެން ކުރިން މިބުނި ވީޑިއޯތައްވެސް މިއުޅެނީ އަދިވެސް ބަލައި ނުލެވިގެންނެވެ. އެކަމަކު، އެވީޑިއޯތައް ދުވަހަކު ނުބެލުނަސް، ތިޔަ ދެއުޅި އެކުނުވާ ވަޒީރު، ސިޔާސީ ބާރުވެރިކަމަކަށް ކޮންމެފަދަ ކަމެއްވެސް ކޮށްފާނޭކަން މިހާރު ދިވެހި ރައްޔިތުންނަށް ޤަބޫލުކުރެވޭ ވަރު ވެއްޖެ ކަމުގައި އެބަ ހީވެއެވެ.
ވަކި މީހަކަށް ބައިއަތު ހިފައިފިނަމަ، ދީނުން ބޭރުވެދާނެކަމަށް އަޑުން އަޑުނަގާ ގޮވާ، އާރޓިފިޝަލް ބީޗު ސަރަހައްދުގައި ހުރެގެން ހަޅޭފަލޭ ޖެހި މީހަކު، މިއަދު އެހެރީ ވަޒީރު ކަމުގެ ގޮނޑިއަށްޓަކައި، އެއްކަލަ މީހާގެ ފަހަތަށްވަދެ، އޭނާއަށް ސަނާ ކިޔުން އަމިއްލައަށް ޒީނަތްތެރި ކޮށްގެން ނޫންހެއްޔެވެ. ތަންކޮޅެއް ކުރިން، މީނާ އެހެން މީހެއްގެ ފަހަތަށްވަނީ ކަންނެލި ދޯންޏެއް ދީގެންނޭ ރަށުތެރޭގައި ކިޔާ އުޅުނެއެވެ. އަހުރެންނެއް ކަމަކު އެވާހަކައެއް ގަބޫލެއް ނުކުރަމެވެ. އެހެންނަމަވެސް، އެއްކަމެއް އެކެއްގެ ފުށުން މާގިނައިން ފެންނާން ފެށީމާ، އެކަން ގަބޫލު ނުކޮށް ހުންނާނޭ ގޮތެއް މުސްތަފާބޭ ނިކަން ބުނެލަދީ ބަލާށެވެ.
މުސްތަފާބާއެވެ. މިސްކިތްތަކުގައި، ސިޔާސީ ޕާޓީތަކުގެ ލޯގޯ ޖަހައިގެން، ދީނީ ދަރުސް ނުދިނިއްޔާ ދަރުސް ނުދެވެނީތޯއެވެ. ކިތައްމެ ބޮޑެތި ބޯޑުތައް ޖަހައި، ލޯގޯ ގަލުން ކެނޑިއަސް، އަމިއްލަ ޕާޓީގައި، 11 ހަމަ ނުވާކަން މުސްތަފާބޭއަށްވެސް ހަމަ ރަގަޅަށް އެނގޭނެއެވެ. އެކަމާ މުސްތަފާބޭއަށްވެސް ހުރެވޭނީ ބަނޑަށް ހީލަ ހީލާކަން އަހުރެންނަށް އެނގެއެވެ.
މުސްތަފާބޭއެވެ. މީގެ ކުރީގެ ކޮންމެ ރޯދަމަހެއްގައިވެސް، ބޭރުން ވާއިޒުން ގެނެސް ދަރުސްދީ، މިސްކިތްތަކުގެ އާބާތުރަ ފިލުވައި، ގައުމުތަކުން ހަދިޔާކުރާ ކަދުރުކޮޅު ގޭގެއަށް ބަހައި، ކަންކަން އިންތިޒާމްކޮށް އަހުރެމެން އެންމެންވެސް އުޅެމުން އައީ، ހާދަހާވާ ތަނަވަސްކޮށެވެ. ކިހާ އުފަލެއްގައި ހެއްޔެވެ. ރަމަޟާން މަހާ ދިމާކޮށް ދަރުސްތައް ފެއްޓެވި، ބޮޑު ޝެއިޚްވެސް، މިސްކިތެއްގައި ޕާޓީގެ ލޯގޯ ޖަހައިގެން ދަރުސްދިންތަނެއް އޭރަކު ނުދެކެވެ.
އެހެންނަމަވެސް މިހާރު އެހެން ހެއްޔެވެ. މުސްތަފާބޭމެން މި މާތް މައްސަރުވެސް ތިޔަ ހެދީ ސިޔާސީ ނިއުކުލިއަރ ބޮމަކަށް ނޫން ހެއްޔެވެ. އަހަރަކު އެއްފަހަރު ބައްދަލު ކުރާ މި މާތް މައްސަރު ބައްދަލު ކުރީމާ، ވެހޭތާ ފެންނަގާ އުސޫލުން، ތިއޮށްގެން ބާނަން ފެށީ ކުރު ދޮށީގައި ނޫން ހެއްޔެވެ. އެހެން ޕާޓީއަކުން މިސްކިތެއްގައި ދަރުސެއް ދެނީނަމަ އެވާނީ އިންޑިއާ އައުޓު ކަމުގަައެވެ. މުސްތަފާބޭ މެން ދީނީ ދަރުސުގެ ނަމުގައި ޕާޓީ އިސްތިހާރުކޮށް، ދީންވެސް ވިއްކާ ހަދަން ވީއެވެ. އެއަކު މައްސަލައެއް ނެތެވެ.
ސަލްމާން މިސްކިތްވެސް އެހެން މީހަކު ބުރަ މަސައްކަތުން ބިނާކޮށް ނިންމާ، ހަމަ އެކަނި ރިބަން ފަށް ކަނޑާލަން ދިނީމާ، މުސްތަފާބޭމެން އެއިން ކުރެޑިޓް ނަގާ، މެޑަލްޖަހާ، އަދި ނުވިތާކަށް އެކަން ކޮށްދިން މީހާ ޖަލަށްވެސް ލީ ނޫންހެއްޔެވެ. ހެޔޮކަމަކަށް ތެޔޮ ހަމެއްދިނުން، އެއީ މުސްތަފާބޭމެންގެ ފޮތުގައި އޮންނަ ހަމަ އެކަނި ގޮތްކަން އަހުރެންނަށް މީގެ ކުރިން އެގުނުނަމަ، މުސްތަފާބޭމެންގެ ވަސްވެސް ފޯރާ ހިސާބަށް އަހުރެން ގާތެއް ނުވީމުހެވެ. އެހެންނަމަވެސް، އަހުރެންވެސް މިހުރީ ހަޔާތުގައި ހެދުނު އެންމެބޮޑު ގޯސް ހަދައިގެންނެވެ. އެހެން ހުރިހާ ކަމެއްގައި ދެބަސްވިޔަސް، މިކަމުގައި އަހުރެންނަށް މިވަނީ މުސްތަފާބެއާއި އިއްތިފާގުވާން މަޖުބޫރު ވެފައެވެ.
މުސްތަފާބޭއެވެ. މުސްތަފާބޭ ތިޔަ ގެނައި ކޯލިޝަނަކާހެދި މުޅި ގައުމު ބޮއްސުން ލައިފިއެވެ. އެކަން އެގޮތަށް ހިނގާނެތީ، ޕާޓީގެ ރޫހާނީ ލީޑަރު، ކޯލިޝަން އުވާލުމަށް އާދޭސް ކުރާތާ ކިހާދުވަހެއް ވެއްޖެކަން މުސްތަފާބޭއަށް އިގޭ ހެއްޔެވެ. އެކަމަށް ބީރު ކަންފަތެއް ދިނުމުގެ ނަތީޖާއަކީ، ޕާޓީތެރެ ހައިޖާނުވެ، ގަޑުބަޑުވެ، ކަނޑި އުރައިން ދަމައިގަނެގެން، ހަނގުރާމަ ކުރަން ފެށުން ނޫންހެއްޔެވެ. މުސްތަފާބޭ މިކަން ކިތައްމެވަރަކަށް ސިއްރުކުރަން އުޅުނަސް އެކަމެއް ސިއްރެއް ނުވާނެއެވެ. އެކަން އޮންނާނީ އެންމެން ދަންނަ ބޮޑު ސިއްރެއްގެ ގޮތުގައެވެ. ނިކަން އިސާހިތަކު، ތިޔަ ކުލަ ދެބައި ވެދާނެއެވެ. ސަރުކާރުތެރެއިން ލިބެން އޮތް ރިސޯޓެއް ނުވަތަ ޕްރޮޖެކްޓަކާހެދި މީހަކާއެކު ސެލްފީއެއް ކަނޑާލިއަސް، އެއިން ކޮންމެ މީހެއްގެ ހިތުގެ އެމްއާރުއައި ހަދައިފިނަމަ، ރޫޙާނީ ލީޑަރުގެ ތަސްވީރު ނިކަން ނަލަކޮށް ސާފުކޮށް ފާޅުވާން ހުންނާނެއެވެ.
މުސްތަފާބޭއެވެ. ކޯލީޝަން ސަރުކާރުގެ ތެރެއިން، ވިއްސަކަން ޕަސެންޓު ނަގައި، ރައީސް އޮފީސް ހިސޯރުކޮށް، ގާނޫނުން ބޭރުން އެކިއެކި ކަންކަމަށް ކިތައްމެ ނުފޫޒެއް ފޯރިވިއަސް، އަދި މިސްކިތްތަކުގައި ކޮންމެ ނަމާދެއްގެ ފަހުގައި، ޕާޓީގެ ލޯގޯ ބޮޑުއަކުރުން ޖަހައިގެން ދަރުސް ދިނަސް، ޕާޓީގައި 40 ހަމަ ނުވާނަމަ އެއަކު އާރެއް ނުލާނޭ ނޫން ހެއްޔެވެ. މިއީ އަޅެފަހެ ދޮގެއްތޯއެވެ.
