މާދަމާއަކީ ރަމަޟާން މަހުގެ ފުރަތަމަ ދުވަސްކަމަށް އިސްލާމިކް މިނިސްޓްރީން ކަނޑައަޅައިފިއެވެ.
މިރޭ އިސްލާމީ މަރުކަޒުގައި ބޭއްވި ހަނދު ސާބިތު ކުރުމުގެ ޖަލްސާއަށްފަހު މިކަން އިޢުލާން ކުރެއްވީ އިސްލާމިކް މިނިސްޓަރ ޑރ.އަހުމަދު ޒާހިރެވެ. ރަމަޟާން މަހުގެ ހަނދު ސާބިތުކުރުމަށް ބޭއްވި ޖަލްސާއަށްފަހު ހަނދާގުޅޭ ގޮތުން ނެރުއްވި ޤަރާރު އިއްވަވަމުން މިނިސްޓަރ ޒާހިރު ވިދާޅުވީ މިއަހަރުގެ ރަމަޟާން މަހުގެ ހަނދު ދިވެހިރާއްޖެއާ އިސްލާމީ ބައެއް ޤައުމުތަކަށް ފެންނާނެކަމަށް އިތުބާރުހުރި ފަލަކީ ހިސާބުތަކުން ދައްކާތީ މާދަމާއަކީ މިއަހަރުގެ ރަމަޟާން މަހުގެ ފުރަތަމަ ދުވަސް ކަމަށެވެ.
ރާއްޖެއަށް ހަނދުފެންނާނެކަމަށް ފަލަކީ ހިސާބުތަކުން ޔަޤީންވާތީ، މާދަމާއަކީ ރަމަޟާން މަހުގެ ފުރަތަމަ ދުވަސްކަން ޢިއުލާން ކުރުމުގެ ގޮތުން ސިފައިންވަނީ ބަޑިޖަހާފައެވެ. މިއަހަރުގެ ރަމަޟާން މަހުވެސް އިޙްޔާކުރުމުގެ ޕްރޮގްރާމާއި ދީނީ ޚާއްޞާ ޕްރޮގްރާމްތައް ހިންގަން އިސްލާމިކް މިނިސްޓްރީން ވަނީ ނިންމާފައެވެ.
ރާއްޖެއިން ރަމަޟާންމަހުގެ ހަނދާއި ގުޅޭގޮތުން އަމަލު ކުރަމުންދާ ގޮތަކީ، ރާއްޖޭގެ އެއްވެސް ހިސާބަކަށް ހަނދު ފެނިފައިނުވާނަމަ، އިސްލާމީ ބޮޑެތި ގައުމުންތަކުން ނިންމާފައިވާގޮތަށް އަމަލު ކުރުމެވެ. އަދި ޚާއްސަގޮތެއްގައި ސައުދީ އަރަބިއާއިން ނިންމާގޮތަށް އަބަދުވެސް ރާއްޖޭގައި ދަނީ ރިއާޔަތް ކުރެވެމުންނެވެ.
ދުނިޔޭގެ އިސްލާމީ ބޮޑެތި ޤައުމުތަކަށްވެސް މާދަމައަކީ މިއަހަރުގެ ރަމަޟާން މަހުގެ ފުރަތަމަ ދުވަހެވެ. މިގޮތުން ސައުދީ އަރަބިއާއިންވެސްވަނީ މާދަމާއަކީ ރޯދަމަހުގެ ފުރަތަމަ ދުވަސްކަމުގައި ނިންމާފައެވެ.
ރާއްޖެއާއި ސައުދީ އަރަބިއާގެ އިތުރުން، ދުނިޔޭގެ އިސްލާމީ ގިނަ ގައުމުތަކުންވެސް މާދަމާއަކީ ރޯދަމަހުގެ ފުރަތަމަ ދުވަސްކަމުގައި ނިންމާފައިވާއި ވީނަމަވެސް، މެލޭޝިއާއި އިންޑޮނޭޝިއާގެ އިތުރުން ދުނިޔޭގެ އެހެން ބައެއް ގައުމުތަކުންވަނީ، މިއަހަރުގެ ރޯދަމަހުގެ ފުރަތަމަ ދުވަހަކީ އަންނަ އާދީއަތް ދުވަސްކަމުގައި ނިންމާފައެވެ.
މިގޮތުން މިއަހަރުގެ ރަމަޟާންމަހުގެ ފުރަތަމަ ދުވަހަކީ އެޕްރިލްމަހުގެ 3 ވަނަ ދުވަސްކަމުގައި މިހާރު އިއުލާން ކޮށްފައިވާ ގައުމުތަކުގެ ތެރޭގައި، ބުރޫނާއީއާއި، ސިންގަޕޯރއާއި، އަދި ޖަޕާން ހިމެނެއެވެ.
އެހެންނަމަވެސް، އިމާމް ކައުންސިލް އޮފް ސައުތު އޮސްޓްރޭލިއާއިން ފޭސްބުކުގައި އާންމު ކޮށްފައިވާ ބަޔާނުގައި ބުނެފައިވަނީ، އެގައުމަށް ރޯދަމަހުގެ ހަނދު ފެނިފައި ވާކަމަށާއި، އެހެންކަމުން މިމަހުގެ 2 ވަނަ ދުވަހަކީ އެގައުމަށް ރަމަޟާންމަހުގެ ފުރަތަމަ ދުވަސްކަމުގައެވެ.
އަރަބި ގިނަ ގައުމުތަކުން ރަމަޞާންމަހުގެ ފުރަތަމަ ދުވަސް އިއުލާން ކުރާނީ މިއަދުގެ މަޢުރިބް ނަމާދަށްފަހު އެވެ.
354 ނުވަތަ 355 ދުވަހުގެ މައްޗަށް އެކުލެވިގެންވާ ހިޖުރީ އަހަރުގެ މަސްތައް ކަނޑައެޅިގެން ދަނީ ހަނދުގެ ދައުރުވުމާ އެއްގޮތަށެވެ. އަދި އިސްލާމީ ކަލަންޑަރުގެ 9ވަނަ މައްސަރު ކަމުގައިވާ ރޯދަމަސް ފެށިގެންދަނީ ހަނދު ފެނުނުކަން ސާބިތު ކުރުމަށްފަހުއެވެ.
މިއަހަރުގެ ރޯދަމަހު، ދުނިޔޭގެ އެކި ކަންކޮޅުތަކުގައި 1.5 ބިލިއަން މުސްލިމުން ރޯދަމަހަށް މަރުހަބާ ކިޔާނެއެވެ. ރަމަޟާން މަހަކީ އިސްލާމީ މައްސަރުތަކުގެ ތެރެއިން އެންމެ މާތް އެއް މައްސަރެވެ. އަދި އެމަހަކީ އެމަހެއްގައި ގުރުއާން ބާވާލެއްވުނު މައްސަރުވެސް މެއެވެ. އެމަހުގައި އަދާކުރާ އެންމެ މުހިންމު އަޅުކަން ކަމުގައިވާ ރޯދައަކީ އިސްލާމް ދީނުގެ 5 ރުކުންތަކުގެ ތެރޭގައި ހިމެނޭ އެއް ރުކުނެވެ.
މުސްލިމުން ފާހަގަކުރާ ދެ އީދުގެތެރެއިން ފިތުރު އީދު އަންނަނީ ރަމަޟާންމަސް ނިމުމާއިއެކުއެވެ.
