ރަތަފަންދޫގެ ޒުވާނުން ތިބީ މާޔޫސް ވެފައިކަމަށާއި، ޒުވާނުންގެ ވަޒީރު އަތޮޅު ތެރޭގެ ހުރިހާ ރަށަކަށް ކަންތައްތައް ކޮށްދެއްވަމުން ގެންދާވާއިރު ރަތަފަންދޫގެ ޒުވާނުންގެ މަތިން ހަދާން ނެތުމަކީ ވަރަށް ބޮޑު އިހުމާލެއް ކަމުގައި، ޓްރޭޑް ޔޫނިއަންގެ ނައިބް ރައީސް އަދި ކުރީގެ ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑް ކުންފުނީގެ ބޯޑުގެ ޗެއަރމަން ސައުދުﷲ އަހުމަދު ވިދާޅުވެއްޖެއެވެ.
ރަތަފަންދޫގެ ޒުވާނުންނަށް ބޭނުންވާ ޚިދުމަތްތައް އެކަށީގެންވާ ގޮތެއްގައި ފޯރުކޮށް ނުދެއްވޭކަމުގެ ކަންބޮޑުވުން ފާޅު ކުރައްވަމުން ސައުދު ކުރެއްވި ޓުވީޓެއްގައި ވިދާޅުވެފައިވަނީ ރަތަފަންދޫ ކައުންސިލް ރައީސް ކުޅިވަރާބެހޭ ވަޒީރު އަހުމަދު މަހުލޫފްގެ އަރިހުން އެޕޮއިންޓްމަންޓަކަށް އެދުނުތާ 4 މަސްދުވަސް ވެފައި ވާކަމަށާއި އެެހެންނަމަވެސް މިނިސްޓަރުގެ ޖަވާބެއް މިއަދާ ހަމައަށް ލިބިފައި ނުވާ ކަމަށެވެ. އަދި އެރަށުގެ ދަނޑުވަނީ ހަލާކުވެފައި ކަމަށާއި، އެރަށުގައި ޒުވާނުންގެ މަރުކަޒެއްވެސް ނެތްކަމަށް ވިދާޅުވެ، މިކަންކަމުގެ ކަންބޮޑުވުން ޔޫތު މިނިސްޓަރަށް ކައުންސިލްގެ ރައީސް އެތައް ގޮތަކުން ހިއްސާ ކޮށްފައިވި ނަމަވެސް، މިހާތަނަށް އެދެވޭ ޖަވާބެއް ލިބިގެން ގޮސްފައި ނުވާކަމަށްވެސް ސައުދު ވިދާޅުފައި ވެއެވެ.
ރަތަފަންދޫ ޒުވާނުން ތިބީ މާޔޫސްވެފަ. އަތޮޅުގެ ހުރިހާ ރަށަކަށް ޒުވާނުންގެ ވަޒީރު ކަންތައް ކުރަމުންދާއިރު ރަތަފަންދޫ ޒުވާނުންގެ މަތިން ހަނދާން ނެތުމަކީ ތަފާތުކުރުން. ކައުންސިލް ރައީސް އެޕޮއިންޓްމަންޓަކަށް އެދުނުތާ 4 މަސް. އަދިވެސް ޖަވާބު ނުލިބޭ.@AhmedMahloof
— Saudulla Ahmed (@saudullaahmed1) March 28, 2022
ސައުދު ގެންދަވަނީ، ރަތަފަންދޫގެ ތަރައްގީގެ ގިނަ މަޝްރޫއުތައް ކުރިޔަށް ނުދާތީ އެކަމުގެ ކަންބޮޑުވުން ފާޅުކުރައްވަމުންނެވެ. މީގެ ކުރިން އޭނާވަނީ، ރަތަފަންދޫގެ ތަރައްގީއާއި ގުޅުންހުރި ފެނާއި ނަރުދަމާ އަދި އިންޖީނުގޭގޭ މަޝްރޫޢު ހުއްޓިފައިވާތާ 7 މަސްދުވަސް ފާއިތުވެގެން ގޮސްފައިވާތީ ހިންހަމަނުޖެހުން ފާޅުކޮށް، މި މަސައްކަތްތަކަށް ވަކާލާތު ކުރާނެ މެމްބަރަކު ނެތުމަކީ ސަރުކާރުން ރަތަފަންދޫ ރައްޔިތުންނަށް އިހުމާލު ވާންވީ ސަބަބެއް ނޫން ކަމަށްވެސް ވިދާޅުވެފައެވެ.
