މާތް ރަސްކަލާންގެ ފަރުޟު ކުރައްވާފައިވާ، ފަރުޟު ފަސް ނަމާދު އަޅައިފި މީހާ އަށް މުގުރާލެވެނީ އިސްލާމްދީން ކަމުގައި މިއަދުގެ ހުކުރު ޚުތުބާގައި ބުނެފިއެވެ.
މިއަދުގެ ޚުތުބާ ޚާއްސަކޮށްފައިވަނީ ނަމާދުގެ މައްޗަށެވެ. ޚުތުބާގައި ބުނެފައިވަނީ ނަމާދަކީ ރެއާއި ދުވާލު 5 ފަހަރު ތަކުރާރުވާގޮތަށް ފަރުޟު ކުރެއްވިގެންވާ އަޅުކަމެއްކަމަށެވެ. އެނަމާދާ މެދު ވާރިދުވެގެން އައިސްފައިވާ އަޘަރުތަކާމެދު، ގިނަ މީހުންވަނީ ޣާފިލުވެފައިކަމަށާއި، އަދި އެނަމާދުގެ ޤަދަރާމެދު ގިނަ މީހުންވަނީ ޣާފިލުވެފައިކަމަށެވެ. އޭގެ ޙުކުމްތަކާއި، ޙިކުމަތްތަކާއި، އެނަމާދަށް ދޭންޖެހޭ ސަމާލުކަމާމެދު ގިނަ މީހުންވަނީ ޣާފިލުވެފައިކަމަށެވެ.
ނަމާދަކީ، އޭގެ ސަބަބުން ފަތައް ފުއްސަވައިދެއްވާނޭ ކަމެކެވެ. އޭގެ މިސާލެއް ބަޔާން ކުރައްވަމުން، ލޮބުވެތި ރަސޫލާ ގެ ޙަދީޘް ކުރެއްވި ބަސްފުޅެއްގެ މާނައިގައި ވެއެވެ. "ފަހެ ތިޔަބައިމީހުންގެ ތެރެއިން މީހެއްގެ ގޭގެ ދޮރުމަތީގައި، ސާފު ފެންގަނޑެއް އޮވެފައި، އެއިން ކޮންމެ ދުވަހަކު 5 ފަހަރު ފެންވަރާ ކަމުގައި ވާނަމަ، އެމީހެއްގެ ހަށިގަނޑުގައި އެއްވެސް ކަހަލަ މިލައެއް ހުންނާނެ ހެއްޔެވެ؟ ޞަޙާބީން ދެންނެވިއެވެ. އޭނާގެ ހަށިގަނޑުގައި އެއްވެސް މިލައެއް ނުހުންނާނެއެވެ. ޙަދީޘްކުރެއްވިއެވެ. "ފަހެ އެއީ ފަރުޟު ފަސްނަމާދުގެ މިސާލެވެ.
ޚުތުބާގައި ބުނެފައިވަނީ ކިތަންމެ ބޮޑު ބަލިމަޑުކަމެއްގައި ހޭދަކުރާ މީހަކަށްވެސް ނަމާދު އަޅައިގެން ނުވާނެކަމަށެވެ. އެމީހެއްގެ ހާލަތާއިއެއްގޮތަކަށް ނަމާދު ކުރެވޭނެ މަގު އިސްލާމް ދީނުމުގައި ބަޔާންކޮށްދެއްވާފައިވާކަމަށް ޚުތުބާގައި ވެއެވެ. ބަލި ހާލަތުގައި ތިބޭ ބައެއް މީހުން ނަމާދު ދޫކޮށްލައި، ނަމާދު ގަޟާ ކުރުމަށް ދޫކޮށްލެވޭތަން އާދެވޭ ކަމަށާއި، ނަމަވެސް މިފަދަ ހާލަތްތަކުގައި ނަމާދު ފަހުން ކުރުމަށް މަޑު ކުރުމަކީވެސް ރަނގަޅު ގޮތެއް ނޫންކަމަށް ޚުތުބާގައި ބުނެފައިފައިވެއެވެ.
މާތް ރަސްކަލާންގެ ކަނޑައަޅުއްވާފައިވާ ވަގުތުތަކުގައި ފަރުޟު ފަސް ނަމާދު އަދާކުރުމަށް ތިޔަބައިމީހުން ރައްކައުތެރިވާށެވެ! ނަމާދަކީ ހުރިހާ ހެޔޮ ކަމެއްގެ ތަޅުދަނޑިކަން ދަންނާށެވެ! މަތް ﷲގެ ރުއްސެވުމާއި، ފުއްސެވުމާ ހަމައަށް ދަތުރުކުރެވޭނީ ނަމާދަށް ރައްކާތެރިވެގެންނެވެ. ޖަމާޢަތުގައި ނަމާދު އަދާކުރުމަށް ފަރުވާތެރިވާށެވެ! އެކަހެރިކޮށް ހުރެ ކުރާ ނަމާދުން ލިބޭ ޘަވާބަށް ވުރެ، ޖަމާޢަތުގައި ކުރާ ނަމާދުގެ ޖަވާބު ހަތާވީސް ދަރަޖައަށް އިތުރުވެގެން ވެއެވެ. ރަސޫލާ ގެ ޙަދީޘް ކުރައްވާފައިވާ ގޮތުގައި ޖަމާޢަތުގައި ޢިޝާ ނަމާދު ކުރުމަކީ ރޭގަނޑުގެ ދެބައިކުޅަ އެއްބައިގައި އަޅުކަން ކުރުން ފަދަ ކަމެކެވެ. އަދި ޖަމާޢަތުގައި ޢިޝާނަމާދު ކުރިމީހާ ފަތިސްނަމާދު ވެސް ޖަމާޢަތުގައި ކޮށްފިނަމަ، މުޅި ރޭގަނޑު އަޅުކަންކުރި މީހަކާ އެއްފަދައެވެ.
– ޚުތުބާގައި ބުނެފައިވެއެވެ.
ޝައިތާނާ އަބަދުވެސް މަސައްކަތް ކުރާނީ މީސްތަކުން ނަމާދުން ދުކޮށް، ނަމާދުގެ ތިލަފަތް އަބަދުވެސް ލުއި ކުރުމަށް ކަމަށާއި، ނަމަވެސް މިމަޅީގައި ނުޖެހި ތިމާގެ ދެދުނިޔޭގެ ސަލާމަތްތެރިކަން ހޯދުމަށް ނަމާދަށް ރައްކާތެރި ވުމަށް ޚުތުބާގައި ވަނީ ގޮވާލާފައެވެ. ނަމާދު ވަގުތުތަކުގައި މިހާރަކަށް އައިސް ކުރެވޭ މަސައްކަތްތައް އިތުރުވެ، ފިހާރަތަކާއި ހޮޓާކައި، އެނޫންވެސް ތަންތަން ހުޅުވައިގެން ޚިދުމަތް ދޭތަން ފެންނަ ކަމަށާއި، މިފަދަ ޝއިތާނީ ވިސްނުންތަކުން ފުރުވެ ނަމާދު ވަގުތުގައި ނަމާދަށް ފަރުވާތެރިވުމަށްވެސް ޚުތުބާގައި ގޮވާލާފައިވެއެެ.
ނަމާދު ވަގުތުގައި ކުޅިވަރު މުބާރާތްތަކާއި، ހަފްލާތަކާއި، އެނޫންވެސް ކަންކަން ރޭވިގެންދާއިރު، ނަމާދުގެ ވަގުތަކަށް ނުވަންނަނާނެހެން މިފަދަ ކަންކަން ރޭވުމަށް ކަމާއިބެހޭ ފަރާތްތަކުން އިސްކަންދޭންޖެހޭކަމަށް ޚުތުބާގައި ބުނެފައެވެ. މިއަދު ނަމާދު އަޅައި ތިމާގެ ހިންހަމަ ޖެހުން ހޯދުމަށް ކުރެވޭ ކަންކަމުގައި އާޚިރަތުގައި ލިބޭނެ ނަތީޖާ ހިތިވާގޮތަކަށް ކަންކަން ބައްޓަން ނުކުރުމަށްވެސް ޚުތުބާގައި އިރުޝާދު ދީފައިވެއެވެ.
