ބައިނަލްއަގުވާމީ އެކުވެރިކަމުގެ މެޗެއްގައި ދިވެހިރާއްޖެ އާއި ބަންގްލަދޭޝް ބައްދަލުކުރި މެޗު ރާއްޖޭން ކާމިޔާބުކޮށް، ބަންގްލަދޭޝް އަތުން ބަދަލު ހިފައިފިއެވެ.
ރަސްމީ ފުޓްބޯޅަ ދަނޑުގައި ރޭ ކުޅުނު މެޗުގައި ބަންގްލަދޭޝްގެ މައްޗަށް ރާއްޖެއިން ކުރިހޯދީ 0-2 ގެ ނަތީޖާއަކުންނެވެ. މި މެޗުގެ ކުރިން މަހިންދަ ރާޖަޕަކްސަ ފޯ ނޭޝަންސް ކަޕްގައި ބަންގްލަދޭޝް އަތުން 2-1 އިން ރާއްޖެ ބަލިވެފައި އޮތުމުގެ ސަބަބުން ރޭގެ މެޗަށް ރާއްޖޭން ނުކުތީ އެކަމުގެ ބަދަލު ހިފުމުގެ ރޫހުގައެވެ.
މި މެޗަށް ރާއްޖޭން ނުކުތީ ފޯވާޑް ލައިނުގައި ހިމެނޭ މުހިންމު 3 ކުޅުންތެރިން ނުލައެވެ. އެގޮތުން މި ސީޒަން ފެށުނީއްސުރެއް އަނިޔާގައި ހުރި ޢަލީ އަޝްފާގް އާއި ޕްރެޒިޑެންޓްސް ކަޕްގެ ފައިނަލުގައި އަނިޔާވި ޢަލީ ފާސިރުގެ އިތުރުން ލީގުގެ ފުރަތަމަ ބުރުގެ ފަހު ކޮޅު ހަމްޒާ މުހައްމަދަށްވެސް އަނިޔާ ވެގެން މި މެޗުގައި ކުޅެވޭގޮތް ވަނީ ނުވެފައެވެ.
މި މެޗަކީ ގައުމީ ފުޓްބޯޅަ ޓީމުގެ ކޯޗު ފްރެންޗެސްކޯ މޮރިއޭރޯގެ އިރުޝާދުގެ ދަށުން މާލޭގައި ކުޅުނު ފުރަތަމަ މެޗުވެސްމެއެވެ.
މި މެޗުގައި ބަންގްލަދޭޝް ޓީމަށް ރާއްޖޭގެ ގޯލާއި އަމާޒުކޮށް ނުރައްކާތެރި ހަމަލާއެއް ފޮނުވާލެވިފައެއް ނުވެއެވެ. މެޗުގައި ރާއްޖެއިން ލަނޑު ޖަހާ ލީޑު ނެގީ 38 މިނެޓުގައެވެ. މި ލަނޑު ރާއްޖެއަށް ކާމިޔާބުކޮށްދިނީ، ހަސަން ރާއިފް އަޙުމަދު (ހަންނަ) އެވެ. މިއީ ސީނިއަރ ގައުމީ ފުޓްބޯޅަ ޓީމަށް ހަންނަ ކާމިޔާބުކޮށްދިން ފުރަތަމަ ލަނޑުގެ އިތުރުގެ ގަލޮޅު ދަނޑުގައި ގައުމީ ޖާޒީގައި ހަންނަ ކުޅުނު ފުރަތަމަ މެޗުވެސް މެއެވެ. ރާއްޖެއަށް ލީޑު ފުޅާކޮށްދިން ލަނޑު ދެވަނަ ހާފު ފަށައިގެން 60 ވަނަ މިނެޓުގައި ކާމިޔާބުކޮށްދިނީ، އިބްރާހިމް މަހުދީ ޙުސައިންއެވެ.
