ކުޑަކުދިންނަށް ހާއްސަ ކޮށްގެން އަލަށް ފަށަން އުޅޭ ރިއަލިޓީ ޝޯ "ޑާންސް ދީވާނޭ ޖޫނިއާ"ގެ ޖަޖަކަށް ބޮލިވުޑްގެ "އައިޓަމް ގާލް"ގެ ގޮތުގައި މަޝްހޫރު ނޯރާ ފަތޭހީ އާއި ކުރީގެ ކުޅަދާނަ ބަތަލާ ނީތޫ ކަޕޫރު ހަމަޖައްސައިފިއެވެ. މި ޝޯގެ ތިން ވަނަ ޖަޖަކީ މަރްޒީ ޕެސްތޮންޖީއެވެ.
މި ދެމީހުން ވަނީ "ޑާންސް ދީވާނޭ" ގެ ފަހު އެޕިސޯޑުން މާދުރީ އާއި އެކުގައި ފެނިގެން ގޮސްފައެވެ. އެކްޓަރ ރަންބީރު ކަޕޫރުގެ މަންމަ ނީތޫ ޓީވީ ޝޯއަކުން ފެންނަ މިއީ ފުރަތަމަ ފަހަރެވެ. މި ޝޯވެސް ދައްކާނީ ކަލާޒް ޗެނަލުންނެވެ.
މުނިފޫހި ފިލުވުމުގެ ދާއިރާއިން، ޖަޖެއްގެ ގޮތުގައި ޓީވީއަށް ތައާރަފްވުމުގެ އިތުރުން ނީތޫ ވަނީ 7 އަހަރުގެ މެދުކެނޑުމަކަށް ފަހު ފިލްމެއްގެ މަސައްކަތް ވެސް ކޮށްފައެވެ. އެއީ ކަރަން ޖޯހަރް ޕްރޮޑިއުސްކޮށް ވަރުން ދަވަން އާއި ކިއާރާ އަދުވާނީ ލީޑް ރޯލު ކުޅެފައިވާ "ޖުގް ޖުގް ޖިޔޯ" އެވެ.
ނޯރާ ފަތެހީ މީގެ ކުރިން ވެސް ވަނީ ރިއަލިޓީ ޝޯއެއްގައި ވަގުތީގޮތުން ފަނޑިޔާރެއްގެ މަސައްކަތް ކޮށްފައެވެ. އެއީ އެ ޝޯގެ އަސްލު ފަނޑިޔާރު މަލައިކާ އަރޯރާ ކޯވިޑަށް ޕޮޒިޓިވްވުމާ ގުޅިގެން ނެވެ.
