ބޮލީވުޑްގައި އެންމެ ޑިމާންޑްބޮޑު އެއް އެކްޓަރ އަކްޝޭ ކުމާރު، އެންމެ ގިނަ ވެގެންވެސް ފިލްމެއް ކުޅުމަށް ދެވޭނީ 100 ދުވަސްކަމަށް ބުނެފިއެވެ.
ބޮލީވުޑްގެ ޚަބަރުތަށް ގެނެސްދޭ 'ޕިންކްވިލާ' އާ ވާހަކަ ދައްކަމުން އަކްޝޭ ބުނެފައިވަނީ އޭނާ ކުޅޭ ފިލްމެއްގެ ޝޫޓިންގ ނިންމުމަށް ދެވޭނީ އެންމެ ގިނަވެގެން 100 ދުވަސްކަމަށާއި، އެ މުއްދަތުގެ ތެރޭގައި ފިލްމުގެ ޝޫޓިންގ ނިމެން ޖެހޭނެ ކަމަށެވެ.
"ހަގީގަތުގައި ފިލްމެއްގެ ޝޫޓިން އަށް 40 ދުވަސް ނުނީ 50 ދުވަސް ނަގާނަމަ ބަޖެޓުންވެސް ބޮޑު ބައެއް ސަލާމަތް ވާނެ. އަނެއްކޮޅުން އެ ފިލްމުގެ އެހެން އެކްޓަރުންނާއި ފިލްމްގެ ޓީމު މެންބަރުންގެ ވެސް ވަގުތު ސަލާމަތް ކުރެވޭނެ." ބައްޗަން ޕާންޑޭގެ ޕްރޮމޯޝަންގައި ވާހަކަ ދައްކަމުން އަކްޝޭ ބުނެފައިވެއެވެ.
މީގެ އިތުރުން އޭނާ ބުނެފައިވަނީ ފިލްމަކަށް 100 ދުވަހަށް ވުރެ ގިނަ ދުވަސް ނަގާނަމަ އެ ފިލްމެއް އޭނާއަށް ނުކުޅެވޭނެ ކަމަށެވެ. އަކްޝޭއަކީ ބޮލީވުޑްގައި ހުރި އެންމެ ބިޒީ އެއް އެކްޓަރެވެ. އެގޮތުން އަހަރެއްގެ ތެރޭގައި އެއް ތަރިއެއްގެ ފިލްމު އެންމެ ގިނަ ފިލްމު ރިލިޒް ކުރާ ތަރިއަކީވެސް އަކްޝޭއެވެ.
އަކްޝޭގެ އެންމެ އަވަހަށް ދެން ރިލީޒް ކުރާނީ "ބައްޗަން ޕަންޑޭ" އެވެ. މި ފިލްމުގައި އޭނާ އާއެކު ފެނިގެން ދާނީ ކްރިތީ ސެނޮންއެވެ. ފިލްމު ރިލިޒް ކުރުމަށް ތާވަލް ކޮށްފައިވަނީ މިމަހުގެ 18 ވަނަ ދުވަހަށެވެ.
އަކްޝޭގެ ކުރިއަށް ހުރި ފިލްމުތަކުގެ ތެރޭގައި "އޯ މައި ގޯޑް 2″، "ރާމް ސެތޫ"، "ރަކްޝާ ބަންދަން" ފަދަ ފިލްމުތައް ހިމެނެއެވެ.
