90 ގެ އަހަހރު ތަކުގައި ބޮލީވުޑްގައި އެންމެ މަގުބޫލު އެކްޓްރެސް މާދުރީ ޑިކްސިޓްގެ ވެބް ސިރީޒް " ދަ ފޭމް ގޭމް" އަށް އުންމީދު ކުރި ވަރަށް ވުރެ ބޮޑު ތަރުހީބެއް ލިބެމުންދާކަމަށް ރިޕޯޓްތައް ބުނެފިއެވެ.
މި ސީރީޒް ޕްރިމިއާ ކޮށްފައިވަނީ ނެޓްފްލިކްސްއިން މިދިއަ ފެބްރުއަރީ މަހުގެ 25 ވަނަ ދުވަހުއެވެ. މި ޑްރާމާއިން މާދުރީ ވަނީ އޭނާ އެކްޓިން ވަރަށް ރަނގަޅަށް އަނެއްކާވެސް ދައްކާލަދީފައެވެ.
އެގޮތުން މާދުރީގެ މި ސީރީޒް މިވަގުތު އޮތީ ނެޓްފްލިކްސްގެ ސީރީޒްތަކުގެ ތެރެއިން މުޅި ދުނިޔޭގެ 6 ވަނައިގައެވެ. މީގެއިތުރުން "ފޭމްގޭމް" ވަނީ 16 ގައުމެއްގެ ގަދަ 10 އަކުންވެސް ޖާގަ ހޯދާފައެވެ. އެ ގައުމުތަކުގެ ތެރޭގައި ރާއްޖޭގެ އިތުރުން ސްރީލަންކާ، ޕާކިސްތާނު، ބަންގްލަދޭޝް، މޮރިޝަސް، ޔޫއޭއީ، އޯމާން، ކުވޭތު، ގަތަރު އަދި އޮސްޓްރޭލިއާވެސް ހިމެނެއެވެ.
މި ސީރީޒް ގައި މާދުރީގެ އިތުރުން ކުރީގެ އެކްޓަރު ސަންޖޭ ކަޕޫރު އަދި މުސްކާން ޖެފްރީ އާއި ލަކްޝްވީރް ސަރަން ވެސް ފެނިގެން ދާނެއެވެ. މިއީ ވެބްސީރީޒެއް ނުވަތަ ޑްރާމާއެއްގައި މާދުރީ މަސައްކަތްކުރި ފުރަތަމަ ފަހަރެވެ.
މި ސީރީޒް ގައި ގެނެސްދެނީ ބޮލީވުޑްގެ ކުރީގެ ތަރި އަނާމިކާ އާނަންދުގެ ހަޔާތުގެ އެކިއެކި ކަންތައްތަކެވެ. މާދުރީ ފެނިގެންދަނީ އަނާމިކާގެ ރޯލުންނެވެ.
