މަސްތުވާތަކެތީގެ ބޮޑެތި ދައުވާތަކެއް އުފުލައި، ޝަރީއަތް ނިމެންދެން ބަންދުކޮށްފައި ހުރި ރެޕް ލަވަކިޔުންތެރިޔާ އިސްމާއިލް އިފްހާމް މުހައްމަދު (ޕެސްޓް) ބޭސްފަރުވާ އަށް ބަންދުން ދޫކުރި މައްސަލަ އިސްތިއުނާފް ކޮށްފިއެވެ.
ޕެސްޓްުގެ މައްސަލަ އިސްތިއުނާފް ކޮށްފައިވަނީ ހައިކޯޓުގައެވެ. ކްރިމިނަލް ކޯޓުގައި ފެބްރުއަރީ 23 ވަނަ ދުވަހު ބޭއްވި އަޑުއެހުމުގައި ޕެސްޓް ބަންދުން ދޫކޮށްލަން ނިންމީ އޭނާގެ ފަރާތުން ހުށަހެޅުމުންނެވެ. އަދި ކޯޓުން ޕެސްޓު ދޫކޮށްލާފައި ވަނީ ދެ މަސް ދުވަހުގެ މުއްދަތަކަށެވެ.
މިދިޔަ އަހަރުގެ ފެބްރުއަރީ މަހު މަސްތުވާތަކެތީގެ މައްސަލައެއްގައި ޕެސްޓާއި އިތުރު ބަޔަކު ހައްޔަރުކޮށް، އެ މީހުންގެ މައްޗަށް ބޮޑެތި ދައުވާތަކެއް ކުރިއެވެ. ކުށް ސާބިތުވެއްޖެ ނަމަ، އުމުރު ދުވަހުގެ ޖަލު ހުކުމެއް އަންނަ ހުކުމެއް އަންނަ ދައުވާތަކެއް ޕެސްޓްގެ މައްޗަށް ކުރާއިރު، އޭނާ މިހާތަނަށް ވެސް ހުރީ ޝަރީއަތް ނިމެންދެން ބަންދުކޮށްފައެވެ. އޭނާގެ ބަންދު ހައި ކޯޓުން ވެސް މިދިޔަ އަހަރު ދެމެހެއްޓިއެވެ.
ޕެސްޓުގެ މައްޗަށް މަސްތުވާތަކެއްޗާ ގުޅުންހުރި ފަސް ދައުވާއެއް ދައުލަތުން އުފުލާފައިވެއެވެ. އެއީ ޑައިމޯފިން ޓްރެފިކް ކުރުމުގެ ދައުވާއާއި، ކެނަބިސް ޓްރެފިކް ކުރުމުގެ ދައުވާއާއި، ކެނަބިސް ބޭނުން ކުރުމުގެ ދައުވާއާއި، މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާގެ އިތުރުން ކުށްކޮށްގެން ހޯދާ މުދަލާއި ފައިސާ ބޭނުން ކުރުމާއި އަތުގައި ބެހެއްޓުމާއި ސިއްރު ކުރުމުގެ ކުށުގެ ދައުވާއެވެ.
