ވެރިކަން ކުރާ މައި ޕާޓީ އެމްޑީޕީގެ މަސައްކަތް އޮތީ ލަދުވެތިވާންޖެހޭ ހިސާބެއްކަމަށް ވިދާޅުވެ، އެމްޑީޕީގެ ޗެއާޕާސަންގެ މަޤާމަށް ވާދަކުރައްވާ އިކޮނޮމިކް މިނިސްޓަރ ފައްޔާޒު އިސްމާއިލްގެ ބަހުގެ ހަމަލާތަކެއް އެމްޑީޕީގެ ލީޑަރޝިޕަށް އަމާޒުކޮށްފިއެވެ.
ފައްޔާޒާއި، ރޮޒޭނާގެ "ހިންގާލަން" ކެމްލެއިން ލޯންޗު ކުރުމަށް މިރޭ ނ.މިލަންދޫގައި ބޭއްވި ޖަލްސާގައި ފައްޔާޒުވަނީ އޭނާ މިމަޤާމަށް ކުރިމަތިލާންޖެހުނު ސަބަބާއި، އެމްޑީޕީހެ ހާލަތު ހިއްސާކޮށްފައެވެ. ގިނަ އަދަދެއްގެ އެމްޑީޕީގެ މަޖިލިސް މެމްބަރުންނާއި، އާންމު މެމްބަރުން ބައިވެރިވި މިޖަލްސާގައި ފައްޔާޒު ވިދާޅުވީ އެމްޑީޕީއަކީ ރާއްޖެ ބަދަލު ކޮށްލި ޕާޓީ ކަމަށެވެ. މިނިވަންކަމާއި އިންސާފު ގެނެސްދިން ޕާޓީކަމަށެވެ. އަނިޔާވެރިކަމަކީ ސަގާފަތަކަށްވެ، އަނިޔާވެރިކަން އެއީ ބައެއް ރައްޔިތުންނަށް ހައްގުކަމެއްކަމަށް ދެކުނު ދުވަސްވަރެއްދިޔަ ކަމަށާއި، ނަމަވެސް އެބިރު ކަނޑުވާލީ އެމްޑީޕީގެ މެމްބަރުން ނިކުމެ ކުރި މަސައްކަތުންކަމަށް ފައްޔާޒު ވިދާޅުވިއެވެ.
މިއޮޑިއެއް ނުފެތޭނެ. ކޮންމެ ކަނޑަކަށްވެސް މިއޮޑި ހެޔޮވަރުވާނެ. ނަމަވެސް މިއަދު ކޮންމެވެސް ވަރަކަށް އޮޑީގެ ސްޕީޑު ދަށްވެއްޖެ. އޮޑިވަނީ މަރާމާރު ކުރަންޖެހިފަ. އޮޑީގެ ރިޔާ ސާފުކޮށްލަން ޖެހިއްޖެ. އާދެ، ކުރިމަތިން ނަގަމުންދާ ކަޅު ވިލާތަކާއި ދޭތެރޭ ވިސްނުން ގެއްލިއްޖެ. އެއިހުސާސް ނުކުރެވޭހެން ހީވާން ފަށައިފި. ނަމަވެސް އެވިލާގަނޑު އަންނަނީ ނަގަމުން. އަޅުގަނޑުމެން ކަންކަން ރަނގަޅަށް ރާވާލައި މަސައްކަތް ސްޕީޑު ބާރުނުކޮށްފިނަމަ، މަސައްކަތް ގެއްލި ކާމިޔާބީ އޮޔާދާތަން އަޅުގަނޑަށް ފެނޭ.
– ފައްޔާޒު ވިދާޅުވިއެވެ.
ފައްޔާޒު ވިދާޅުވީ މާޒީގައި ކަންކަން ހިނގައިދިޔަ ގޮތުން ގިނަ އިބްރަތްތަކެއް ހާސިލް ކުރަންޖެހޭކަމަށެވެ. އަދި މިވީ ދުވަސްތަކުގައި އެމްޑީޕީ ޕާޓީއެއްގެ ސިފައިން ދެއްކުމަށް ލިބުނު ފުރުސަތު ބޭނުން އެންމެ ރަނގަޅަށް ހިފިފައި ނުވާކަމަށް ފައްޔާޒު ވިދާޅުވިއެވެ.
އެމްޑީޕީ އޮތީ ހައްގުވާ މިންވަރަކުނޫން. ޕާޓީގެ މަސައްކަތް އޮތީ ލަދުވެތިވާންޖެހޭ ހިސާބުގައި. އެމްޑީޕީއަކީ ކުދިކުދި ސިކުޑިތަކެއްގައި ފިތި ބާރުވެފައި އޮންނަ ޕާޓީއެއްނޫން. މިޕާޓީން އެންމެންނަށް ޖާގަ ލިބެންޖެހޭ. ވަކި ގެއަކަށް ވަކި މީހަކަށް ވުމުން ޖާގަ ނުލިބޭ ލިބުމުން ދޫކޮށްލަންޖެހޭ. މިއީ އެއަށްވުރެ މާބޮޑު ޕާޓީއެއް.
– ފައްޔާޒު ވިދާޅުވިއެވެ.
ފައްޔާޒު ވިދާޅުވީ އެމްޑީޕީގައި އަންހެނުންގެ އަޑެއްވެސް، އަދި ޒުވާނުންގެ އަޑެއްވެސް އެންމެ އެކަށީގެންވާ ގޮތަށް ބައިވެރިކުރާތަން ނުފެންނަ ކަމަށެވެ. ނަމަވެސް އެންމެ ބޮޑު އިސްކަމެއްދޭނީ އަންހެނުންނަށް ފުރުސަތުދީ، ޒުވާނުންނަށް އެމްޑީޕީގައި ޖާގަ ދިނުމަށް ކަމުގައެވެ.
އޭނާ ވިދާޅުވީ ޗެއާޕާސަންގެ މަޤާމަށް އިންތިޚާބަށްފަހު އެންމެ ބޮޑަށް އިސްކަންދޭނި ރަށްރަށުގައި އެމްޑީޕީ ދިރުވަން ކަމަށެވެ. ހުއްޓިފައިވާ ގޮފިތަކާއި ހަރުގެތަށް އަލުން ދިރުވައި އެފަރާތްތަކަށް އެމްޑީޕީގައި ބަސްބުނެވޭނެ ޖާގަ ދިނުމަށް ކަމަށެވެ.
މިއިންތިޚާބު ނިމިގެންދާއިރު، 2023 ވަނަ އަހަރަށް އެމްޑީޕީން ފައްކާވެ އެމްޑީޕީގެ އިތުރު ވެރިކަމެއް ގެންނަން ކުރެވެން އޮތް ހުރިހާ މަސައްކަތެއް ކުރާނެކަމަށް ފައްޔާޒު ވިދާޅުވިއެވެ. އަދި 2023 ކާމިޔާބު ކުރުމަށް ފިސާރި ރަނގަޅަށް އެމްޑީޕީ ހިންގަންޖެހޭކަމަށް ފައްޔާޒު ވިދާޅުވިއެވެ. އެމްޑީޕީ އެންމެ ރަނގަޅަށް ހިންގޭނީ ރަށްރަށުގެ ގޮފިތަައް ހިންގާލެވިގެން ކަމަށާއި، ނަމަވެސް މިއަދު ރަށްރަށުގައި އެއްވެސް ހަރަކާތެއް ނުހިނގާކަމީ ލަދުވެތިވާންޖެހޭކަމެއްކަމަށް ފައްޔާޒު ވިދާޅުވިއެވެ.
